5
1 Emibhiri jeeswe ja ku‑chaaro anu, jiri rwa ebhiwuuna. Nawe chimenyere ati, bhikakambuka, Nyamuwanga arichiyaana jinju ja akajaanende mu‑rwire jinu jitakumbakwa na abhaanu. 2 Mu‑nju jeeswe ja woori echaasibhwa, kurwa ejo, echiigomba muno okuyaanwa jinju jeeswe jinyaaya, nikwo okwayika ati okufwafibhwa emibhiri jeeswe emiyaaya jinu ejisooka mu‑rwire. 3 Omwanya gunu chirifwafibhwa emibhiri miyaaya, chitaribhonekana wuti chiri tuyu. 4 Omwanya gunu chichaari mu‑bhiwuuna bhyeswe, echaasibhwa kwa okubha emisango myafu ejichisitoyera. Jitari ati echeenda okufuura emibhiri jinu ejifwa, tari ati echeenda okufwafibhwa emibhiri jinu jitakufwa, korereki jimire emibhiri jinu ejifwa. 5 Nyamuwanga niwe achichumachumire inguru ya emisango ejo, na achiyaaye Mwoyo waaye, korereki abhe echigwatirisyo cha joone jinu Nyamuwanga arichiyaana.6 Kurwa ejo, omwanya gwone chiri na obhwiyikanyo, noorwo kutyo chimenyere ati, omwanya gunu chiikaaye mu‑mibhiri jinu, echibha chiri kura na Raatabhugenyi. 7 Chiikaaye ku‑njira ya eriikirisya, jitari ku‑njira ya okurora kwa ameeso. 8 Chimari chiri na obhwiyikanyo, ka wone chikeendere noorwo okufuruka okusooka mu‑bhwikaro bhunu, chifurukire ku‑Raatabhugenyi. 9 Kurwa ejo, chiikare mu‑mibhiri jinu, amwi chiikare ku‑Raatabhugenyi, obhukarariiye bhweswe ni kumukondisya. 10 Nikwo kutyo, kwa okubha eswe bhoone chiriimereeguru imbere ya echitebhe cha indamu cha Kirisito, korereki bhuri umwi, ayaanwe omuyeero okuruubhana na kutyo ꞉aakorere ku‑chaaro kunu, jibhe ja kisi amwi mibhiibhi.
Okugwatanya abhaanu
11 Woori, kwa okubha chimenyere okuyaana Raatabhugenyi echibharo, echiikomeesya okukongya abhaanu, korereki bhamwikirisye. Nyamuwanga kaamenya kisi kutyo chiri, anye eniiyikanya ati emwe omuchisombookerwa kisi mu‑mitima jeemwe. 12 Jitari ati echiregeeja okwikondya rindi kw‑imwe, tari cheenda okubhayaana omwanya gwa okwikuuya inguru yeeswe. Echeenda mubhe na obhuturo bhwa okusubhya abhaanu bhanu abheekuuyisya emisango jinu ejibhonekana, nawe jitari jinu jiri mu‑myoyo jeebhwe. 13 Araabha echibhonekana wuti chisarire, ni inguru ya Nyamuwanga, araabha obhwenge bhweswe bhukobhere, ni inguru yeemwe. 14 Eryenda rya Kirisito erichisinyiirisya, okubha chimenyere ati omuunu umwi ꞉aafuuwe inguru ya abhaanu bhoone, obhugajuro bhwagwo ni ati, abhaanu bhoone ꞉bhaafuuwe. 15 Omuunu oyo ꞉aafuuwe inguru ya abhaanu bhoone, korereki bhanu bharamire, bhasige okurama inguru yeebhwe abheene, tari bharame inguru ya unu ꞉aafuuwe na okusuuruka inguru yeebhwe.
16 Kurwa ejo okwambira woori, chitakwiganirisya rindi obhurambu bhwa omuunu woonewoone ku‑njira ya echinyamuunu. Noorwo kutyo omwanya omurebhe chaariga nichiiganirisya Kirisito ku‑njira eyo, nawe woori chitakukora kutyo rindi. 17 Omuunu woonewoone unu ari na obhumwi na Kirisito, aabha echibhumbwa echiyaaya,a emisango ja kara jaayitingʼeene, woori ni miyaaya! 18 Ejo joone ejisooka ku‑Nyamuwanga. Achigwatanyiisye ku‑mwene ku‑njira ya Kirisito.b Eswe achiyaaye emirimu ja okuraasya inguru ya obhugwatanyi obhwo. 19 Nikwo okwayika ati, okutura ku‑Kirisito, Nyamuwanga aariga ˆnaagwatanya abhaanu ku‑mwene okubhabharira ebhibhiibhi bhyebhwe wuri. Eswe wone chiyaaywe emirimu ja okuraasisya abhaanu emisango ja obhugwatanyi obhwo.
20 Mbe, Kirisito achitumire okukora emirimu jaaye, na okutura kw‑iswe Nyamuwanga keerembeeresya abhaanu ati, bhagwatanyibhwe nage. Echibhasabhwa inguru ya Kirisito ati, mugwatanyibhwe na Nyamuwanga. 21 Kirisito aariga atari na echibhiibhi choonechoone, nawe Nyamuwanga ꞉aamubharire rwa owa ebhibhiibhi inguru yeeswe, korereki eswe chibharwe okubha abharengeresi imbere ya Nyamuwanga okutura ku‑Kirisito.