2
1 Kurwa ejo, ꞉naaramuuye mu‑mutima gwani ati, ni kisi nisige okuuja kw‑imwe rindi, korereki naasiga okubhareterera obhusurumbaaye. 2 ꞉Naaramuuye kutyo, kwa okubha araabha anye nikakora emwe musurumbare, atari‑wo unu kaja okukora anye nikonderwe, tari emwe bhanu naasurumbasya! 3 Eyo niyo isonga inu ꞉yaakorere nimbakaamira ku‑nyarubha irya ati nitakubhaaja‑ko, naasiga okusurumbasibhwa na emwe, bhanu mwenderwe okunkora nikonderwe. Nimenyere chimari ati, anye nikakonderwa, emwe bhoone wone omukonderwa. 4 ꞉Naabhakaamiiye inyarubha irya, mu‑bhusurumbaaye bhwafu, nindumwaga mu‑mwoyo gwani, keenu nindiraga amasiga mogomogo. Obhukarariiye bhwani, bhwariga bhutari ati musurumbare, tari naariga nineenda mumenye kutyo nibheendere muno.Okufwira echigongo owa ebhibhiibhi
5 Woori, omuunu unu asurumbasiisye oweejaabho, ꞉ataasurumbasiisye anye era, tari ku‑rubhaara orundi asurumbasiisye na emwe bhoone. Nawe woori, nitakwenda okurandirisya omusango ogwo na okugukora gubhe omukomeeye turuturu. 6 Echitiibha chinu omuunu oyo ꞉aabhwene okusooka mu‑bhaafu kw‑imwe, chimwiyire. 7 Woori, omukenwa okumufwira echigongo na okufungʼamya omuunu oyo, korereki aasiga okusurumbara muno, okukingira okufwa omutima. 8 Kurwa ejo, enibheerembeeresya mumweresye ati mumwendere. 9 Omusango ogundi gunu ꞉gwakorere nimbakaamira inyarubha irya, gwariga guri kubharegeeja, korereki nimenye araabha mwakangayukire mu‑joone. 10 Mukafwira echigongo omuunu oyo, anye wone enimufwira echigongo. Araabha guri‑wo omusango gunu enikenwa okumufwira echigongo, ndamufwiriiye echigongo imbere ya Kirisito inguru yeemwe, 11 korereki Syetaania aasiga okuchiyiga, kwa okubha chimenyere kisi obhurigerige bhwaye.
Pawuro mu‑musi gwa Turoowa
12 Mbe, omwanya gunu ꞉naakingire mu‑musi gwa Turoowa okuraasya Emisango ja Ekisi inguru ya Kirisito, ꞉naasongeene Raatabhugenyi aanyiguriiye orwigi, korereki nikore emirimu jaaye eyo. 13 Nawe ꞉niteeyunguuywe kisi mu‑mwoyo gwani, kwa okubha ꞉nitaasongʼeene‑yo Tiito, omuyiri waani mu‑riikirisya. Kurwa ejo, nindaga abhaanu bheende eyo, ninsooka‑wo ningenda Makedooniya.
Okuraasya obhuyigi bhwa Kirisito
14 Nawe echisiima Nyamuwanga, kwa okubha kaachitangasya omwanya gwone ku‑muroobho gwa okusandabhira obhuyigi bhwa Kirisito. Ka wone kaachikora chiraasye obhumenyi bhwa emisango inguru ya Kirisito bhuri rubhaara, rwa orurango rwa ekisi kutyo oruswirana mbaara joone. 15 Nikwo kutyo jiri, kwa okubha eswe, chiri rwa orurango rwa ekisi runu Kirisito kaasoosisya Nyamuwanga. Orurango orwo, rurikingira abhaanu bhoone, bhanu abhachungurwa na bhanu abhabhura. 16 Ku‑bhaanu bhanu abhabhura, orurango orwo ni rubhiibhi, orureeta orufu. Nawe ku‑bhaanu bhanu abhachungurwa, orurango orwo ni rwa kisi, orureeta obhuwanga. Woori, niga unu kaatura okukora emirimu ejo? 17 Eswe chitari rwa abhaanu abhandi abhaafu, bhanu abharaasya omusango gwa Nyamuwanga kwa okugusuruja, korereki bheebhonere‑mo omuriiro. Tari eswe, ku‑managa ga Kirisito, echiraasya omusango gwa Nyamuwanga kwa obhwiyikanyibhwa bhwone imbere ya Nyamuwanga, kwa okubha omwene niwe ꞉aachitumire.