Omwoyo gwa okusakira abhandi
8
1 Woori abhayiri bheeswe mu‑riikirisya, echeenda chibhabhwire kutyo obhwitiriranya bhwa Nyamuwanga ꞉bhwakorere emirimu mu‑bhaanu bha mu‑makanisa ga mu‑mukoowa gwa Makedooniya. 2 Abhaanu abho ni bhataka muno, ka wone ꞉bhaaregeejerwe kwa ebhinyaasyo bhyafu, nawe bhaariga bhari na rikonderwa enene rinu ꞉ryakorere nibhabha bhafura muno mu‑kusoosya ebhiinu bhyebhwe. 3 Enibhasoosisya obhubhambaasi ati, ꞉bhaasoosiisye ebhiinu bhyafu, okukira obhuturo bhwebhwe, ka wone ꞉bhaasoosiisye mu‑kwenda kwebhwe abheene. 4 Bhaariga nibhachiirembeeresya muno ati, bhabhone omwanya gwa okusangira ku‑mirimu ja okusakira abheekirisya bha Yerusareemu. 5 ꞉Bhaakorere kutyo okukira kutyo chaariga nichiiyikanya. ꞉Bheesoosiisye okwamba ku‑Raatabhugenyi, ka wone nibheesoosya kw‑iswe, rwa kutyo Nyamuwanga keenda. 6 Kurwa ejo, ꞉cheerembeeresiisye Tiito ati, aaje abhasakire okumara omurimu gwa obhwitiriranya ogwo, kwa okubha niwe ꞉aagwambisiisye kw‑imwe. 7 Muri bhaniibhi mu‑misango joone. Muri na eriikirisya, obhuturo bhwa okwayika kisi, obhumenyi, obhwikomeesya bhwafu bhwa okukora ja ekisi, na eryenda ryemwe kw‑iswe.a Mbe, nyabhuriko, mubhe abhaniibhi ku‑mirimu ja obhwitiriranya ejo, ja okusakira abhandi.8 Nitakwayika ejo korereki nibharagirire, tari eneenda okurora araabha eryenda ryemwe ni rya echimari, kwa okweresya kutyo abhandi abheekomeesya okusakira. 9 Emwe mumenyere obhwitiriranya bhwa Raatabhugenyi weeswe Yeesu Kirisito. Noorwo kutyo aariga ari muniibhi, nawe ꞉eekorere wuti omutaka ku‑songa yeemwe, korereki okutura ku‑bhutaka bhwaye, emwe mubhe abhaniibhi. 10 Woori, inguru ya obhusoroosya obhwo, enibhatongera gunu gwiyire kw‑imwe. Omuguuga gunu guturire,b mwariga muri bha okwamba okweresya obhwira bhwa okusoroosya na bha okwamba okukora kutyo. 11 Woori, mukuumisye omurimu ogwo mu‑bhwira bhuryabhurya bhunu mwariga muri nabhwo omwanya gunu ꞉mweendere okugwamba, mwisoosye okuruubhana na bhinu muri nabhyo. 12 Araabha omuunu ari na omwoyo gwa okusakira, Nyamuwanga kaaramira bhuri chiinu chinu omuunu kaasoosya okuruubhana na bhinu ari nabhyo. Nyamuwanga atakutonga echiinu chinu omuunu atari nacho. 13 Obhukarariiye bhwani, bhutari ati, emwe munyaake na omugugu gwa okusakira abhandi, korereki abheene bhabhe‑mo kisi, 14 tari eneenda mwinganirire. Omwanya gunu muri na ebhiinu bhyafu. Kurwa ejo, musakire bhanu bhatari na ebhiinu, korereki abheene wone omwanya gunu bharibhaga bhari na ebhiinu bhyafu, bharibhasakira omwanya gunu murigerukirwa echiinu. Mu‑kukora kutyo, muribhaga mwinganiriiye, 15 rwa kutyo jikaamirwe mu‑Bhikaame Ebhyeru ati, “Unu ꞉aakofiifye bhyafu, ꞉ataasaagiisye, na unu ꞉aakofiifye bhitooto, ꞉ataakeeyeeywe.”c
Tiito na abheejaabho abhatumwa Koriito
16 Enisiima Nyamuwanga unu ayaaye Tiito omwoyo gwa okubhasakira, rwa gunu anye wone niri nagwo. 17 Enaayika kutyo, kwa okubha omwanya gunu ꞉chaasabhirwe Tiito aaje kw‑imwe, ꞉eekirisiisye. Ka wone, ꞉aaramuuye okuuja kw‑imwe mu‑kwenda kwaye omwene, ari na obhwira obhunene bhwa okubhasakira. 18 Aamwi na Tiito, echituma wone na omuyiri weeswe owundi mu‑riikirisya, unu jikuma jaaye ku‑mirimu ja okuraasya Emisango ja Ekisi jiswireene mu‑makanisa goone. 19 Okukira‑wo ogwo, amakanisa gaasora omuyiri oyo mu‑riikirisya korereki aruubhane na eswe omwanya gunu echisira obhusoroosya ku‑bheekirisya bha Yerusareemu. Emirimu ja obhwitiriranya ejo ejikora Raatabhugenyi akusibhwe, ka wone ejeeresya kutyo chiri na omwoyo gwa okusakira abhandi.
20 Chitakwenda okuyaanwa amasoro na omuunu woonewoone inguru ya obhwimereegururu bhweswe bhwa okusira ebhiinu bhinu abhaanu bhasoosiisye mu‑bhufura bhwebhwe. 21 Obhukarariiye bhweswe, ni kukora jinu jiri ja ekisi, jitari imbere ya Raatabhugenyi era, nawe na imbere ya abhaanu wone.
22 Echituma wone omuyiri weeswe owundi mu‑riikirisya, aruubhane aamwi na bha Tiito. Omuyiri weeswe oyo, ꞉chaamurorere kwiya kaafu ku‑misango myafumyafu ati, ari na obhwira bhunene bhwa okukora emirimu, na woori ari na obhwira bhunene muno okukira bhunu aariga ari nabhwo ku‑bhwambiro, kwa okubha ari na obhwiyikanyo obhunene kw‑imwe. 23 Woori araabha omuunu keenda okusombookerwa emisango inguru ya Tiito, omwene ni mukosi weejaasu, unu kaakora emirimu aamwi na anye ku‑njira ya okubhasakira emwe. Araabha omuunu keenda okusombookerwa emisango inguru ya abhandi bhanu abhaaja aamwi nage, abho ni bhayiri bheeswe mu‑riikirisya, bhatumirwe na amakanisa, abheene wone abhakusya Kirisito. 24 Kurwa ejo, mweresye abhaanu abho eryenda ryemwe, korereki amakanisa gamenye ati, chiri na isonga ya okwikuuya inguru yeemwe.