Amanaga ga Nyamuwanga mu‑bhiinu bhya rimoga
4
1 Mbe, kwa okubha Nyamuwanga achiyaaye obhukosi bhunu ku‑chigongo chaaye, chitakufwa omutima wuri. 2 Chiremere kata okukora emisango ja imbisike na eja jiswaro. Chitakujiga abhaanu, noorwo chitakusaasya omusango gwa Nyamuwanga na orubheeyi. Tari, echiimenyegesya mu‑kwayika echimari abhwerubhweru, korereki abhaanu bhoone bhamenye mu‑mitima jeebhwe ati, eswe chiri bhaanu bha echimari imbere ya Nyamuwanga. 3 Nawe noorwo araabha Emisango ja Ekisi jinu echiraasya jiswikiiywe na echitambaara, jisige okumenyekana, ejibha jiswikiiywe era ku‑bhanu abhabhura. 4 Abhaanu abho, bhatakwikirisya Yeesu, kwa okubha Syetaani omukama wa echaaro chinu, ayingiriiye obhwenge bhwebhwe. Eyo niyo isonga abhataamibhwa okurora obhweru bhwa Emisango ja Ekisi inguru ya rikusyo rya Kirisito, omwene niwe keeresya abhwerubhweru kutyo Nyamuwanga ari. 5 Eswe chitakuraasya emisango jeeswe, tari chiraasya ati Yeesu Kirisito ni Raatabhugenyi, ka eswe chiri bhakosi bheemwe inguru yaaye. 6 Okubha Nyamuwanga ꞉aayikire ati, “Obhweru bhumirike mu‑chisuute.”a Omwene niwe kaamirika emyoyo jeeswe, na okuchiyaana obhweru bhwa okusombookerwa rikusyo ryaye, rinu eringʼarabhya mu‑bhusu bhwa Yeesu Kirisito.7 Nawe eswe bhanu chiri na echibhiikwa echo, chiri rwa ebhiinu bhya rimoga era, korereki imenyekane abhwerubhweru ati, amanaga amaafu ga okukora emirimu ejo, agasooka ku‑Nyamuwanga, na kutari kw‑iswe. 8 Echibhona ebhinyaasyo bhya bhuri mbaga, nawe chitakusimagisibhwa. Echibhona echiitimaato, nawe chitakufwa omutima. 9 Abhaanu abhachinyaasya, nawe Nyamuwanga atakucheeseranya. Echeeswa aasi, nawe chitakusingaarisibhwa. 10 Siku joone emibhiri jeeswe jiri mu‑ngʼanga ya okufwa rwa Yeesu, korereki obhuwanga bhwa Yeesu bhubhuurisibhwe ku‑mibhiri jeeswe. 11 Eswe bhanu chiri bhaanga, echiribhata na orufu omwanya gwone inguru ya Yeesu, korereki obhuwanga bhwaye, bhubhuurisibhwe ku‑mibhiri jeeswe jinu ejifwa. 12 Mbe, ku‑songa eyo, eswe chiri mu‑ngʼanga ya okufwa, nawe emwe omubhona obhuwanga.
13 Jikaamirwe mu‑Bhikaame Ebhyeru ati, “꞉Neekirisiisye Nyamuwanga, nikwo okukora ꞉naayikire.”b Nyabhuriko, eswe wone chiri na omwoyo ogwoogwo gwa eriikirisya, nikwo okukora echaayika. 14 Chimenyere ati Nyamuwanga unu ꞉aasuuruuye Raatabhugenyi Yeesu, arichisuurura eswe wone rwa kutyo ꞉aasuuruuye Yeesu. Nyamuwanga arichireeta eswe na emwe imbere yaaye omwene. 15 Emisango joone jinu echibhona, ni inguru yeemwe, korereki obhwitiriranya bhwa Nyamuwanga bhukingire abhaanu bhaafu muno, bhasiime muno Nyamuwanga. Ku‑gwo, Nyamuwanga arigenderera okukusibhwa.
Rikusyo rya akajaanende
16 Kutyo, chitakufwa omutima. Noorwo kutyo emibhiri jeeswe ejikokora, nawe mu‑myoyo jeeswe, Nyamuwanga kaachikora okubha abhayaaya siku joone. 17 Enaayika kutyo, kwa okubha ebhinyaasyo bhyeswe ni bhyangu na ni bhya kasinjeeke era. Ka wone, ebhichireetera rikusyo rya akajaanende koone. Rikusyo eryo ni ryafu muno, okukira ebhinyaasyo bhyone. 18 Kutyo, chitakuringira ebhiinu bhinu ebhibhonekana, tari bhinu bhitakubhonekana, kwa okubha bhinu ebhibhonekana ni bhya kasinjeeke era, nawe bhinu bhitakubhonekana, ni bhya akajaanende.