Obhusakisi ku‑bheekirisya bha Yerusareemu
9
1 Woori bhutari‑wo obhukene bhwa okubhakaamira rindi, inguru ya obhusakisi bhwemwe ku‑bheekirisya bha Yerusareemu, 2 okubha nimenyere ati, muri na omwoyo gwa okusakira abhandi. Nikwo okukora eniikuuya inguru yeemwe ku‑bhaanu bha Makedooniya, nimbabhwiraga ati, emwe abhaanu bha mw‑ikanisa rya mu‑mukoowa gwa Akaaya, ꞉mwemariiriiye okusoosya okwambira omuguuga gunu guturire. Okwikomeesya kwemwe okwo, kukorere abhaanu bhaafu agati yeebhwe okubha na omwoyo gwa okusoosya. 3 Mbe, enituma abhayiri bheeswe bhanu mu‑riikirisya, korereki mweresye abhweru ati chimari ꞉mwemariiriiye okusoosya, rwa kutyo ꞉naabhwiriiye abhaanu bha Makedooniya. Nitakwenda emisango jinu ꞉neekuuyisiisye inguru yeemwe, jibhonekane ati jitari na obhugajuro. 4 Araabha nikaaja kw‑imwe eyo aamwi na Abhamakedooniya abhandi na okusongʼana ati muchaari okwimaririra, awo niwo omubha muchiswasiisye inguru ya obhwiyikanyo bhweswe kw‑imwe. Ka wone, emwe muribha na jiswaro jinyatatogorwa. 5 Kurwa ejo, naarora ati ni kisi nisabhwe abhayiri bheeswe bhanu mu‑riikirisya, bhatangate okuuja kw‑imwe eyo, korereki bhakumanye ebhiinu bhinu ꞉mwaragire okusoosya. Ku‑njira eyo, muribhaga musoosisye kwa kwenda, kutari mu‑kusinyirisibhwa.Okusoosya kwa mwoyo gwa rikonderwa
6 Mwichuke omusango gunu ati, “Omuunu unu kaayamba ebhitooto, kaagesa ebhitooto, na unu kaayamba ebhyafu, kaagesa ebhyafu.” 7 Bhuri muunu asoosye rwa kutyo aramuuye mu‑mwoyo gwaye, aasiga okusoosya kwa obhusurumbaaye noorwo kwa okusinyiirisibhwa, kwa okubha Nyamuwanga keenda omuunu unu kaasoosya akondeeywe. 8 Nyamuwanga kaatura okubhayaana amabhando okukira bhinu omukena, korereki omwanya gwone, mubhe na ebhiinu bhyone bhinu omukena, ka wone mubhe abhaanu bha okukora emyafu ja ekisi ja okusakira abhandi. 9 Jiri rwa kutyo jikaamirwe mu‑Bhikaame Ebhyeru ati,
“Asoosiisye kwa obhufura bhwone, okuyaana abhataka,
echigongo chaaye ni cha siku joone.”a
10 Nyamuwanga niwe kaayaana omuunu jimbibho ja okuyamba na ebhiryo. Nyabhuriko, aribhayaana jimbibho ja okuyamba na okujoongesya. Nikwo okwayika ati, aribhayaana na okubhoongesya omwoyo gwa obhufura. 11 Aribhayaana obhuniibhi ku‑joone, korereki mubhe abhafura siku joone. Awo niwo abhaanu bharisiima Nyamuwanga, inguru ya ebhiinu bhinu chiribhasirira okusooka kw‑imwe. 12 Jiribha kutyo, kwa okubha omurimu gwa obhufura gunu omukora, gutakusakira abheekirisya bha Yerusareemu bhanu bhakeeyeeywe era, tari ogukora abhaanu bhaafu bhasiime Nyamuwanga muno. 13 Bharikusya Nyamuwanga, kwa okubha omurimu gwemwe ogweresya ati, muri bhakosi bha ekisi. Ka wone bharimukusya ku‑songa ya obhugayuki bhwemwe mu‑kwikirisya Emisango ja Ekisi inguru ya Kirisito, na ku‑songa ya obhufura bhwemwe bhwa okubhasakira na okusakira abhandi bhoone. 14 Bharibhaga nibhabhasabhirwa ku‑Nyamuwanga kwa eryenda ryafu, ku‑songa ya obhwitiriranya bhwafu bhunu Nyamuwanga abhayaaye emwe. 15 Chisiimega Nyamuwanga ku‑chiyaanwa echinene cha okuruguusya, chinu achiyaaye.