Inyarubha ya kabhiri ya Pawuro
ku‑Bhakoriito
Obhukeesya
1
1 Inyarubha inu, niikaamire anye Pawuro, itumwa ya Kirisito Yeesu mu‑kwenda kwa Nyamuwanga, niri aamwi na Timoteewo omuyiri weeswe mu‑riikirisya. Echikaamira emwe bhanu muri mw‑ikanisa rya Nyamuwanga mu‑musi gwa Koriito, aamwi na abheerua bhoone bha Nyamuwanga bhanu bhari mu‑mukoowa gwa Akaaya.2 Obhwitiriranya na omurembe okusooka ku‑Nyamuwanga Raata weeswe, na ku‑Raatabhugenyi Yeesu Kirisito, bhibhe aamwi na emwe.
Nyamuwanga kaafungʼamya mu‑bhinyaasyo
3 Akusibhwe Nyamuwanga, Esemwene Raatabhugenyi weeswe Yeesu Kirisito, Raata owa echigongo, ka wone niwe Nyamuwanga unu kaachifungʼamya mu‑joone. 4 Omwene kaachifungʼamya mu‑bhinyaasyo bhyeswe bhyone, korereki eswe wone chiture okufungʼamya abhandi bhanu bhari mu‑bhinyaasyo bhya bhuri mbaga, rwa kutyo eswe echifungʼamibhwa na Nyamuwanga. 5 Rwa kutyo ebhinyaasyo ebhifura kw‑iswe inguru ya Kirisito, nikwo kutyo Nyamuwanga kaagenderera okuchifungʼamya okutura ku‑Kirisito. 6 Omwanya gunu echinyaasibhwa, echinyaasibhwa inguru ya okufungʼamibhwa kwemwe na obhuchungusi bhwemwe. Ka wone, omwanya gunu eswe echifungʼamibhwa, niwo emwe wone omusimbiisibhwa. Okusimbiisibhwa okwo okukora mwigumiirisye mu‑bhinyaasyo bhiryabhirya bhinu eswe wone echinyaasibhwa. 7 Obhwiyikanyo bhweswe kw‑imwe ni bhunene, kwa okubha chimenyere ati, kutyo emwe omunyaaka rwa eswe, nikwo kutyo omufungʼamibhwa rwa eswe.
8 Abhayiri bheeswe mu‑riikirisya, echeenda mumenye kutyo ꞉chaanyaakire mu‑mukoowa gwa Asiya. Ebhinyaasyo bhinu ꞉chaabhwene, nibhichisitoyera muno, nichikingira okwiganirisya ati, chaakafuuwe. 9 Chimari ꞉cheeyunguuwe wuti chiramuuywe okwitwa. Ogwo ꞉gwakorekeene, korereki chaasiga okwiyikanya amanaga geeswe, tari chiiyikanye Nyamuwanga, unu kaasuurura abhafuuwe. 10 Omwene niwe ꞉aachiwoniisye omwanya gunu chaariga chiri mu‑ngʼanga inene ya okufwa, ka wone kaagenderera okuchiwonʼya. Eswe echiiyikanya ati omwene aribhaga ˆnaakora kutyo bhuri mwanya. 11 Emwe musakirane na eswe mu‑kuchisabhirwa ku‑Nyamuwanga. Omwene koongwa risabhwa ryemwe na okuchiyaana amabhando. Kutyo, abhaanu bhaafu bharisiima Nyamuwanga inguru yeeswe, bhaakoongwa ati, aachiyaana obhwitiriranya okuruubhana na risabhwa ryemwe.
Pawuro kaayindura obhutinge bhwaye bhwa okugenda Koriito
12 Mbe, eswe echiikuuya ku‑musango gumwi. Emitima jeeswe ejichibhambaarira ati, chiikaaye kwa obhurengeresi na okwa obhwiyikanyibhwa bhunu obhusooka ku‑Nyamuwanga. ꞉Chitaakorere kutyo okuruubhana na obhwengeeso bhwa echinyamuunu, tari ku‑bhwitiriranya bhwa Nyamuwanga. Nikwo kutyo chiikaaye ku‑chaaro anu, na chimwichimwi mu‑bhungwani bhweswe na emwe. 13 Chitakubhakaamira emisango ja imbisike, tari chibhakaamira jinu omutura okusoma na okusombookerwa abhwerubhweru. Eniiyikanya ati, omuja okuchisombookerwa kisi muno, 14 noorwo kutyo woori, omuchisombookerwa kutooto era. Omuja okuchisombookerwa abhwerubhweru ati, orusuku runu Raatabhugenyi weeswe Yeesu arisubha, emwe murikuuya inguru yeeswe, rwa kutyo eswe wone echikuuya inguru yeemwe.
15 Naariga niri na obhwiyikanyo obhwo, nikwo okukora naariga nineenda okukinga kw‑imwe eyo okwamba, korereki mubhone ribhando rya okugosorerwa na anye orwa kabhiri. 16 Naariga nineenda okutura kw‑imwe eyo, omwanya gwa okugenda mu‑mukoowa gwa Makedooniya, na omwanya gwa okusubha okusooka Makedooniya wone, korereki munsakire mu‑rugendo rwani rwa okugenda mu‑mukoowa gwa Yuudeya. 17 Angu, omwitogera ati ꞉naaramuuye okuyindura obhutinge bhwani bhwa okuuja kw‑imwe, kwa okubha niri muunu wa okuyindukayinduka? Amwi omwitogera ati enitangasibhwa na obhwiganirisya bhwani era, nikwo okukora enaayika ati, “Cha” niniiya ninaayika ati, “Wuri”?
18 Nawe woori, rwa kutyo Nyamuwanga ari mwiyikanyibhwa, jinu ꞉chaabhabhwiriiye, jaariga jitari ja omuunu okwayika ati, “Cha,” neeya ˆnaayika ati, “Wuri.” 19 Enaayika kutyo, kwa okubha Yeesu Kirisito, Omwana wa Nyamuwanga,b unu anye, Sirwano,c na Timoteewo ꞉chaamuraasiisye kw‑imwe, aariga atari muunu wa okwayika ati, “Cha,” neeya ˆnaayika ati, “Wuri.” Tari ku‑mwene oyo, omwanya gwone ni ati, “Cha.” 20 Nikwo kutyo jiri, kwa okubha joone jinu Nyamuwanga ꞉aaragire, jaakuumira ku‑Yeesu Kirisito. Nikwo okukora okutura ku‑mwene, echaayika ati, “Jibhe kutyo,” inguru ya okukusya Nyamuwanga. 21 Mbe, Nyamuwanga niwe kaachirumatanya na emwe mu‑kwikirisya Kirisito. Achisorere 22 na okuchituura‑ko orunabho kwa okuchiyaana Mwoyo Mweru mu‑myoyo jeeswe, korereki abhe echigwatirisyo cha joone jinu Nyamuwanga arichiyaana.d
23 Jinu enaayika ni ja chimari, noorwo Nyamuwanga kaamenya! ꞉Nitaasubhire kw‑imwe Koriito eyo, kwa okubha ꞉niteendere okusurumbasya emyoyo jeemwe. 24 Chinu eneenda okwayika ni ati, chitakwenda okutunga eriikirisya ryemwe, okubha murumateene mu‑riikirisya. Tari, eswe chiri bhakosi bha emirimu aamwi na emwe, inguru ya rikonderwa ryemwe.