Obhumwi ku‑mubhiri gwa Kirisito
4
1 Kurwa ejo, anye unu niri mubhoywa inguru ya obhukosi bhwani ku‑Raatabhugenyi, enibheerembeeresya ati, murame ku‑njira inu iiyire obhubhirikisi bhunu Nyamuwanga abhabhirikiriiye. 2 Mwikarega mu‑bhwikeeya bhwone na mu‑bhworooro, mwigumiirisyanyega na okwendana bhuri muunu na oweejaabho. 3 Mukomeere okurinda obhumwi bhunu Mwoyo Mweru kaabhayaana. Omurembe gubhe rwa orugoye runu orubhabhoya aamwi. 4 Guri‑wo omubhiri gumwi, ari‑wo Mwoyo Mweru umwi, rwa kutyo mwabhirikiiywe mubhe na obhwiyikanyo bhumwi bhunu Nyamuwanga achibhirikiriiye. 5 Ari‑wo Raatabhugenyi umwi era, eriikirisya ryeswe ni rimwi na obhubhatiijo bhweswe ni bhumwi. 6 Ari‑wo Nyamuwanga umwi era. Omwene oyo, niwe Raata wa abhaanu bhaaye bhoone, niwe omutungi inguru ya bhyone, kaakora emirimu jaaye okutura ku‑bhoone na kaarama mu‑bhoone.7 Nawe bhuri wumwi weeswe, ayaaywe obhwitiriranya okwingana na indengo ya echiyaanwa cha Kirisito kutyo chiri. 8 Nikwo okukora, Ebhikaame Ebhyeru ebhyayika ati,
“Ejire aariinya inguru,
꞉aagwatire abhasoko,
ˆnaayaana abhaanu ebhiyaanwa.”a
9 Mbe, omusango ogwo ati, “꞉Aariinyire inguru,” obhugajuro bhwagwo niki? Nikwo okwayika ati, omwene wone ꞉eekire emwaro muno ku‑chaaro anu. 10 Omwene oyo, unu ꞉eekire emwaro muno, oyooyo niwe wone ꞉aariinyire inguru okukira orwire rwone, korereki eejure mu‑bhiinu bhyone bhinu bhiri mu‑rwire na mu‑chaaro. 11 Omwene niwe ꞉aawuuwe abhaanu abhandi okubha jitumwa, abhandi abharagi, abhandi abharaasya, abhandi abhareefi na abheeyigisya. 12 ꞉Aabhateeye‑wo bhakore abheeru bha Nyamuwanga bhabhe bhatengeejere inguru ya emirimu ja obhukosi, korereki rikanisa rya Kirisito ryumbakwe, eryo nigwo omubhiri gwaye. 13 Obhukosi obhwo, bhurigenderera okukingira eswe bhoone, chigwatanyibhwe mu‑riikirisya ryeswe na okusombookerwa kisi Omwana wa Nyamuwanga. Niwo chirirumatana na chirikuumira na okubha rwa kutyo Kirisito ari.
14 Mbe, chitaribha rindi rwa abhaana abharera, nichiyeemusibhwa na okugegwa enu na eyi na omuyaga gwa ameeyigisyo ga orubheeyi. Ameeyigisyo ago, ageeyigisibhwa mu‑bhurigerige na obhwengeeso bhwa abhaanu, bhanu abheetemeeka ja orubheeyi. 15 Nawe, chibhwiranega na okukora echimari mu‑ryenda, echikura mu‑bhuri musango na okubha rwa Kirisito unu ari omutwe. 16 Kirisito niwe kaagwatanya omubhiri gwone aamwi na omubhiri gwone ogumbakwa ku‑bhusakisi bhwa ebhiwuga ebhindi. Omwanya gunu bhuri chungo cha omubhiri echikora omurimu gwacho kisi, omubhiri gwone ogukura na bhuri chungo echeendana na echeejabho.
Obhurame bhwa kara na obhuyaaya
17 Mbe, enibhakengya na okubharagirira kw‑isiina rya Raatabhugenyi ati, okwambira woori musige okurama rwa abhaanu bhanu bhatakumenya Nyamuwanga kutyo bharamire mu‑bhwiganirisya obhubhiibhi. 18 Obhusombookerwa bhwebhwe bhuri‑mo echisuute, bhakindikirwe kura okusooka ku‑bhuwanga bhwa Nyamuwanga, ku‑songa ya obhumuumu bhunu bhubhari‑mo okuruubhana na obhukomeeye bhwa emyoyo jeebhwe. 19 Obhwengeeso bhwebhwe bhukabhire, bhatakwiswara okukora emisango emijabhi, abheeyingisya mu‑rukubho na abharigira obhujabhi bhwa bhuri mbaga.
20 Nawe emwe ꞉muteeyigiiye kutyo inguru ya Kirisito. 21 Enimenya chimari ati, ꞉mwoonguuwe ameeyigisyo inguru yaaye na okwiyigisibhwa kisikisi, kutyo echimari chiri mu‑Kirisito. 22 ꞉Mweeyigisiibhwe okufuura jitungwa jeemwe jimbiibhi ja obhusimukwa, bhumuunu bhwemwe bhwa kara, bhunu obhunyamurwa na obhurigire bhwabho bhwa okujiga. 23 ꞉Mweeyigisiibhwe mwikirisisye Mwoyo Mweru abhakore abhayaaya mu‑bhwiganirisya bhwemwe. 24 Ka wone, mufware bhumuunu obhuyaaya, kwa okubha ꞉mwabhumbirwe okubha rwa Nyamuwanga, mu‑bhurengeresi na mu‑mutima omweru. Ejo ejisooka mu‑chimari.
Obhwisombooro bhwa obhurame obhuyaaya
25 Mbe, musige chimwi okubhwirana orubheeyi, mubhwiranega echimari bhuri muunu na oweejaabho, okubha bhuri owumwi weeswe ni chiwuga ku‑weejaabho. 26 Mukabhiyirwa mutaja okukora echibhiibhi,b noorwo risuubha risige okugwa, risungu richaari okubheeka. 27 Musige okuyaana Syetaani omwanya gwa okubharegeeja, korereki mukore ebhibhiibhi. 28 Omwifi asige okugenderera okwibha, nawe akiri afurubhende, akore emirimu ja okwibhusya‑mo kwa amabhoko gaaye, korereki abhone echiinu cha okuyaana‑ko owa obhukene.
29 Omusango gwonegwone omujabhi gusige okusooka mu‑kanwa keemwe, tari gwa ekisi gunu gwiyire okukomeesya bhanu bhari na obhukene, korereki bhanu abhaguungwa bhayaanwe obhwitiriranya. 30 Musige okusurumbasya Mwoyo Mweru wa Nyamuwanga, kwa okubha omwene oyo, niwe orunabho rwaye kw‑imwe ati, orusuku oruuja runu muryerurwa chimwi. 31 Musigane na obhururu bhwone, risungu, okubhiyirwa, inyombo, amafumo, aamwi na obhujabhi bhwone. 32 Ka wone, mukoranire ja ekisi bhuri muunu na oweejaabho, mubhe bhafura na okufwirana echigongo ebhikayo bhyemwe, rwa kutyo Nyamuwanga mu‑Kirisito abhafwiriiye echigongo ebhibhiibhi bhyemwe.