Ilan i

Unimbɔti

Nyɔŋkii Laŋyi

gbɔŋku

Tibɔkilkaal

Isirayeel yab yaa nìn jáaḿ Unimbɔti ilan in bi nìn gà ki nyɔ́ŋkí-uee ní bi kóoǹ ki kpáfì ki dūu ŋmàn̄ Inyɔŋki laŋyi gbɔŋku. Ŋwimmeem gbanti nìn sá ilan yam ní bi bɔ̀ɔ́ tibɔɔkaal ki cáa gà. Ŋwimmeem gbanti nìn nyáń dilaataal nì imuŋku ili nì saalaa ní. Abɔyil nambab bin bí tinaabakal poon kii 10 (9) sá Greeki yab nín nìn nāatì ki tīī nambab biŋyee ní. Bi dáá gbíntìi kàaǹ-bi Kriisitoo nikitiŋin aban díǹ.

Kɔŋkɔnnee, bi cúú kugbɔŋu gbanti ki yākatì ajancuku aŋmoo ní (1–41, 42–72, 73–89, 90–106, 107–150). Daafiidi laŋyi bí poon, Koora kitil laŋyi bí poon, Asaafi laŋyi bí poon, Tibɔtiil Laŋyi bí, bin jɔ́ḿ Jeerusaleem kí jāam̀ Unimbɔtee laŋyi bí, ní ilan iba mun gíti bí.

Ilan dilaataal nì saalku nì ŋubɔee, bi ŋmàn̄ yilpu un di ŋmàn̄-iee nì alancil ŋin ní ŋi sée nì tibɔɔkaal tin bi bɔ̄ɔ̄ ki gāāyee, nì ŋyunti ŋun bi máaǹ kí gāā-i inimbɔtijaam poonee nì kun di yì-tì ní bi ŋmàn̄-iee.

Ilan tikpil bí baa nyí alancil ŋin ní i sée. Ama ti ŋūǹ kí yàkatī ilan nee alancil tikpil:

1) Ilan in bi gà ki nyɔ́ŋkí ti-Dindaan u nín sá ukpaan ki ŋān̄ puee: 8, 19, 33, 100, 103–105, 111, 113, 114, 117, 135, 136, 145–149.

2) Tibɔtiil laŋyi in poon bi ŋmàn̄ yii «Ti-Dindaan sá ubɔtee»: 47, 93, 96–99.

3) Bibɔtiibi laŋyi an dàkà yii ŋwimmeem min bi mēē ki tīī ubɔti àá min ubɔti u-ba mēēyee: 2, 18, 20, 21, 45, 72, 89, 101, 110, 144.

4) Ilan in bi gà ki kóò kunimbɔtidiinee: 15, 24.

5) Ilan in bin jɔ́ḿ Jeerusaleemee gèe. Isirayeel yab yaa nìn cá kí jī bijiŋaakpaambi bita bin bi nìn jīǹ dibindi poonee, bi nìn gà ilan gbanti ní. Jiŋaalib gbanti di sá Dilákatil jiŋaaliu nì Nnyɔmu jiŋaaliu nì Tantib jiŋaaliu: 84, 91, 121, 122.

6) Siiyɔn laŋyi pàkà mpaan ŋun ká diyimɔɔl Unimbɔti lēē bi máń u-diiku Jeerusaleem tiŋkinee: 46, 48, 76, 87, 132.

7) Ilan in bi ŋmàn̄ kí sòoǹ tibɔti tibee dù tibɔti tin Unimbɔti dī usaraaŋal ubɔ àá ubɔnaatil ubɔ pu ki kpáafì àá ki tīī u-nib u-marabee: 14, 50, 53, 75, 81, 95.

8) Ilan in bi cáa dàkà deedeedambee: 37, 49, 73, 78, 112, 127, 133. Bi ŋūǹ kí dū 1 nì 119 kí kūtì.

9 Unimbɔti nibul yaa bí dinimbinaamandinee laŋyi sòoǹ deedeedambi nín kūuntí ki yíì Unimbɔti dinimbinaamandi yuntiŋun puee ní: 12, 44, 58, 60, 74, 79, 80, 83, 85, 90, 94, 106, 108, 123, 126, 137.

10) Agìń nín pée bí a-ba a-ba puee (disàandi nì mbɔgaa nì iween nì bi nín cútí unil kí cùnnì kuyuŋuee puee...) ŋūǹ kí yàntī deedeedaan ń dāan̄ kí nyàab̀ dijòońdi Unimbɔti cee. Unil gìńdi nín yàntī ú dāá gbàam̀ puee laŋyi di wīikí: 5-7, 61, 63, 64, 69–71, 86, 88, 102, 109, 120, 130, 140–143.

11) Ijaam laŋyi sá in ní unil gà kí jāam̀ Unimbɔti u nín fīī-u àá u nín dū u-kpitii ki pú-u puee ní: 9-10, 30, 32, 34, 40.1–12, 92, 107, 116, 118.

12) Kí kúntée, Unimbɔti niliu dàkà u-pɔɔpindi nì u-gbansɔŋfiŋu ilan in ní bi yíì dimákal laŋyee poon ní: 3, 4, 11, 16, 23, 62, 131, 139.

Yeesu gāā Inyɔŋki laŋyi (Maar 14.26). U dī i-pu ki dàkā binib (Maar 12.10, 12.36), ki dū Ilan 118 nì 110 ki mēē (Maar 15.34.) U dū Ilan 22 nì 31 nyɔɔbuŋŋi ki dàkā Luuki 23.46 poon.

An yaa sá Inyɔŋki laŋyi poonaaa, Dipooŋkpikil gbɔnti tin kíǹee poonaaa, Dipoompɔndi poon ní an lèekī Kriisitoo nì u-falaabi ki dàkà (Ilan 22 nì 69 bí Maat 27.34–48 poon ŋfunyɔm tikpil). U-fìkititam nì Unimbɔti nín tīī-u tinyool puee bí Ilan 16, 110 nì 118 poon. Peetroo mun sòon̄ ilan gbanti pu Atuun 2 nì 4. Bi sòon̄ Inyɔŋki laŋyi pu Dipoompɔndi poon an jítì ŋfunyɔm dilaataal pu.

Isirayeel yab nì Yeesu Kriisitoo yab bipeekaabee (Atuun 4.24–26) nìn dū Inyɔŋki laŋyi ki mēē. Yeesu u-ba mun nìn dū-i ki mēē Unimbɔti. An puee a yaa bíi kàaǹ kugbɔŋu nee, á béé yii a ŋūǹ kí ká anyɔɔbun ŋin máaǹee kí dūú mèè Unimbɔti.