Alaŋkpan Gbɔŋku 1

Alaŋkpan

gbɔŋku

1 Daafiidi jipɔɔn Saloomɔn un sá Isirayeel bɔtiuee laŋkpaŋŋi^a.

Kun pu ní bi ŋmàn̄ kugbɔŋu neeyee

2 Alaŋkpan nee yàntī unil ń béé iciin kí dàkà-u ú nīn nyí tibɔti tin cáá taapuee. 3 Ŋi yàntī unil ń ká didàkamɔntiil, kí nīn bí deedee, kí nīn cáá tibulcin ní kí nīn nóó ibaamɔn saŋŋu. 4 Ŋi yàntī sɔkɔmii nib ń nīn wálifì, ki tìì binipɔmbi dinyil nì nlandɔkɔ. 5 Uciŋfiti pílifí-ŋi ní ki mɔ̀tīi cíkití iciin, ní ŋi kpòotī unyil ki tàkantí nsammɔnti pu 6 ú ŋmā kí béé alaŋkpan nì ipɔɔn nì biciŋfitiibi bɔti tin bí dibalin bi lèekī ki dàkèe.

7 Á fàŋkì ti-Dindaan di sá iciin kílilaŋki^b. See bigbaambi tafal di kaa fātìi tɔ́ didàkal nì biciŋfitiibi saŋkii.

Á nīn nyí nì a-ba nì binaacimpɔmbi bin dī isaŋkpitee

8 M-jipɔɔn, pīlifì a-baa dàkal, taa kpèè a-na dàkatam fám. 9 Án di dāa sá kifuunyaaŋŋi ki cíkí a-yil, nì tiléeŋkaal tin a lá a-neenee. 10 M-jipɔɔn, bikpitiŋaliibi yaa là kí kīil̀-see, á taa kíí. 11 Bi yaa lī yii: «Dāan̄ kí nóó-ti tí cùú nákań nsanni, binib yaa jītée tí kpɔ̀-bi. Tí cùú píĺ kpaalaa kí cúú maanyiiba un kaa ŋá-ti tibee. 12 Tí yàntī bí sìntī ditaŋkpiilin nì bi-nimbiliŋ, bí kɔ́ dikaakulin nì bi-laafiyau. 13 Ti làá ká tiwan tin pɔ̄ɔ̄ kudaauee nì ti-bulifi. Ti làá gbéeǹ ti-dumpui nì tiwan tin ti fúkúl̀ee. 14 Sii mun wanti làá nīn bí poon, kun puee ti làá dū ti-kɔkɔ yati kí kpāfì dicilpu ní!» 15 M-jipɔɔn, taa nóó an nib gbanti, sii nì bi ń taa pèen̄ nsan. 16 Di sá yii bi sáń ki cá kí ŋá ikpiti ní, bi yáb̀ nnikpaakoon pu. 17 An sá fám ní bí píĺ kutaliŋŋu unoon nimbilin. 18 Ama bíǹ pīil̀ bi-ba ní kutaliŋŋu, bíǹ bi-ba maŋfal ní bi pīil̀ kpaalaabi. 19 Míǹ ní an sá ki tīī un kamaa yù bunaayubuee. Bu làá dāá lēē bin ni bu bée maŋfal.

Iciin yíì binib ki kpáafí-bi

20 Iciin^c bíi kūuntí mpɔn adan pu, i bí ki sòoǹ mpɔn mpaampiin pu. 21 Iciin kūuntí ki yíì binib sampaambi pu, i sòoǹ ki báakí tin i cáá kí lèe ntimu punyɔmmu nyɔkɔpu^d. 22 Iciin téeń ki lī yii: «Nimbi nnaatuumu làá nīn néeń inaatuu kí tin sāā ŋyunti ŋulɔŋu dee? Nimbi bibeeliliibee, ni làá nīn bèel̄-mi kí tin sāā ŋyunti ŋulɔŋu ní? Nimbi bigbaambi làá nīn ná dinyil kí tin sāā la? 23 Pīlifìmaan tin m cáá kí wòoǹ-nee. M làá yàntī m-fam ń kpákatí ni-pu ní kí yàntī ní béé m-bɔti. 24 Ama m yíì-ni ní naa pílifí, m tāntì m-ŋal ni-watil pú ní ni-kansikin báà ubɔ kaa fātìi tɔ́. 25 Ni fá m-saŋkii kɔkɔ, kaa kíí ḿ wòoǹ-ni. 26 Dinimbinaamandi yaa láa jéetì ni-puee, ma mun làá dāá lā-ni. Ni yaa láa kɔ́ dinyoondinee, m làá dāá bèel̀-ni. 27 Di sá yii ŋwindalee dinyoondi làá dāá jēetí ni-pu kii umɔfiintaayee. Dinimbinaamandi làá dāá jēetí ni-pu kii kunaakpaabuŋŋuee, ní kunimbaau nì nnaabu ń dāá kɔ́-ni an kaa cáá bí lì. 28 Niinee ni làá dāá yíiń-mi, ama maa làá dāá kíí-ni, ni làá dāá nyàab̀-mi, ama naa làá dāá ká-mi^e. 29 Kun puee ni ná dinyil, ní kaa lēē kí nīn fàŋkí ti-Dindaan. 30 Naa fōō m-saŋkii, kaa fātìi tɔ́ tin ní m kpáafì-nee. 31 Mimmee kun ní ni-bimbikpitim búĺee, kúǹ ní ni làá cā, atuŋkpiti ŋin ni bɔ́ntì ki làá ŋée di làá kpíiǹ-ni. 32 Di sá yii nnaatuumu nín kaa bífí iciin puee di làá kpɔ̀-mu, ní tiba nì tiba nín kaa ká bigbaambi puee di làá nàan̄-bi. 33 Ama un kamaa di yaa pílifì-mee làá nīn bí ŋgbansɔŋfin, ní kaa làá fàŋkì nnaabu.»