Pawuro mu‑mukoowa gwa Makedooniya na ogwa Akaaya
20
1 Injogere ya Yefeeso awo, yejire yaatemekera, Pawuro ˆnaabhirikira abheeyigisibhwa bheende‑wo. Ejire aamara okubhafungʼamya, ˆnaabharaga, ˆnaagenda mu‑mukoowa gwa Makedooniya. 2 ꞉Aaturire mu‑chaaro echo, ˆnaabhwiraga abheekirisya emisango myafu ja okubhasimbiisya emitima jeebhwe. Niwo ku‑bhuteero ˆnaakinga Akaaya, 3 ˆnaamara eyo ameesi gasatu.Niwo, ˆnaakora obhutinge bhwa okugenda mu‑mukoowa gwa Siiriya na ingarabha. Nawe ejire aamenya ati Abhayawudi bhaariga nibhamuromera iniku, ˆnaaramura okusubha, ˆnaatura mu‑mukoowa gwa Makedooniya. 4 Ku‑rugendo runu, Pawuro ꞉aayeregesibhwe na Sopateeri omwana wa Piiro okusooka mu‑musi gwa Bherooya, aamwi na abhaanu bhabhiri, Arisitaariko na Sekundo okusooka mu‑musi gwa Tesaroonike, Gaayo okusooka mu‑musi gwa Deeribhe, Timoteewo, Tukiiko na Torofiimo okusooka mu‑mukoowa gwa Asiya. 5 Abho ꞉bhaachitangatiiye mu‑musi gwa Turoowa na okuchirindirira eyo. 6 Omwanya gunu ichikukuru ya emikaate jinu jitakutuurwa‑mo echifwimbya ꞉yaayitingʼeene, nichisooka mu‑musi gwa Firiipi na ingarabha. Nichiribhata siku etaanu okukingira nichikinga mu‑musi gwa Turoowa, awo niwo ꞉chaabhugeene na abheejaasu abho. ꞉Chaabheeye awo siku etaanu na ebhiri.
Pawuro kaasuurura Ewutiko
7 Orusuku rwa obhwoyo rwejire rwakinga, nichiikumanya, korereki chikore obhumwi bhwa okubhega omukaate. Awo Pawuro ˆnaaraasisya abhaanu omusango gwa Nyamuwanga, nikinga mu‑bhwire agati, kwa okubha aariga akarariiye okusooka awo mwejo yende‑ko. 8 Anu chaariga chiikumanyisiisye, chaariga chiri mu‑chisago chinu chaariga chiri mu‑bhutingo. Omwo jaariga jiri‑mo jidara nyafu nijaakaga. 9 Mw‑idirisya rya echisago echo aariga eenyanjire‑mo omusigaji umwi, risiina ryaye Ewutiko. Pawuro ꞉aagendereeye okuraasya kwa omwanya omureera, niwo Ewutiko, ˆnaamba okuwuunirira. Omwanya gunu aariga awongeeye, ˆnaayarambuka okusooka kw‑igorofwa rya kasatu, ˆneebhuma aasi! Abhaanu nibhagenda okumwimusya, nibhasongʼana aafuuwe. 10 Pawuro wone, ˆnooromoka emwaro eyo. ˆNeefumbika inguru ya Ewutiko, ˆnaamufumbeera. ˆNaabhwira abhaanu abho ati, “Musige okubha na obhuyayu! Omumura unu achaari‑mo omwoyo!” 11 Katungu katooto okutura, Pawuro ˆnaariinya mu‑chisago cha mu‑nda echo, ˆnaagega omukaate ˆnaarya. ˆNaagenderera okwiyigisya muno okukingira anu bhwacheeye, ˆnaasooka‑wo. 12 Abhaanu abho nibhayeregesya Ewutiko, nibhamukingya iika ari muwanga kerechu, nibhasimbiisibhwa muno.
Pawuro kaaraga abhakaruka bha rikanisa rya Yefeeso
13 Pawuro ˆnaaribhata kwa maguru okugenda mu‑musi gwa Asoosi. Eswe nichigenda eyo na ingarabha, korereki chibhonane nage eyo, kwa okubha awo niwo ꞉cheekirisyanyiisye nage ati chirimugega. 14 Omwanya gunu ꞉aachisongʼeene awo, nichimuyiika mu‑ngarabha eyo, nichigenda aamwi nage, mu‑musi gwa Mitureene. 15 Bhwejire bhwacha, nichigenderera na orugendo rwa mu‑nyanja, nichikinga ku‑mbarimbari ya risinga rya Kiiyo. Mwejo yende‑ko, nichaambuka inyanja nichikinga kw‑isinga rya Samoosi. Nichiikara mu‑musi gwa Turogiriyo. Orusuku runu ꞉rwaruubhiiye, nichikinga mu‑musi gwa Mireeto. 16 Okubha Pawuro aariga akarariiye ati chisige okutura Yefeeso, korereki aasiga okukoora mu‑mukoowa gwa Asiya omwo. Aariga ˆnaakena okukinga bhwangu Yerusareemu, ruchaari okukinga orusuku rwa Pendekoosite,a araabha jikaturikeene.
17 Omwanya gunu Pawuro aariga ari Mireeto awo, ˆnaabhirikira abhakaruka bha rikanisa rya Yefeeso bhabhugane nage. 18 Bhejire bhaamukinga‑ko, ˆnaabhabhwira ati, “Emwe abheene mumenyere kutyo ꞉neekaaye na emwe omwanya gwone, okusookerera orusuku rwa okwamba runu ꞉naakingire Asiya anu. 19 Naariga ninkorera Raatabhugenyi mu‑kwikeeya kwone, kwa amasiga na ku‑maregeejo ganu ꞉gaasookeene na inuku ya Abhayawudi. 20 Omumenya ati ꞉nitaasigire okubharaasisya omusango gwonegwone gwa okubhasakira. Naabharaasisyaga abhwerubhweru, noorwo mu‑nju jeemwe. 21 Naabhwiraga Abhayawudi na bhanu bhatari Bhayawudi ati, bhayindukire Nyamuwanga, bhate ebhibhiibhi bhyebhwe na bheekirisye Raatabhugenyi weeswe Yeesu Kirisito.
22 “Woori, Mwoyo Mweru kaansinyiirisya ati, nigende Yerusareemu. Enigenda, nitakumenya jinu ejija okumbona eyo. 23 Enimenya ati, bhuri musi gunu enitura, Mwoyo Mweru kaanyeeresya ati, enija okweswa mw‑ibhoyero na enija okubhona jinyaako. 24 Nawe, nitakubhara obhurame bhwani ati ni chiinu cha omuriiro kw‑anye, korereki nikuumisye emirimu jinu Raatabhugenyi Yeesu ꞉aanaaye nikore. Emirimu ejo ni kuraasisya abhaanu Emisango ja Ekisi ja obhwitiriranya bhwa Nyamuwanga ku‑bhaanu.
25 “Omumenya, naariga nintura agati yeemwe okubheeyigisya inguru ya obhukama bhwa Nyamuwanga. Nawe woori, enimenya ati emwe bhoone mutarindora rindi. 26 Kurwa ejo, enibhabhwira abhwerubhweru ati, omuunu woonewoone aakabhura chinyamwoyo, anye nitari na esoro inguru yaaye.b 27 Okubha bhuri gunu Nyamuwanga eendaga mugumenye, naabhabhwiraga nitaabha na echiitimaato. 28 Woori, mubhega mwiyangariiye na murinde ebhise bhyone bhya abheekirisya, kwa okubha Mwoyo Mweru, abhateeye‑wo mubhe abhaangarisi. Mwangarire abheekirisya abho, kwa okubha Nyamuwanga ꞉aabhagurire kwa isagama ya omwana waaye.
29 “Nimenyere ati omwanya gunu nirisigana na emwe, abhaanu abharuru bhariija okwiyingisya mw‑imwe. Bharikora rwa kutyo emisege ejiingira mu‑naama na bhataribhafwira echigongo wuri. 30 Noorwo agati yeemwe abheene, bhariibhuka‑mo abhaanu bhanu bharyayika emisango jinu jitari ja echimari, korereki bhakurure abheeyigisibhwa, bhabharuubhirire abheene. 31 Kurwa ejo, mwiyangarire! Mwichuke ati, naamarire emiguuga esatu nintongeraga bhuri umwi weemwe, nindiriraga‑ko amasiga mogomogo mu‑ngeta na mu‑mwisi.
32 “Woori, enibhatuura ku‑Nyamuwanga na ku‑musango gwa obhwitiriranya bhwaye obhukuru. Okubha gunu, ogutura okubhakomeesya na okubhayaana omwandu gwa amabhando ganu atereeye‑wo abhaanu bhaaye bhanu bheesiibhwe. 33 ꞉Niteegombere jipirya ja omuunu woonewoone, noorwo inaaryo, noorwo emyenda jaaye. 34 Emwe abheene mumenyere kisikisi ati naariga ninkora emirimu kwa amabhoko gaani, okubhona jipirya ja okugura ebhiinu bhyone bhinu anye aamwi na abheejaasu chaakenaga. 35 Mu‑joone jinu ꞉naakorere, naariga nimbeeresya ati echikenwa okukora emirimu, korereki chibhone ebhiinu bhya okusakira abhaanu bhanu bhatari na obhuturo. Echikenwa wone okwichuka emisango jinu Raatabhugenyi Yeesu omwene ꞉aayikire, ‘Amabhando maafu ari mu‑kusoosya okukira mu‑kuramira.’”
36 Pawuro ejire aamara okwayika emisango ejo, ˆneefukama aamwi nabho bhoone, ˆnaasabhwa Nyamuwanga. 37 Ejo okuwa, bhoone nibhamufumbeera na okumubhuusu na okurira masiga mogomogo. 38 ꞉Bhaasurumbaaye muno ejire aabhabhwira ati, “Mutarindora rindi.” Bhejire bheeya nibhamuyeregesya nibhamukingya ku‑ngarabha.