6
1 Woori, kwa okubha echikora emirimu aamwi na Nyamuwanga, echibheerembeeresya ati, obhwitiriranya bhwa Nyamuwanga bhunu muramiiye, mwasiga okubhusiga bhubhure kutyo era. 2 Okubha Nyamuwanga kaayika mu‑Bhikaame Ebhyeru ati,“Omwanya gunu ꞉gweekirisiibhwe, ꞉naakutegeresiisye,
orusuku rwa obhuchungusi, ꞉naakusakiiye.”a
Mbe tegeresya, omwanya gunu gwikirisiibhwe nigwo gunu, orusuku rwa obhuchungusi nirwo runu!
Okwigumiirisya ku‑mirimu ja Nyamuwanga
3 Chitakukorera omuunu woonewoone omusango gwonegwone gunu ogumureterera okwikuujura, korereki obhukosi bhweswe bhwasiga okwayikwa kubhiibhi. 4 Tari, echeeresya mu‑misango joone ati, eswe chiri bhakosi bha Nyamuwanga. Echiigumiirisya muno mu‑bhinyaasyo, mu‑nyaako na mu‑bhukomeeye, 5 mu‑kubhumwa, mu‑kubhoywa mw‑ibhoyero, na mu‑kuworoomerwa na ebhise bhya abhaanu. Echikora emirimu emisito, echitaamibhwa okuwongera na echisaraarira. 6 Ka wone echiibhuurisya okubha abhakosi bha Nyamuwanga mu‑bhwiyikanyibhwa, mu‑bhumenyi, mu‑bhwigumiirisya na mu‑bhwa ekisi, mu‑kutangasibhwa na Mwoyo Mweru, mu‑ryenda rya echimari, 7 na mu‑kuraasya omusango gwa echimari. Echikora ejo joone, ku‑bhuturo bhwa Nyamuwanga. Obhurengeresi nibhyo ebhigwato bhyeswe, orubhaara rwa ebhuryo na rwa ebhumoosi.b 8 Eswe echikorera emirimu Nyamuwanga, kwa okuyaanwa echibharo amwi okugaywa, kwa okukuuywa amwi okwayikwa kubhiibhi na abhaanu. Echibhonekana wuti chiri bhabheeyi, nawe echaayika echimari. 9 Echibhonekana wuti chitakumenyekana, nawe echimenyekana muno. Echibhonekana wuti echifwa, nawe chiri bhaanga! Echibhumwa muno, nawe chitakwitwa. 10 Ka wone echibhonekana wuti chisurumbaaye, nawe echikondererwa omwanya gwone. Echibhonekana wuti chiri bhataka, nawe chiniibhiisye bhaafu. Echibhonekana wuti chitari na echiinu choonechoone, nawe chiri na ebhiinu bhyone.
11 Emwe Abhakoriito, chaayika na emwe abhwerubhweru, kwa okubha emyoyo jeeswe ni myeru kw‑imwe. 12 Eswe chichaariga okusiga okubheenda, tari emwe neemwe musigire okucheenda eswe. 13 Woori enaayika na emwe wuti enaayika na abhaana ati, mucheendega mu‑myoyo emyeru, rwa kutyo eswe wone chibheendere.
Okusangira aamwi na abhaanu bhanu bhatari bheekirisya
14 Mwasiga okusangira aamwi na abhaanu bhanu bhatari bheekirisya. Angu, obhurengeresi na obhujabhi, chimari ebhitura okuungwana? Obhweru na echisuute, ebhitura okusaasikana aamwi? 15 Ka wone Kirisito na Bheriyaari,c abhatura kutiki okuungwana? Omwikirisya na unu atari mwikirisya, abhatura okusangira aamwi chinu ki? 16 Bhuri‑wo obhungwani ki agati ya riyekaru rya Nyamuwanga na amasusano ga amasambwa?d Eswe chiri riyekaru rya Nyamuwanga omuwanga!e Jiri rwa kutyo Nyamuwanga omwene ꞉aayikire ati,
“Niriikara aamwi nabho na okuribhata agati yeebhwe.
Niribhaga Nyamuwanga weebhwe, abheene wone bharibhaga abhaanu bhaani.”f
17 Kurwa ejo, Raatabhugenyi wone ꞉aayikire ati,
“Musooke agati yeebhwe, mwawukane nabho.
Mwasiga okukuunʼya echiinu echijabhi,
niwo anye niribharamira.”g
18 Ka wone ꞉aayikire ati,
“Niribha Esomwana,
na emwe muribha abhaana bhaani bha echirume na abha echigasi.
Nikwo kutyo kaayika Raatabhugenyi Nyamuwanga owa obhuturo bhwone!”h