Uciŋfiti Gbɔŋku i

Uciŋfiti gbɔŋku

Tibɔkilkaal

A yaa kpátì kugbɔŋu neeyee, tin a làá péé kí kée di sá yii unil un ŋmàn̄-kuee lēē u-ba ki dàkā yii u sá uciŋfiti ní. Ama ti yaa kpēēyee, uciŋfiti gbanti úǹ nyáń u-ba nì biciŋfitiibi bin bɔti bi ŋmàn̄ ki ŋá Alaŋkpan gbɔŋku poonee. Di sá yii ugbaŋŋmal gbanti maŋfal wiiŋyi poonee, u dáań ki ká yii nnaam kaa sá tin yúntée, ní ŋyunti tikpilee, unil nín pɔ̄ɔntí pu kí ká-mèe sá fám ní. U bālifì u-ba yii ba pu ní unil nín bí dimaŋfalin dee? U là yii un kamaa yaa bíi kàaǹ kugbɔŋu neeyee ń bàlifì u-ba anyɔɔbumbaanti gbanti. Kii an nín ŋmàn̄ ki kā Yoob gbɔŋku poon puee, bi fātìi bíi kpākantí tibɔti tin unil nìn ŋūǹ kí gbìl̄ taapu sɔkɔmiiyee, ama bi nín sòon̄-tì puee nyáń u-ba u-ba. Ŋyunti ŋun Yoob bí ki lì yii falaa un unil jīǹee kaa cáá taapuee, Uciŋfiti gbɔŋku poon Ciŋfitiu úǹ ká yii bí lì yii unil bí nnaam poonee kaa cáá taapu.

Uciŋfiti nee bɔsòontam poonee, an bí kii unil nín cɔ́ŋkí kí nyàab̀ kí ká tin bí ki jītí kitiŋ pu dooyee ní. U lī ki gíti kūbitì kii bi nín kíikí nlan puee yii unil mɔŋŋu nì u-pɔ́ɔǹtam, an dàkà yii tinaacimpɔn nì tigaajati nì tinyool nì ditundi nì iciin nì tin bí deedeeyee kaa yúntí ní kaa cáá dimákal mun. Unil pɔbil pée dàn̄ ní yii ŋkúm bí ki làá dāá yòon̄-u ŋwindal, ní ibaamɔn kaa bí inifunaan kansikin, unil kaa ŋūǹ kí béé Unimbɔti nín bɔ́ntì tin kí ŋá duulinyanee. An di yì-tì ní unil dáb́ ní kaa ŋūǹ kí béé u-maŋfal wiiŋyi nín làá dāá kúntí puee. Tin bí nee di yàntī unil ń dàkafì kí béé mbimbim min u máaǹ kí nīn cáá duulinyanee.

Unimbɔti gbɔŋku poon laaba sòoǹ tibɔti tin ní Uciŋfiti bālifì bālifì nee kɔkɔ pu. Ama an ŋān̄ yii ti mun ń ŋmā kí ká ajan gbanti poonee tin di yì-tì ní ti-wunti yɔ̀tēe nì tin pu ti dàkafī ki gùgufēe. Unimbɔti gbɔŋku poon an ŋmàn̄ laaba yii unil kaa ŋūǹ kí nīn cáá fookiibaamɔn Unimbɔti pu ŋyunti ŋun waa nyɔ̄kɔfì ki kpēē tin poon nisaaleen bée.