7
1 Woori, abheendwa bhaani, Nyamuwanga ꞉aaragire okuchiyaana ejo joone. Kurwa ejo, chiiyesye kwa okusigana na obhujabhi bhwone, bhwa echinyamubhiri na obhwa echinyamwoyo. Chibhe abheeru ku‑misango joone, ku‑njira ya okuramya Nyamuwanga.Rikonderwa rya Pawuro
2 Muchiyaane omwanya mu‑myoyo jeemwe, kwa okubha ꞉chitaakayiiye omuunu woonewoone, ꞉chitaayabhyisye woonewoone, ka wone ꞉chitaajigire woonewoone. 3 Nitakwayika emisango ejo okubharamura, kwa okubha naamarire okwayika ati, emwe muri mu‑myoyo jeeswe, chiri aamwi na emwe noorwo ikabha ati ni kurama aamwi, amwi ati ni kufwa aamwi. 4 Enaayika na emwe kwa ebhaasi nene, ka wone eniikuuya muno inguru yeemwe. Mwanfungʼamya muno na mwakora nibhe na rikonderwa enene, noorwo kutyo echinyaasibhwa muno.
5 Noorwo omwanya gunu ꞉chaakingire Makedooniya erya, ꞉chitaabhwene omwanya gwa okusiiriika wuri, kwa okubha chaariga chiri na ebhinyaasyo mbaara joone. Anja ryariga riri‑wo riremo, mu‑myoyo bhuri‑mo obhuubha. 6 Nawe Nyamuwanga unu kaafungʼamya abha obhusurumbaaye, ꞉aachifungʼamiisye mu‑kuuja kwa Tiito. 7 Jitari ati, ꞉chaafungʼamiibhwe mu‑kuuja kwa Tiito era, tari ꞉chaafungʼamiibhwe noorwo okuruubhana na kutyo ꞉mwamufungʼamiisye. ꞉Aachibhwiriiye kutyo omwigomba okundora, kutyo omusurumbara na okunnyaakirira. Ejo jaankora nikonderwe muno.
8 Noorwo kutyo inyarubha inu ꞉naabhakaamiiye ꞉yaabhasurumbasiisye, nitakurora ati ꞉naakorere kubhiibhi. Ni chimari ati, ku‑bhwambiro ꞉naarorere ati ꞉naakorere kubhiibhi, kwa okubha nimenyere ati inyarubha eyo ꞉yaabhasurumbasiisye, kasinjeeke era. 9 Nawe woori, enikonderwa ati ꞉naakaamire inyarubha irya, itari kwa okubha ꞉mwasurumbasiibhwe, tari kwa okubha obhusurumbaaye bhwemwe, ꞉bhwabhakorere mute ebhibhiibhi bhyemwe. ꞉Mwasurumbasiibhwe rwa kutyo Nyamuwanga ꞉aakarariiye, kurwa ejo, eswe ꞉chitaabhawutaasisye ku‑njira yooneyoone irya. 10 Obhusurumbaaye bhunu obhusookana na obhukarariiye bhwa Nyamuwanga, obhukora abhaanu bhate ebhibhiibhi bhyebhwe. Okuta okwo, kutari musango gwa okuruguusya, kwa okubha okureeta obhuchungusi. Nawe obhusurumbaaye bhunu obhusookana na emisango ja echaaro, obhureeta orufu. 11 Ringira kutyo obhusurumbaaye obhwo Nyamuwanga ꞉aakarariiye, obhubhareterera omuriiro omunene! Bhwareterera obhwira bhunene bhwa okukora jinu jiiyire, bhwabhareterera okwibhagira ku‑jinu omukora. Ka wone bhwabhakora mubhiyirirwe ebhibhiibhi, bhwabhakora muramye Nyamuwanga, okwigomba okundora, na okwikomeesya okurora ati unu ꞉aakayire, aaramira ebhitiibha bhyaye. Ku‑njira ejo joone, mweresya ati mutari na echikayo ku‑misango ejo.
12 Mbe, noorwo kutyo ꞉naabhakaamiiye inyarubha irya, ꞉nitaakaamire inguru ya omuunu unu ꞉aakoreeye owundi kubhiibhi, amwi inguru ya unu ꞉aakoreeywe kubhiibhi. Tari ꞉neendere mwirore emwe abheene imbere ya Nyamuwanga, kutyo omwisoosya inguru yeeswe. 13 Ku‑gwo, mwachifungʼamya. Okukira‑wo ogwo, ꞉chaakondeeywe muno omwanya gunu ꞉chaarorere Tiito kutyo aariga ˆnaakondererwa, kwa okubha emwe bhoone ꞉mwakondisiisye omwoyo gwaye. 14 Okubha jikabheeye ati, ꞉naabhakuuyiisye muno imbere yaaye ku‑musango gwonegwone, ꞉nitaaswasiibhwe. Joone jinu chaariga nichibhabhwira jaariga jiri ja chimari. Nyabhuriko, jinu ꞉chaabhakuuyiisye imbere ya Tiito, wone jaabhonekana ati ni ja chimari. 15 Eryenda rya Tiito kw‑imwe, erigenderera okwiyongesya chimwichimwi, omwanya gunu keechuka obhugayuki bhwemwe bhwone na kutyo ꞉mwamuramiiye kwa echibharo na mu‑kuyarara. 16 Enikonderwa muno, okubha woori enitura okubheeyikanya kata.