Pawuro kaaraasya mu‑musi gwa Yefeeso
19
1 Omwanya gunu Apooro aariga ari Koriito eyo, Pawuro ꞉aaturire mu‑misi ja mu‑bhiima, ˆnaakinga mu‑musi gwa Yefeeso. Eyo ꞉aasongʼeene‑yo abheeyigisibhwa abharebhe, 2 ˆnaabhabhuusya ati, “Angu, ꞉mwaramiiye Mwoyo Mweru bhunu ꞉mweekirisiisye Yeesu?” Nibhamusubhya ati, “Wuri, noorwo okuungwara ati ari‑wo Mwoyo Mweru wone chichaariga okuungwa.” 3 ˆNaabhabhuusya ati, “Mbe, araabha nikwo kutyo, ꞉mwabhatiijiibhwe obhubhatiijo ki?” Nibhamusubhya ati, “꞉Chaabhatiijiibhwe obhabhatiijo bhwa Yowana.”4 Niwo Pawuro ˆnaabhabhwira ati, “Yowana aariga ˆnaabhatiija abhaanu bhanu bhaariga nibhata ebhibhiibhi bhyebhwe. Omwene ꞉aabheeyigisiisye ati, ari‑wo omuunu ariija inyuma yaaye, niwe Yeesu. Bhamwikirisye oyo.” 5 Abhaanu bha Yefeeso abho, bhejire bhoongwa emisango ejo, wone nibhabhatiijibhwa kwa risiina rya Raatabhugenyi Yeesu. 6 Omwanya gunu Pawuro ꞉aabhatereeye‑ko amabhoko gaaye, awoawo Mwoyo Mweru ˆnaabheekira, nibhaamba okwayika mu‑nyaayika jingenyi na okusoosya obhuragi. 7 Abhaanu abho, obhukumi bhwebhwe ꞉bhwarebhereeye okukinga abharume ekumi na bhabhiri.
8 Kwa omwanya gwa ameesi gasatu Pawuro aariga ˆneengira mu‑nju ya eriikofyanyo rya Abhayawudi na okusimura nabho kwa ribhaasi. Aasimuraga na abhaanu na okubharembeja bheekirisye emisango ja obhukama bhwa Nyamuwanga. 9 Nawe abhaanu abharebhe mu‑bheene nibhakora emyoyo jeebhwe okubha emikomeeye. Nibharema okwikirisya emisango ja Yeesu, nibhaamba okugaya Injira ya Yeesu imbere ya abhaanu. Kutyo, Pawuro ˆnaaramura okusigana nabho, ˆnaagega abheeyigisibhwa bhaaye, ˆnaagenda nabho mw‑isomero rya Tiraano, munu abhaanu bheekofyanyaga. Bhuri rusuku, aariga ˆnaaroma na abhaanu emisango ja Yeesu. 10 Pawuro ˆnaagenderera kutyo kwa emiguuga ebhiri, ˆnaabhwiraga abhaanu inguru ya Yeesu na abhaanu bhaafu muno bha mu‑mukoowa gwa Asiya, Abhayawudi aamwi na bhanu bhatari Bhayawudi nibhategeresya omusango gwa Raatabhugenyi.
11 Nyamuwanga ꞉aakorere emisango ja okuruguusya kwa amabhoko ga Pawuro. 12 Noorwo abharwaye bhanu bhaariga bhatakutura okukinga ku‑Pawuro, ꞉bhaasiriiwe ebhitambaara na emyenda jinu jaakunibhwaga ku‑mubhiri gwaye. Omwanya gunu abharwaye abho bhaajikuunʼyaga, bhaaworaga. Nyabhuriko amasambwa wone gaabhasookaga‑ko.
13 Bhaariga bhari‑yo Abhayawudi abharebhe bhanu bhaariga nibhayemuuka enu na erya nibhasoosyaga amasambwa ku‑bhaanu. Abho nibharegeeja okukorera risiina rya Raatabhugenyi Yeesu okubhwira amasambwa ati, “Kw‑isiina rya Yeesu unu Pawuro kaaraasya, enibhagonya ati musooke ku‑muunu unu!” 14 Omwanya ogwo bhaariga bhari‑wo abhaana bhataanu na bhabhiri bha Sikeewa bhanu bhaakoraga kutyo. Sikeewa unu aariga ari Omuyawudi, na ari mugabhisi omukuru. 15 Nawe risambwa niribhasubhya ati, “Yeesu nimumenyere, Pawuro wone nimumenyere, ka emwe neemwe bha ga?” 16 Niwo omuunu oyo aariga awungirwe na risambwa, ˆnaagonera abhaanu abho, ˆnaabhakira amanaga. ˆNaabhabhuma muno, okukingira nibheerukira anja bhari tuyu na bhawutaasiibhwe.
17 Emisango ejo nijiswirana muno mu‑Bhayawudi na mu‑Bhayunaani bha Yefeeso bhanu bhaaramyaga Nyamuwanga. Abho bhoone nibhayaya, nibhakuuya risiina rya Raatabhugenyi Yeesu. 18 Awo abhaanu bhaafu bhanu ꞉bheekirisiisye Yeesu, bhaariga nibhata imbere ya abhaanu ebhikorwa bhyebhwe ebhibhiibhi bhinu bhaariga bhakorere. 19 Abhaanu bhaafu mu‑bheene bhanu bhaariga nibhakora emisango ja obhuyike, nibhareeta ebhitabho bhyebhwe, nibhabhyocha na omuriro imbere ya abhaanu bhoone. Bhejire bhaabhara obhugusi bhwa ebhitabho ebhyo, omuriiro gwabhyo ꞉gwakingire ebhiwumbi makumi gataanu (50,000) aga munyaraga.a 20 Nikwo kutyo omusango gwa Raatabhugenyi gwaswiranaga na okubha na amanaga mu‑bhaanu.
Injogere mu‑musi gwa Yefeeso
21 Emisango ejo jejire jaawa, Pawuro ˆnaaramura okugenda Yerusareemu okutura mu‑mikoowa ja Makedooniya na Akaaya. ꞉Aayikire ati, “Nikakinga Yerusareemu, neenderwe nikinge mu‑musi gwa Ruumi.” 22 ꞉Aatumire abhasakisi bhaaye abhabhiri, Timoteewo na Erasito, bhagende Makedooniya, omwanya ogwo omwene ˆnaasigara Asiya awo.
23 Omwanya ogwo Yefeeso awo, ꞉yaakorekeene injogere nyafu muno inguru ya abharuubhirisya bha Injira ya Yeesu. 24 Mu‑musi ogwo aariga ari‑mo omukonji umwi wa amasusano aga jiyera, risiina ryaye aatogwaga Demetiriiyo. Aakonjaga amasusano ganu gaasusanaga na riyekaru rya risambwa ryebhwe rinu ryatogwaga Ariteemi. Ka wone bhanu bhaakoraga emirimu nage bhaabhonaga omuriiro mwafu.
25 Orusuku rumwi Demetiriiyo ˆnaakofya abharyo abheejaabho, aamwi na abhakosi abhandi bhanu bhaariga nibhakora emirimu ejo. ˆNaabhabhwira ati, “Emwe bhaanu bhaasu, omumenya kisikisi ati ribhona ryeswe eribhonekana ku‑mirimu jinu. 26 Nawe woori mwoongwa na mwarora kutyo Pawuro oyo kaakurura abhaanu bhaafu bha Yefeeso anu, aamwi na bhanu bhari mbaara joone ja Asiya. Kaabhabhwira ati, amasusano ganu agakonjwa na amabhoko aga abhaanu, gatari Nyamuwanga wa echimari. 27 Woori, enuubhaya ati, omurimu gweswe gunu oguuja okugaywa muno. Riyekaru rya risambwa ryeswe rikuru Ariteemi wone erija okurorwa ati, chitari chiinu cha obhugajuro. Ariteemi kaja okworomosibhwa obhukuru bhwaye, noorwo kutyo ni risambwa rikuru na niryo rinu eriramibhwa mu‑chaaro chinu choone cha Asiya na mu‑bhyaro ebhindi bhyone.”
28 Bhejire bhoongwa emisango ejo ja Demetiriiyo nibhagwatwa risungu. Nibhamwaya nibhaayikaga ati, “Ariteemi wa Abhayefeeso niwe omukuru!” 29 Omusi gwone gwa Yefeeso nigwijura injogere. Abhaanu nibhagwata Gaayo na Arisitaariko, abhaanu bha Makedooniya bhanu bhaariga nibharibhata aamwi na Pawuro, nibheengira nabho bhwangu mu‑rubhuga rwa obhwenywa. 30 Pawuro ˆnaakena eemereeguru agatigati ya abhaanu abho, nawe abheeyigisibhwa abheejaabho ꞉bhataamwikirisiisye. 31 Noorwo abhasaani bhaaye abharebhe mu‑bhakuru bha Asiya awo, wone nibhamusirira omusango gwa okumwirembeeresya ati asige okwingira mu‑rubhuga rwa obhwenywa ku‑bhaanu abho.
32 Awo abhaanu nibhakora injogere muno. Abharebhe nibhajujuumira omusango gumwi, abhandi omusango ogundi. Abhaafu mu‑bheene ꞉bhataamenyere noorwo chinu ꞉chaakorere nibheekofyanya omwo. 33 Abharebhe mu‑chise echo nibheetogera ati injogere yaariga iri inguru ya Arekijanda kwa okubha Abhayawudi, ꞉bhaamukuuriiye imbere ya abhaanu abho. Arekijanda aariga ari na omusango gwa okwayika. Niwo, ˆnaabhawungisya okubhoko ati bhajibhire, kwa okubha aariga ˆnaakena okureeta obhwibhagisi imbere yeebhwe. 34 Nawe bhejire bhaamenya ati ni Muyawudi, awo bhoone nibhamwaya kwa obhuraka bhumwi wuti masaa gabhiri kutya nibhaayikaga ati, “Ariteemi wa Abhayefeeso niwe omukuru!”
35 Ku‑bhuteero, omukaami omukuru wa omusi ogwo, ˆnaajibhisya abhaanu abho, ˆnaabhabhwira ati, “Emwe Abhayefeeso, ni wuuya mu‑bhyaro ebhindi bhyone, unu atakumenya ati, gunu nigwo omusi gunu ogwangarira riyekaru rya risambwa rikuru Ariteemi, aamwi na risusano ryagwo rinu riikire okusooka mu‑rwire? 36 Mbe! Atari‑wo omuunu unu kaatura okurema emisango jinu. Kurwa ejo omukenwa mujibhire, musige okukora omusango gwonegwone bhwangubhwangu. 37 Enaayika kutyo, kwa okubha abhaanu abho mwareeta anu, chitari‑wo echiinu chinu bheebha mw‑iyekaru rya risambwa ryeswe. Noorwo ꞉bhataayikire emisango emijabhi kw‑isambwa ryeswe, Ariteemi. 38 Mbe, araabha Demetiriiyo na abharyo abheejaabho bhari na omusango na omuunu woonewoone, riromero riri‑wo na abharamusi bha ebhiraagiro wone bhari‑wo. Abhatura okusitaaka eyo! 39 Nawe araabha muri na amabhuusyo agandi, mugasire mw‑ikofyanyo rinu eriikirisyanya na ebhiraagiro bhyeswe. 40 Okubha jinu chaakora reero, ejitura okureterera okusitaakibhwa ati chaakora injogere. Araabha chikasitaakibhwa inguru ya ejo, chitari na omusango gunu ogwiya okuchibhagira, kwa okubha injogere inu itari na omuriiro.” 41 Omukaami oyo, ejire aamara okubhwira abhaanu kutyo, ˆnaabhabhwira bhagende iika.