Inyarubha ya Pawuro
ku‑Bhayefeeso
Obhukeesya okusooka ku‑Pawuro
1
1 Inyarubha inu, niikaamire anye Pawuro, itumwa ya Kirisito Yeesu mu‑kwenda kwa Nyamuwanga. Enikaamira emwe abheerua bha Nyamuwanga [bhanu muri mu‑musi gwa Yefeeso]. Emwe muri abheeyikanyibhwa mu‑kubha na obhumwi na Kirisito Yeesu.2 Obhwitiriranya na omurembe okusooka ku‑Nyamuwanga Raata weeswe na ku‑Raatabhugenyi Yeesu Kirisito, bhibhe aamwi na emwe.
Amabhando ga echinyamwoyo mu‑Kirisito
3 Akusibhwe Nyamuwanga, Esemwene Raatabhugenyi weeswe Yeesu Kirisito unu achiyaaye amabhando goone ga echinyamwoyo mu‑kubha na obhumwi na Kirisito, mu‑chaaro chinyatarorwa. 4 Okubha, Nyamuwanga ꞉aachisorere chibhe na obhumwi na Kirisito, noorwo achaari okubhumba echaaro, korereki mu‑ryenda ryaye chibhe abheeru bhanyamburwa esoro mu‑meeso gaaye. 5 ꞉Aaramuuye okuchisora kutyo, chibhe abhaana bhaaye okusookerera kara, ku‑njira ya Yeesu Kirisito. ꞉Aakorere kutyo mu‑kwenda kwaye. 6 Kurwa ejo, echikuuya Nyamuwanga inguru ya rikusyo rya obhwitiriranya bhwaye, bhunu achiyaaye ku‑njira ya Omwana waaye omwendwa.b
7 Okubha ku‑sagama ya Kirisito cheeruuywe, nikwo okufwirwa echigongo ebhibhiibhi bhyeswe bhyone. Ku‑njira eyo, Nyamuwanga ꞉aacheeresiisye obhuniibhi bhwafu muno bhwa obhwitiriranya bhwaye. 8 ꞉Aachisaagirisisiisye obhwitiriranya obhwo, mu‑bhwengeeso bhwone na mu‑kusombookerwa kwone. 9 ꞉Aakorere kutyo, omwanya gunu ꞉aachisweruriiye imbisike ya okwenda kwaye, okuruubhana na obhukarariiye bhwaye okusookerera kara mu‑Kirisito. 10 Obhutinge bhwaye ni ati, aribha gwakuumira omwanya gunu omwene ateeye‑wo, niwo ariwumbanya aamwi ebhiinu bhyone bhibhe emwaro ya obhutungi bhwa Kirisito, ebhiinu bhinu bhiri mu‑rwire na bhinu bhiri mu‑chaaro.
11 Nyamuwanga kaakora bhuri chiinu okwingana na obhukarariiye bhwa okwenda kwaye. Omwene ꞉aaramuuye okuchisora eswe Abhayawudi, chibhe abhaana bhaaye okusookerera kara ku‑njira ya Kirisito. 12 Nyamuwanga aariga akarariiye ati, eswe bhanu ꞉chaatangatire okwiyikanya Kirisito, chirikuuya Nyamuwanga inguru ya rikusyo ryaye. 13 Emwe wone, bhanu mutari Bhayawudi ꞉mwoonguuwe omusango gwa echimari, nijo Emisango ja Ekisi ja obhuchungusi bhwemwe. Ka wone, mwejire mweekirisya Kirisito, Nyamuwanga ꞉aabhateeye‑ko orunabho kwa okubhayaana Mwoyo Mweru unu aariga abharagire. Kwa okukora kutyo, ꞉eeresiisye ati, muri abhaana bhaaye. 14 Mwoyo Mweru oyo, niwe echigwatirisyo cha omwandu gwaye kw‑iswe bhanu chiri bhaana bhaaye.c Omusango ogwo, ogweresya abhwerubhweru ati Nyamuwanga aryerura chimwi abhaanu bhoone bhanu abhamwiyikanya. Chimukuuye inguru ya rikusyo ryaye!
Risabhwa rya Pawuro
15 Nikwo kutyo anye wone, okusookerera omwanya gunu ꞉noonguuwe eriikirisya rinu muri naryo ku‑Raatabhugenyi Yeesu na eryenda rinu muri naryo ku‑bheeru bhoone, 16 enigenderera okusiima Nyamuwanga inguru yeemwe na enigenderera okubhasabhirwa ku‑mwene. 17 Enisabhwa Nyamuwanga wa Raatabhugenyi weeswe Yeesu Kirisito, Raata owa rikusyo, abhayaane obhwengeeso bhwa echinyamwoyod na okwiswerura kw‑imwe, korereki mumusombookerwe muno. 18 Enimusabhwa wone, eegure ameeso ga emitima jeemwe, korereki mumenye obhwiyikanyo bhwa obhubhirikisi bhwaye kw‑imwe kutyo bhuri. Nyabhuriko mumenye rikusyo ryafu rya omwandu gwaye ku‑bheeru kutyo riri. 19 Mumenye wone, kutyo bhuri bhuturo bhwaye obhukuru bhunu obhukora emirimu inguru yeeswe, eswe bhanu echiikirisya. Obhuturo obhwo, bhutakwinganyirisibhwa na echiinu choonechoone, ka wone, obhukora emirimu ku‑managa maafu muno. 20 Amanaga ago, nigo Nyamuwanga ꞉aakoreeye emirimu omwanya gunu ꞉aasuuruuye Kirisito okusooka mu‑bhafuuwe, na okumwinyanja orubhaara rwaye rwa ebhuryo mu‑chaaro chinyatarorwa.e 21 ꞉Aamwinamusiisye inguru muno okukira obhutungi bhwone, obhuturo bhwone, amanaga goone, obhukuru bhwone na risiina ryoneryone rinu eritogorwa, itari mu‑chaaro chinu era, tari wone mu‑chaaro chinu chiriija. 22 Nyamuwanga ꞉aayaanire Kirisito obhuturo inguru ya ebhiinu bhyone, ꞉aamuteeye‑wo abhe rwa omutwe ku‑bhiinu bhyone inguru ya rikanisa. 23 Woori, rikanisa riri rwa omubhiri gwaye, riijuuye obhurame na amanaga gaaye. Omwene kaakuumisya joone ku‑bhuturo bhwaye.f