Pawuro kaasubhya bhanu abhamugaya
10
1 Mbe, anye Pawuro omwene, enibheerembeeresya mu‑bhwikeeya na mu‑bhworooro bhwa Kirisito. Nawe abhaanu abhandi abhaayika ati, anye enibhaga mworooro omwanya gunu owubha niri aamwi na emwe na enibhaga omururu omwanya gunu owubha niri kura na emwe. 2 Enibheerembeeresya ati, nikabhaaja‑ko eyo, musige okunkora nibhe omururu. Enaayika kutyo, kwa okubha nimenyere ati enitura okubha omururu ku‑bhaanu bhoone bhanu abheetogera ati, eswe chiikaaye rwa abhaanu abhandi bha mu‑chaaro munu. 3 Noorwo kutyo chiikaaye mu‑chaaro munu, chitakurwana riremo rwa erya abhaanu bha mu‑chaaro munu. 4 Ebhigwato bhyeswe bhya riremo eryo, bhitari bhya mu‑chaaro munu, tari bhiri na obhuturo bhwa Nyamuwanga, na ebhisingaarisya obhwirukiro bhwone bhwa omusoko. 5 Echisingaarisya emisango joone jinu ejibhonekana okubha ja echimari keenu jiri ja orubheeyi, na emisango joone ja orwikuuya jinu ejireterera abhaanu bhasige okusombookerwa Nyamuwanga. Ka wone echigwata bhuri bhwiganirisya korereki bhugayuke Kirisito. 6 Omwanya gunu muribhaga mugayukire chimwi, niwo eswe chiribhaga chiimaririiye okuyaana ebhitiibha emisango joone jinu jitari ja okugayuka.7 Emwe omuringira era jinu ejibhonekana mu‑meeso geemwe! Omuunu woonewoone unu keerora ati omwene ni muunu wa Kirisito, eechuke ati, eswe wone chiri bhaanu bha Kirisito, rwa omwene. 8 Noorwo kutyo eniikuuya muno inguru ya obhuturo bhunu Raatabhugenyi achiyaaye, nawe nitakurora swaro kwa okubha obhuturo obhwo bhutari bhwa okubhanyamura, tari ni bhwa okubharumatanya mu‑riikirisya. 9 Nitakwenda nibhonekane kw‑imwe ati, eneenda okubhakanganya ku‑nyarubha jinu enibhakaamira. 10 Enaayika kutyo, kwa okubha abhandi abhaayika ati, “Jinyarubha ja Pawuro, jiri na emisango emikomeeye, ka wone ni misango emiruru. Nawe omwanya gunu kaabha ari aamwi na eswe, kaabha atari na amanaga, ka wone emisango jaaye, ejibha jitari na obhugajuro.” 11 Omuunu unu kaayika kutyo, asombookerwe ati, jinu echibhakaamira omwanya gunu chiri kura na emwe, nijo jinu chirikora omwanya gunu chiribhaga chiri aamwi na emwe.
12 Eswe chitakuregeeja okwituura mu‑chise chimwi, amwi okwiringʼaanya na abhaanu bhanu abheekondya abheene. Abheene ni bhamuumu, kwa okubha abheekora wuti niyo indengo ya okwirengera abheene kwa abheene na okwiringʼaanya abheene kwa abheene. 13 Nawe eswe, chitakwikuuya okukira indengo ya emirimu jinu chiyaaywe. Chiriikuuya era inguru ya emirimu jinu Nyamuwanga achiyaaye. Emirimu ejo, nijo jinu echikora noorwo kw‑imwe. 14 Chitakwikuuya okukira indengo ya omurimu gweswe, rwa kutyo chaakakorere araabha chitaakakingire kw‑imwe. Tari eswe, chaariga chiri bha okwamba okubhareetera Emisango ja Ekisi inguru ya Kirisito. 15 Ka wone chitakwikuuya inguru ya omurimu gwa abhaanu abhandi, omurimu gunu eswe ꞉chitaayaaywe. Tari echiiyikanya ati, rwa kutyo eriikirisya ryemwe erigenderera okukura, nikwo kutyo omurimu gweswe agati yeemwe guribhaga nigwiyongesya. 16 Awo niwo echitura okuraasya Emisango ja Ekisi mu‑bhyaro ebhindi kura na emwe, enu omusango ogwo guchaariga okuraasibhwa‑mo. Kutyo, chitariikuuya inguru ya omurimu gunu gukorerwe na abhaanu abhandi mu‑mbaara ejindi. 17 Jikaamirwe mu‑Bhikaame Ebhyeru ati, “Omuunu woonewoone unu keekuuya, eekuuye inguru ya Raatabhugenyi.”a 18 Obhugajuro bhwagwo ni ati, omuunu woonewoone unu keekondya omwene atakwikirisibhwa, tari unu Raatabhugenyi kaamukuuya, niwe keekirisibhwa.