Pawuro kaagenda Yerusareemu
21
1 Chejire chaamara okuragana na okwawukana na abhakaruka bha Yefeeso abho, nichiriinya mu‑ngarabha nichigenda kw‑isinga rya Koosi. Mwejo yende‑ko, nichigenda kw‑isinga rya Roodo. Okusookerera awo, nichigenda mu‑musi gwa Pataara mu‑mukoowa gwa Asiya. 2 Awo nichisongʼana ingarabha eyindi inu yaariga niija mu‑mukoowa gwa Foyeenike. Kurwa ejo nichiriinya, nichigendera omwo. 3 Omwanya gunu ꞉chaarebhereeye risinga rya Kiipuro na okurirora, nichiritura orubhaara rwa ebhurimbe, nichirosya mu‑mukoowa gwa Siiriya. Chejire chaakinga mu‑mukoowa ogwo mu‑musi gwa Tiiro, nichiika mu‑ngarabha eyo, kwa okubha awo niwo yaariga niikenwa iisye emigugu. 4 Nichiyenja abheeyigisibhwa bheende‑wo, nichibhabhona nichiikara nabho awo siku etaanu na ebhiri. Abheeyigisibhwa abho nibhatangasibhwaga na Mwoyo Mweru nibheerembeeresya Pawuro ati asige okugenda Yerusareemu. 5 Nawe omwanya gweswe gwa okubha‑wo gwejire gwawa, abheekirisya abho bhoone nibhachiyeregesya, abharume na abhagasi bheebhwe na abhaana bheebhwe, nibhachikingya ku‑njekekera ya inyanja. Awo nichiifukama bhoone, nichisabhwa Nyamuwanga. 6 Omwanya gunu ꞉chaamarire okuragana nabho, nichiriinya mu‑ngarabha eyo, abheene nibhasubha mu‑misi jeebhwe.7 Nichigenderera na orugendo rweswe, nichisooka Tiiro awo, nichikinga mu‑musi gwa Toremaayi. Nichikeesya abheekirisya abheejaasu awo, nichibha nabho rusuku rumwi. 8 Mwejo yende‑ko, nichiriinya mu‑ngarabha, nichikinga mu‑musi gwa Kayisaariya. Nichiikara mu‑nju ya Firipo, unu aariga ari muraasya wa Emisango ja Ekisi ja Yeesu. Aariga ari umwi wa abhasakisi bhataanu na bhabhiri bhanu ꞉bhaasorerwe Yerusareemu. 9 Firipo oyo, aariga ari na abhayaasya bhana bhanu bhaariga bhari na obhuturo bhwa okusoosya obhuragi.
10 Chejire cheekara siku nyafu Kayisaariya awo, ˆnaaja omuragi okusooka Yuudeya, risiina ryaye aatogwaga Agabho. 11 Omuragi oyo ˆnaachiija‑ko, ˆnaagega omuchipi gwa Pawuro, ˆneebhoya amaguru na amabhoko, ˆnaayika ati, “Mwoyo Mweru kaayika ati, ‘Kutya, nikwo Abhayawudi bha Yerusareemu abhaja okubhoya mwene omuchipi gunu, na abhaja okumutuura mu‑mabhoko ga abhaanu bhanu bhatari Bhayawudi.’”
12 Chejire choongwa kutyo, eswe aamwi na abheejaasu bha Kayisaariya awo nichiirembeeresya Pawuro muno ati asige okugenda Yerusareemu. 13 Nawe omwene ˆnaachisubhya ati, “Ni kurwa ki omurira, omwenda okunyita omwoyo. Niikirisiisye, kutari okubhoywa era Yerusareemu awo, tari noorwo okufwa inguru ya risiina rya Raatabhugenyi Yeesu.” 14 Chejire chaataamibhwa okumukongya nichimusiga, nichaayikaga ati, “Okwenda kwa Raatabhugenyi nikwo kukorekane.”
15 Mwanya mutooto nichibhoya emigugu jeeswe, nichaamba orugendo rwa okuriinya Yerusareemu. 16 Abheeyigisibhwa abharebhe bha Kayisaariya awo, nibhachiyeregesya nibhachikingya mu‑nju ya Omunasooni, unu chaariga nichija okwikara nage. Omuunu oyo aariga ari wa kw‑isinga rya Kiipuro na aariga ari umwi wa abheekirisya bha okwambakwamba.
Pawuro kaakinga Yerusareemu
17 Chejire chaakinga Yerusareemu awo, abheekirisya abheejaasu bheenda‑wo nibhachikuma kwa risandabha. 18 Mwejo yende‑ko, nichigenda na Pawuro, nichiribhatira Yakobho, na abhakaruka bhoone bha rikanisa wone bhaariga bhari‑wo. 19 Pawuro ˆnaabhakeesya, ˆnaabhabhwira emisango joone jinu Nyamuwanga ꞉aakorere ku‑bhaanu bhanu bhatari Bhayawudi okuruubhana na obhukosi bhwaye.
20 Yakobho na abhakaruka bha rikanisa bhejire bhoongwa ejo, nibhakuuya Nyamuwanga. Niwo nibhabhwira Pawuro ati, “Omuyiri weeswe waarora ebhiwumbi na ebhiwumbi bhya Abhayawudi bhanu bheekirisiisye Yeesu na bhoone abharuubhirisya muno ebhiraagiro bhya Muusa. 21 Abheene bhabhwiriiywe ati, owiyigisya Abhayawudi bhoone bhanu bheekaaye mu‑bhaanu bha amaanga agandi ati, bhasige okuruubhirira Muusa. Abhaayika ati ꞉waabhagaanyiisye okutenda abhaana bheebhwe, noorwo okuruubha emisiro jeebhwe ja Echiyawudi. 22 Woori! Chikore kutiki? Chimari Abhayawudi abho bhoone abhaja okuungwa ati uri anu. 23 Kurwa ejo, nuukore kutyo echija okukubhwira. Agati yeeswe bhari‑wo abharume bhana bhanu bhateeye‑wo echirayiro imbere ya Nyamuwanga. 24 Nuugende nabho, uje okwiyesya aamwi nabho. Ubhariyire jipirya, bhamwege jifwiri jeebhwe.a Kutyo abhaanu bhoone abhaja okumenya ati, jinu ꞉bhaabhwiriiywe joone inguru yaawo, jitari ja echimari, na ati awe owugenderera okugayuka ebhiraagiro bhya Muusa. 25 Nawe ku‑rubhaara rwa abhaanu bhanu bhatari Bhayawudi, bhanu abheekirisya Yeesu, ꞉chaabhakaamiiye inyarubha rwa kutyo ꞉chaaramuuye. ꞉Chaaramuuye ati, bhasige okurya ebhiryo bhinu bhisoosiibhwe inguru ya okuramya amasusano, okurya noorwo okunywa orwamba, okurya jityanyi jinu jiitirwe kwa okubhuutwa, na okukora obhuromesi.”
26 Mwejo yende‑ko, Pawuro ˆnaagenda na abhaanu bhana bharya, ˆneeyesya aamwi nabho. Neeya ˆneengira mw‑Iyekaru, korereki abhwire abhagabhisi na abheejaabho orusuku runu bharimara okwiyesya kwebhwe okwo na echoogo chinu echija okusoosibhwa inguru ya bhuri umwi weebhwe. 27 Siku etaanu na ebhiri ja okwiyesya, jejire jaarebherera okuwa, Abhayawudi bhanu ꞉bhaasookere mu‑mukoowa gwa Asiya, nibharora Pawuro mw‑Iyekaru. Nibhakungirisya abhaanu okukora injogere, niwo abhaanu abho nibhagwata Pawuro nibhaayikaga ati, 28 “Emwe abharume bha Yisirayeeri! Muchisakire! Mbawo omuunu unu niwe uryaurya kaagenderera okwiyigisya abhaanu bha mbaara joone ati, bhachigaye eswe Abhayawudi, bhagaye ebhiraagiro bhya Muusa na bhagaye Riyekaru rinu. Okusiga ejo kaajabhiyasya ayeeru kwa okwingisya Abhayunaani mw‑Iyekaru rya Nyamuwanga.”b 29 ꞉Bhaayikire kutyo, kwa okubha bhaariga bharorere Pawuro mu‑musi awo, ari aamwi na Torofiimo Omuyefeeso. Kwa okurema okumenya ꞉bheetogeeye ati eengisya Torofiimo mw‑Iyekaru.
30 Mbe, abhaanu nibhaamba okukora injogere mbaara joone ja omusi gwa Yerusareemu. Okusooka mbaara joone abhaanu abho nibhabhirimira Pawuro mw‑Iyekaru, nibhamukurumukira, nibhakurura Pawuro nibhamuwurusya anja na jinjigi jaaryo nijiigarwa kwa amanaga. 31 Omwanya gunu bhaariga nibharonda injira korereki bheete Pawuro, emisango nijikingira omukuru wa abhasirikare bha Echiruumi ati, mbaara joone ja omusi gwa Yerusareemu abhaanu abhakora injogere. 32 Awoawo, ˆnaagega abhasirikare aamwi na abhaangarisi bheebhwe, nibhabhirima okugenda ku‑bhaanu abho. Abhaanu abho bhejire bhaarora abhasirikare abho bhari aamwi na omukuru weebhwe oyo, nibhasiga okubhuma Pawuro.
33 Omukuru wa abhasirikare oyo, ˆnaafogera, ˆnaagwata Pawuro, ˆnaaragirira ati abhoywe na amaseega gabhiri. Neeya, ˆnaabhuusya eriikofyanyo rirya ati, “Unu niga? Ka aakora chiinu ki?” 34 Awoawo abhaanu abho nibhaamba okumwayira inguru, bhuri umwi weebhwe ˆnaayikaga emisango jinu jitaasyanyiisye na ja oweejaabho. Okumwaya okwo nikukora omukuru oyo ˆnaataamibhwa okumenya jinu jaakorekana. ˆNaaragirira ati Pawuro areetwe mu‑runengo rwa obhutungi. 35 Pawuro, ejire aakinga ku‑njegwe ya mu‑runengo orwo, abhasirikare abho nibhamubhatura ingurunguru, korereki bhamuwonʼye ku‑songa ya injogere ya abhaanu bharya. 36 Okubha abhaanu abho bhaariga nibharuubhirira Pawuro, nibhamwaya nibhaayikaga ati, “Asingaarisibhwe! Asingaarisibhwe!”
Pawuro keebhagira imbere ya Abhayawudi
37 Omwanya gunu abhasirikare abho ꞉bhaarebhereeye okwingisya Pawuro mu‑runengo rwebhwe, Pawuro ˆnaabhwira omukuru weebhwe oyo ati, “Nyikirisisya nirome na awe.” Omukuru oyo ˆnaamusubhya ati, “Kasi owumenya okwayika Echiyunaani. 38 Awe utari Mumiisiri unu ꞉aasokanyiisye abheeti bhiwumbi bhina (4,000) ˆnaabhatangasya okuja ibhara?”
39 Pawuro ˆnaamusubhya ati, “Wuri, anye niri Muyawudi, omwibhurwa wa mu‑musi gwa Taariso, mu‑mukoowa gwa Kiriikiya. Omusi ogwo gumenyekeene muno. Enikwirembeeresya unyikirisisye naayike na abhaanu bhanu.” 40 Niwo omukuru wa abhasirikare oyo ˆnaamwikirisisya. Kurwa ejo Pawuro ˆneemereeguru ku‑njegwe ejo, ˆnaawungisya abhaanu abho okubhoko ati bhajibhire. Bhejire bhaajibhira bhoone, ˆnaayika nabho mu‑nyaayika yeebhwe ya Echiyebhuraniya.