22
1 Pawuro ˆnaayika ati, “Emwe bharaata na abhayiri bhaani bhoone, enibhasabhwa muntegeresye kisi omwanya gunu eniibhagira imbere yeemwe!”2 Abhaanu abho, bhejire bhoongwa Pawuro ˆnaayika mu‑nyaayika yeebhwe ya Echiyebhuraniya, nibhajibhira jibhijibhi. Wone ˆnaayika ati,3 “Anye niri Muyawudi. ꞉Neebhuriiywe mu‑musi gwa Taariso mu‑mukoowa gwa Kiriikiya, nawe ꞉naarereeywe Yerusareemu anuanu. Anye naariga niri mwiyigisibhwa wa Gamaryeri. Omwene ꞉aanyiyigisiisye okugwata ebhiraagiro bhinu ꞉chaasigiiywe na bhasaaja weeswe. Naariga niri na obhwikomeeresya muno ku‑Nyamuwanga, rwa kutyo emwe wone muri na obhwikomeeresya obhwo reero.
4 “Naanyaasyaga muno abharuubhirisya bha Injira ya Yeesu noorwo okubheeta. Naagwataga abharume na abhagasi na okubhatuura mw‑ibhoyero. 5 Jinu enibhabhwira, noorwo omugabhisi omukuru aamwi na abhakuru bha Abhayawudi bhoone abhatura okujiikirisya ati ni ja echimari. Abheene nibho ꞉bhaanaaye jinyarubha ja okusirira Abhayawudi abhakuru bhanu bhaariga bhari Damaasiko. Niniimuka korereki nigende eyo, nibhoye abheekirisya bheende‑yo na nibhareete Yerusareemu anu, korereki bhabhumwe.
6 “Mbe, bhunu naariga nichaari ku‑njira nindebherera okukinga Damaasiko, wuti saa etaanu na imwi mu‑mwisi. Awoawo obhweru bhwafu nibhungʼarabhya okusooka mu‑rwire nibhunyiyinda mbaara joone. 7 Ningwa aasi, ninuungwa obhuraka nibhumbwira ati, ‘Saawuri awe! Saawuri awe! Ni kurwa ki owunnyaasya?’ 8 Nimmubhuusya ati, ‘Raatabhugenyi awe, naawe ga?’ Omwene ˆnaansubhya ati, ‘Anye naanye Yeesu Omunajareeti, unu awe owunnyaasya.’ 9 Abheejaasu bhanu chaariga chiri aamwi, ꞉bhaarorere obhweru, nawe obhuraka obhwo, ꞉bhataabhuunguuwe. 10 Mbe nimmubhuusya ati, ‘Nikore kutiki, Raatabhugenyi?’ Raatabhugenyi ˆnaansubhya ati, ‘Imereeguru. Wingire Damaasiko. Omwo nimwo owuja okubhwirwa emisango joone jinu Nyamuwanga keenda ukore.’ 11 Nimba muwofu, kwa okubha obhweru obhwo ꞉bhwamofusiisye. Kurwa ejo abheejaasu abho nibhangwata okubhoko, nibhantangasya, nibhankingya Damaasiko.
12 “Damaasiko awo, aariga ari‑wo omuunu umwi, risiina ryaye aatogwaga Ananiiya. Omwene aariga ˆneekomeesya muno okugayuka ebhiraagiro bhyeswe. Ka wone, Abhayawudi abhaafu bheende eyo bhaamukuuyaga ati aariga ari muunu wa ekisi. 13 Mbe, ˆnaanyiija‑ko, ˆneemereeguru ayeeyi na anye, ˆnaambwira ati, ‘Saawuri waasu, rora rindi!’ Awoawo ameeso nigafumbuka, nimmurora.
14 “ˆNaagenderera okumbwira ati, ‘Nyamuwanga wa bhasaaja weeswe akusorere, korereki umenye okwenda kwaye, urore Omurengeresi waaye na okuungwa obhuraka bhwaye omwene. 15 Okubha uribha omubhambaasi waaye, ku‑bhaanu bhoone, ku‑jinu ꞉waarorere na okuungwa. 16 Woori owurindirira ki? Imereeguru! Ubhatiijibhwe, weesibhwe ebhibhiibhi bhyawo, usabhwe Nyamuwanga akufwire echigongo.’
17 “Ejo okuwa, ninsubha Yerusareemu. Rusuku rumwi, naariga ninsabhwa Nyamuwanga mw‑Iyekaru, nindora ebhiroro. 18 Mu‑bhiroro ebhyo, ꞉naarorere Raatabhugenyi Yeesu ˆnaambwiraga ati, ‘Sooka Yerusareemu bhwangubhwangu! Okubha abhaanu bha mu‑musi munu bhatakuja okwikirisya obhubhambaasi bhunu owuja okusoosya inguru yaani.’ 19 Ninsubhya ati, ‘Nawe Raatabhugenyi awe, abhaanu bhanu abhamenya ati, naaturaga mu‑nju ja ameekofyanyo ga Abhayawudi okugwata bhanu abhakwikirisya! Bhoone bhanu naabhuganaga nabho, naabhatuuraga mw‑ibhoyero na okubhabhuma kubhiibhi. 20 Ka wone, bhunu isagama ya omubhambaasi waawo Tefwano ꞉yeetikire, naanye ꞉neemereeguuyu awo ninikirisyaga ati eetwe. Naanye naangariraga emyenda ja bhanu ꞉bhaamwitire.’ 21 Nawe Raatabhugenyi ˆnaansubhya ati, ‘Genda, kwa okubha enija okukutuma ugende mu‑bhyaro ebhindi bhya kura ku‑bhaanu bhanu bhatari Bhayawudi.’”
22 Abhaanu abho bhaariga nibhategeresya Pawuro kisi. Nawe omwanya gunu ꞉aayikire emisango ejo, abhaanu nibhaamba okumwaya nibhaayikaga ati, “Eetwe, Eetwe! Omuunu rwa unu ateeyire okusigara‑mo omwoyo!” 23 Abhaanu abho nibhamwaya kwa risungu, nibhasawungaga emyenda jeebhwe na okututumura oruteeri inguru.a
Pawuro keebhuura ati ni Muruumi
24 Omukuru wa abhasirikare oyo, ˆnaaragirira abhasirikare bhaaye ati bheengisye Pawuro mu‑runengo rwebhwe, bhamubhume na jijaridi korereki bhamenye chinu echikora abhaanu abho bhamuworoomere. 25 Bhejire bhaamara okumubhoya korereki bhamubhume muno, ˆnaabhuusya omwangarisi weebhwe unu aariga eemereeguuyu awo ati, “Angu omwikirisibhwa na ebhiraagiro bhya Echiruumi okubhuma jijaridi omwinengo wa Ruumi, keenu achaari okuramurwa?”
26 Omwangarisi oyo ejire oongwa ejo, ˆnaagenda okubhwira omukuru weebhwe ati, “Woori owuja okukora kutiki? Kasi, omuunu unu ni Muruumi!” 27 Awoawo omukuru oyo ˆnaagenda ku‑Pawuro, ˆnaamubhuusya ati, “Mbwira, araabha awe uri Muruumi.” Omwene ati, “Cha.” 28 Omukuru oyo ˆnaamubhwira ati, “Anye wone niri Muruumi, nawe ꞉naasoosiisye ebhiinu bhyafu muno okubha omwinengo.” Pawuro ˆnaamusubhya ati, “Nawe, anye niri Muruumi omwibhurwa.”
29 Awoawo, abhasirikare bhanu bhaariga nibheenda okubhuusirisya Pawuro nibhasiga. Omukuru oyo wone ˆnoobhaya okuungwa ati Pawuro ni Muruumi, kwa okubha aariga amubhoyere na amaseega.
Pawuro kaareetwa mw‑ibharaja rikuru
30 Omukuru wa abhasirikare oyo eendaga okumenya bhuri chiinu chinu echikora Abhayawudi abho bhasitaake Pawuro. Mbe, bhwejire bhwacha, ˆnaamwigurira, ˆnaaragirira ati, abhakuru bha abhagabhisi bheekumanye aamwi na abhakuru abheejaabho bhoone bha ribharaja rikuru rya Abhayawudi.b Bhejire bhaamara okwikofyanya, ˆnaareeta Pawuro na okumwimereegusyu agati yeebhwe.