Okurama mu‑bhweru
5
1 Emwe muri abhaana abheendwa bha Nyamuwanga, kurwa ejo, mukorega rwa kutyo omwene kaakora. 2 Murame mwendeene, nimuruubhaga echijekekanyo cha Kirisito. Okubha omwene ꞉aacheendere na okwisoosya inguru ya ebhibhiibhi bhyeswe, ˆnaabha echiyaanwa na echoogoa echa ebhirange ku‑Nyamuwanga.3 Nawe obhuromesi amwi obhujabhi bhwa bhuri mbaga, noorwo okwisigombera ebhiinu, ni bhusibhusi bhyasiga okubhubhuutwa agatigati yeemwe, kwa okubha emisango ejo, jiteeyire ku‑bheeru bha Nyamuwanga. 4 Musige wone okwayika emisango ja jiswaro, amwi okusimura emisango ja obhutaamutaamu, amwi emisango ja obhuseegu, ejo joone jitabheeyire. Nawe musiimega Nyamuwanga ku‑jinu abhakoreeye. 5 Okubha mumenyere chimwi ati, omuunu woonewoone urya unu kaakora obhuromesi, omujabhi woonewoone urya na omwigombi woonewoone urya, ataribha omuri wa omwandu mu‑bhukama bhwa Kirisito na Nyamuwanga.b Chimari, omuunu unu keesigombera ebhiinu, niwe kaaramya amasusano. 6 Mwasiga okwikirisya omuunu woonewoone okubhajiga kwa emisango ja kutyo era, okubha ebhibhiibhi ebhyo bhyone, nibhyo ebhikora risungu rya Nyamuwanga niriitika ku‑bhanyatagayuka. 7 Kurwa ejo, musige okusangira aamwi nabho ku‑misango jeebhwe ejo. 8 Okubha, omwanya gunu guturire, emwe mwariga muri chisuute, tari woori anu muri bhweru mu‑kubha na obhumwi na Raatabhugenyi. Mbe muramega rwa abhaana bha obhweru, 9 kwa okubha ritwasyo rya obhweru obhwo ni tungwa joone ja ekisi, obhurengeresi na echimari. 10 Muregeejega okwiyigira emisango jinu ejikondesya Raatabhugenyi. 11 Musigega okusangira ebhikorwa ebhibhiibhi bhya mu‑chisuute bhinu bhanyatagayuka abhakora. Akiri mubhiswerure, korereki bhibhe abhweru. 12 Okubha ebhikorwa bhinu abhakora mu‑mbisike ni swaro noorwo okubhyayika. 13 Nawe ebhiinu bhyone bhikatuurwa mu‑bhweru ebhiswerurirwa, bhikaswerurirwa, ebhyene wone ebhibha bhweru. 14 Nikwo okukora ejaayikwa ati,
“Rafya awe, unu uwongeeye.
Usuuruke okusooka mu‑bhafuuwe,
Kirisito arikungʼarabhisya obhweru.”c
15 Mbe, mukabhuke muno inguru ya kutyo muramire. Musige okurama rwa abhaanu bhanu bhatari na obhwengeeso, tari murame rwa abhaanu bhanu bhari na obhwengeeso. 16 Bhuri mwanya, mukorega ja ekisi, kwa okubha omwanya gunu abhaanu abhakora ebhibhiibhi muno. 17 Mbe, musige okubha abhataamutaamu, nawe musombookerwe okwenda kwa Raatabhugenyi. 18 Ka wone musige obhukorwa kwa okubha obhureterera obhunyamuke, tari mwijusibhwe Mwoyo Mweru, 19 nimwimbiranaga ijabhuri, jinyimbo ja okukuuya Nyamuwanga na jinyimbo ja echinyamwoyo. Omwanya ogwoogwo, mukuuyega Raatabhugenyi mu‑mitima jeemwe joone. 20 Bhuri rusuku, kw‑isiina rya Raatabhugenyi weeswe Yeesu Kirisito, musiimega Raata Nyamuwanga ku‑bhuri chiinu.
21 Bhuri wumwi weemwe orobherega oweejaabho, kwa okubha mu‑kukora kutyo, omuyaana Kirisito echibharo.
Ameeyigisyo inguru ya abhagasi na abharume
22 Emwe abhagasi, mugayukega abharume bheemwe, rwa kutyo omugayuka Raatabhugenyi weeswe.d 23 Okubha omurume niwe omutwe gwa omugasi, rwa Kirisito kutyo ari omutwe gwa rikanisa, gunu guri omubhiri gwaye, ka wone, Kirisito omwene, niwe Omuchungusi waaryo. 24 Mbe, rwa kutyo rikanisa erigayuka Kirisito, abhagasi wone kutyokutyo, abhakenwa bhagayuke abharume bheebhwe ku‑bhuri musango.
25 Emwe abharume, mwendega abhagasi bheemwe,e rwa kutyo Kirisito wone ꞉eendere rikanisa, ˆnaasoosya obhuwanga bhwaye inguru yaaryo. 26 ꞉Aakorere kutyo, korereki aryesye kwa okuryosya mu‑manji ga obhubhatiijo na ku‑njira ya omusango gwa Nyamuwanga.f 27 Isonga iri ati, eebhonere rikanisa erya rikusyo, rinu ritari‑ko esoro, noorwo ifunyo amwi echiinu choonechoone chinu echisusana rwa ebhyo. Tari ribhe ryeru rinyamburwa obhujabhi bhwonebhwone. 28 Nikwo kutyo wone, abharume abheendwa okwendaga abhagasi bheebhwe rwa emibhiri jeebhwe abheene. Omurume unu keenda omugasi waaye keeyenda omwene. 29 Okubha atari‑wo omuunu unu kaabhiyirirwa omubhiri gwaye omwene, tari kaaguriisya na okuguchumachuma, rwa kutyo Kirisito kaakorera rikanisa ryaye, 30 kwa okubha eswe chiri bhiwuga bhya omubhiri gwaye. 31 “Ku‑songa eyo, omumura arisiga esemwene na nyiramwene, arigwatana na omugasi waaye, abho ku‑bhubhiri bhwebhwe bharibha omubhiri gumwi.”g 32 Imbisike eyo ikomeeye turuturu, nawe anye enisimura inguru ya Kirisito na rikanisa.
33 Mbe, enibhwira emwe bhoone ati, bhuri murume eende omugasi waaye rwa kutyo keeyenda omwene, na bhuri mugasi ni bhusibhusi ayaane omurume waaye echibharo.