Alaŋkpan Gbɔŋku i

Alaŋkpan

gbɔŋku

Tibɔkilkaal

Bi kóoǹ alaŋkpan àá bi nín dàkà iciin puee ní ki kpáfì kpáfì ki ŋmàn̄ kugbɔŋu nee. Bi yíiń-ku ubɔti Saloomɔn laŋkpaŋŋi, kun puee Isirayeel tiŋkinee, úǹ ní bi yíì yii uciŋfitibaamɔn.

Bi ŋmàn̄ Alaŋkpan gbɔŋku min ní binib nìn néeń ki ŋmà dooooyee ŋwìiń nyalaŋki pú timmunee ní. Di sá yii ntimu gbantinee, an nìn páb́ yii unil ń dū tin u nyée kí dàkà binib ń nīn cáa nàatī tɔb ki cá jaanjaan. An kaa sá ŋyuntibaanti ní bi kpáfì kpáfì alaŋkpan ŋin kā kugbɔŋu nee poonee. Alaŋkpan gbɔŋku nee yākatì ajan ata ní.

- Dijampeepeekaal sá kii tibɔkilkaal tin sòoǹ alaŋkpan puee, ní ki bɔ́bití iciin tundi nì i-bɔti nín páb́ puee (ayil 1–9). Ŋfunyɔm tikpil dijandi nee poonee, iciin kpántì kii unilee, ní nlan ŋubɔ poonee (8.12-31), i lēē i-ba ki dàkā yii i nì Unimbɔti tūǹ ditundi.

- Dijanliliitiil poon ní kugbɔŋu nee bɔti baasii bí. Dijandi gbanti poon ní diyindi din bi pú kugbɔŋu nee nyánní (ayil 10-29). Di-poon ní bi nín kpáfì kpáfì Saloomɔn laŋkpaŋŋi puee bí (10.1–22.16 nì 25.1–29.27), ní kí kūtì bi nín kpáfì kpáfì biciŋfitiibi biba mun laŋkpaŋŋi puee (22.17–24.22 nì 24.23–34).

- Dijantataatiil (ayil 30–31) sòoǹ abɔtaa anaa ŋin nyáń a-ba a-bee pu. Abɔtaa ali poonee, biciŋfitiibi bin kaa sá Isirayeel yabee biba landɔkɔi nì bi-saŋkii ŋmàn̄ ki kā (30.1-14 nì 31.1-9).

Alaŋkpan gbɔŋku kaa sòoǹ Isirayeel nibul bɔti tin jítèe nì tin bí ki dòońee, kii Unimbɔti bɔti gbɔŋku poon tigban tiba nín sòoǹ puee. Tibɔti tin Alaŋkpan gbɔŋku nee dàkèe baasii sá ki tīī unil sá kamaa ní. Isaŋki in bi ŋmàn̄ ki ŋá ku-poonee sá kí tūtuǹ báà ŋma Unimbɔti ń kpòotī-u ú nīn bí min kítèe tikɔkɔ poon nì dipɔɔpindi. Iciin in kā kugbɔŋu nee poonee sá in ní unil dáań ki ká u-maŋfal wiiŋyi poonee ní. I dàkà tiŋman yii unil nín bí pu u-nijutiibi kansikinee nì u nín ŋáań u-wanti kɔkɔ puee nì unil naam min u jīǹee nóó tɔb ní. An kaa bútí binikpitib nì bigbaambi nì bigaajab biba ní bi kāntí nnaabu, ama ní deedeedambi nì biciŋfitiibi nì binib bin mɔ́tí biwɔfib puee bíǹ kāntí ipaati. Kugbɔŋu nee janliliitiil poonee, bi sòoǹ digàntil din bí deedeedambi nì binikpitib kansikinee bɔti ki bùsī. Deedeedaan di sá un di nóó marab bin Unimbɔti yóoǹ bi kpòotī unil u-maŋfal wiiŋyi poonee nì tin kɔkɔ māntìi túee nì binib kansikin bítamee, ní unikpiti sá un tafal kaa fātìi tɔ́ marab gbantee.

Ti yaa kàaǹ Alaŋkpan gbɔŋkuee, ti làá béé iciin in Isirayeel yab dáań ki ká bi-maŋfal wiiŋyi poonee tikpil. Ti làá béé min ní Isirayeel yab ciŋfitiibi dākafì tibɔti tin jítì kitiŋ pu dooyee, nì agìń ŋin binifoobi kántèe, nì ŋwiin kamaa bɔti nín nìn pée sá pu doooo jaanjaanee, ní kí ká yii tibɔti gbanti kɔkɔ sá ti mun yati ní díǹ pu nee.