Okusooka mu‑rufu okuja mu‑bhuwanga
2
1 Emwe mwariga mufuuwe echinyamwoyo, inguru ya bhunyatagayuka bhwemwe na ebhibhiibhi bhyemwe. 2 Ku‑mwanya ogwo, mwaruubhaga jitungwa jimbiibhi ja echaaro chinu. ꞉Mweekaaye nimuruubhaga Syetaani,a omutungi wa obhuturo bhwa echinyamwoyo mu‑rutumba, niryo risambwa rinu woori ritungire abhaanu bhanu bhatakugayuka Nyamuwanga. 3 Omwanya ogwoogwo eswe bhoone wone, chaariga nichikora rwa kutyo abhaanu bhanu bhatakugayuka Nyamuwanga bhaakoraga. Chaakoraga rwa kutyo emibhiri jeeswe na obhwiganirisya bhweswe bhyendaga. Okuruubhana na jitungwa jeeswe jimbiibhi ja obhusimukwa, risungu rya Nyamuwanga ryekaga inguru yeeswe rwa ku‑bhaanu abhandi bhoone. 4 Nawe omwene, ku‑chigongo chaaye echaafu na ku‑ryenda ryaye eryafu kw‑iswe, 5 ꞉aachiyaaye obhuwanga aamwi na Kirisito. ꞉Aakorere kutyo, noorwo kutyo chaariga chifuuwe echinyamwoyo inguru ya ebhibhiibhi bhyeswe.b Nikwo kutyo chichunguuywe kwa obhwitiriranya bhwaye. 6 Mu‑kubha na obhumwi na Kirisito Yeesu, Nyamuwanga ꞉aachisuuruuye aamwi na Kirisito Yeesu, ˆnaachinyanjya aamwi nage mu‑chaaro chinyatarorwa, 7 korereki eeresye ku‑bhoone ku‑mwanya gunu oguuja, obhwitiriranya bhwaye bhwafu muno ku‑bhwa ekisi bhwaye kw‑iswe bhunu bhuri mu‑Kirisito Yeesu. 8 Okubha muchunguuywe kwa obhwitiriranya bhwaye, ku‑njira ya okwikirisya Yeesu. Obhuchungusi obhwo, bhutasookere kw‑imwe, tari ni chiyaanwa cha Nyamuwanga kw‑imwe. 9 ꞉Ataabhachunguuye okuruubhana na ebhikorwa bhyemwe bhya ekisi, korereki omuunu woonewoone asige okwikuuya. 10 Okubha Nyamuwanga achichunguuye na okuchibhumba bhuyaaya echinyamwoyo mu‑Kirisito Yeesu, korereki chikore ebhikorwa bhya ekisi, bhinu ꞉aachiiraabhiiye okusookerera kara, korereki chibhikorega.Obhumwi mu‑Kirisito
11 Kurwa ejo, mwichuke ati, omwanya gunu guturire, emwe mwariga muri bhaanu bhanu bhatari Bhayawudi ku‑bhwibhurwa. Abhayawudi abhabhatoga ati “bhanyatatendwa,” kwa okubha abheene abheetoga ati, “abhatendwa.” Okutendwac okwo okukorwa na abhaanu ku‑mubhiri. 12 Mwichuke ati, ku‑mwanya gurya, mwariga mutakumenya Kirisito, mwariga mukindikirwe okusooka ku‑Bhayisirayeeri, mwariga muri bhagenyi bhanu mutari na omurago gwonegwone ku‑ndaganod yeebhwe. Mwariga mutari na obhwiyikanyo, nyabhuriko mwariga mutari na Nyamuwanga ku‑chaaro. 13 Nawe woori, mu‑kubha na obhumwi na Kirisito Yeesu, emwe bhanu mwariga muri kura, mwafogeeye ayeeyi ku‑njira ya Kirisito okwita isagama yaaye ku‑musarabha.
14 Okubha Kirisito niwe omurembe gweswe, niwe ꞉aakorere Abhayawudi na bhanu bhatari Bhayawudi okubha bhamwi. Ku‑njira ya orufu rwaye, ꞉aasoosiisye‑wo obhusoko bhunu bhwariga bhuri rwa orusiika rwa agati runu rwariga ruchitaaganyiisye. 15 Omwanya gunu ꞉aakorere kutyo, ꞉aasoosiisye‑wo obhutinge bhwone bhwa ebhiraagiro bhya Echiyawudi. Obhwira bhwaye bhwariga bhuri okukora ebhise bhibhiri ebhyo, okubha echise chimwi echiyaaya. Nikwo kutyo ꞉aareetere omurembe agatigati ya Abhayawudi na bhanu bhatari Bhayawudi na okubhagwatanya aamwi nage. 16 Ku‑njira ya orufu rwaye ku‑musarabha, ꞉aasingaarisiisye obhusoko, ˆnaagwatanya aamwi abhaanu bhabhiri okubha omuunu umwi na okubhagwatanya bhoone ku‑Nyamuwanga. 17 Kirisito ˆnaaja, ˆnaaraasya Emisango ja Ekisi inguru ya omurembe ku‑bhaanu bhoone, kw‑imwe bhanu mwariga muri kura na Nyamuwanga na ku‑Bhayisirayeeri, bhanu bhaariga bhari yeeyi nage. 18 Okubha omwene oyo, achiyaaye eswe bhoone, Mwoyo Mweru korereki chifogere ku‑Raata Nyamuwanga.
19 Mbe woori emwe, mutari abhagenyi na abhayitingʼani rindi ku‑Bhayisirayeeri, tari muri bheenengo aamwi na abheeru bha Nyamuwanga, wone muri bhaanu bha mu‑nju ya Nyamuwanga. 20 Muri rwa inju inu yumbakirwe ku‑rufuka rwa jitumwae na abharagi. Kirisito Yeesu omwene, ari rwa ribhuyi rinene rya orufuka. 21 Inju yoone eyumbakwa kisi ku‑mwene, igwatane aamwi okukingira okubha Riyekaru eryeru ku‑Raatabhugenyi. 22 Kutyo, noorwo emwe aamwi na abhaanu abhandi bhoone, omumbakwa aamwi ku‑mwene, mubhe obhwikaro bhwa Nyamuwanga ku‑njira ya Mwoyo waaye.