Abhakosi bha emirimu bha indagano inyaaya
3
1 Angu, echaamba rindi okwikondya kw‑imwe? Amwi echikenwa okubhona jinyarubha ja okwimenyesya kw‑imwe, amwi eja okusooka kw‑imwe, rwa abhaanu abhandi? 2 Emwe neemwe inyarubha yeeswe ya okuchimenyesya, inu ikaamirwe mu‑myoyo jeeswe, eyimenyekana ka wone eyisomwa na abhaanu bhoone. 3 Omweresya abhwerubhweru ati emwe muri nyarubha ya Kirisito, inu eyeeresya amatwasyo ga emirimu jinu ꞉chaakorere kw‑imwe. Inyarubha eyo, ꞉itaakaamirwe kwa obhwino, tari ꞉yaakaamirwe na Mwoyo wa Nyamuwanga omuwanga. Ka wone ꞉itaakaamirwe ku‑bhibhaara bhya amabhuyi tari ku‑bhibhaara bhinu bhiri mu‑myoyo ja abhaanu.a 4 Echaayika ejo, kwa okubha obhwo nibhwo obhwiyikanyo bhweswe bhunu chiri nabhwo ku‑Nyamuwanga okutura ku‑Kirisito. 5 Jitari ati, echiiganirisya ati echitura okukora gwonegwone ku‑bhuturo bhweswe abheene, tari bhuturo bhweswe obhusooka ku‑Nyamuwanga. 6 Omwene niwe ꞉aachiyaaye obhuturo bhwa okubha abhakosi bha indagano inyaaya.b Indagano eyo itakusookana na ebhiraagiro bhinu ꞉bhyakaamirwe, tari eyisooka ku‑Mwoyo Mweru, kwa okubha ebhiraagiro ebhireeta orufu, nawe Mwoyo Mweru kaareeta obhuwanga.
Rikusyo rya indagano inyaaya
7 Ebhiraagiro bhinu ꞉bhyakaamirwe ku‑bhibhaara bhya amabhuyi, ebhireeta orufu, nawe ꞉bhyejire na rikusyo rinu eringʼarabhya, okukingira Abhayisirayeeri nibhataamibhwa okuringira Muusa mu‑bhusu. ꞉Bhaataamiibhwe okumuringira, kwa okubha obhusu bhwaye ꞉bhwangʼarabhiisye, noorwo kutyo omwanya mufuyi okutura, orungʼarabhyo rurya nirusimirira.c Araabha obhukosi bhwa ebhiraagiro bhinu ebhireeta orufu ꞉bhwejire kwa rikusyo rwa eryo, 8 mbe woori, obhukosi bhwa Mwoyo Mweru bhutaribha na rikusyo okukira eryo? 9 Ka wone, araabha obhukosi bhunu obhukora abhaanu okuramurwa bhuri na rikusyo, obhukosi bhunu obhukora abhaanu okubha abharengeresi imbere ya Nyamuwanga, bhuribha na rikusyo enene muno! 10 Woori, rikusyo rirya rya indagano ya kara ryasoosibhwa‑wo, okuruubhana na rikusyo rya indagano inyaaya, rinu riri nene muno. 11 Araabha chinu ꞉chaasimiriiye kwa omwanya mufuyi era chiri na rikusyo, chinu chiribha‑wo akajaanende chiri na rikusyo ryafu muno.
12 Mbe, kwa okubha obhwo nibhwo obhwiyikanyo bhweswe, echikora kwa ribhaasi. 13 Eswe chitakukora rwa Muusa, unu ꞉eeswikiiye obhusu bhwaye kwa echitambaara, korereki Abhayisirayeeri bhasige okurora kutyo orungʼarabhyo rwariga nirusimirira.d 14 Nawe emyoyo jeebhwe nijikorwa okubha emikomeeye. Noorwo woori bhaakasoma Indagano ya Kara, abhataamibhwa okusombookerwa echimari, abhabha wuti bhayingirisiibhwe na echitambaara chirya. Echitambaara chirya chichaari kusoosibhwa‑wo, kwa okubha echisoosibhwa‑wo era, omwanya gunu omuunu keekirisya Kirisito. 15 Ni chimari, noorwo reero, bhuri mwanya gunu abhasoma ebhitabho bhya ebhiraagiro bhya Muusa, echitambaara echo echiswikira emyoyo jeebhwe, bhaasiga okusombookerwa echimari. 16 Nawe omuunu woonewoone unu kaayindukira Raatabhugenyi, Raatabhugenyi kaamusoosya‑mo echitambaara echo. 17 Woori, Raatabhugenyi ni Mwoyo, na anu Mwoyo wa Raatabhugenyi ari, awo niwo bhuri bhwitaage. 18 Mbe, eswe bhoone bhanu chitakuswikira obhusu kwa echitambaara, echeeresya rikusyo rya Raatabhugenyi rwa kutyo rirore eryeresya orususo. Echiyindurwa, korereki chisusane nage, okusooka mw‑ikusyo okuja mw‑ikusyo ryafu muno. Rikusyo eryo erisooka ku‑Raatabhugenyi, omwene oyo niwe Mwoyo.