Ubinaati bíi sáŋkí u-jipɔɔn ubɔti
31
1 Isaŋki in Maasa bɔtiu Leemuyeel fōō u-na ceeyee sèé:2 «Áù, m-jipɔɔn! Áù, m-poon biki! Áù, kibiki kin m mēē ki kée! 3 Taa dū a-pɔŋŋu kí fìtīǹ binimpoobi, taa nóó bin di yàntī bibɔtiibi wáŋkée. 4 Leemuyeel, bibɔtiibi kaa máaǹ kí nyɔ̀ ndaam, abɔtibil mun kaa máaǹ kí nyɔ̀ ndaam min pɔ̄ɔ̄yee. 5 Bi yaa nyùn̄ee, bi súntí marab pu, ní kaa ti mɔ́tí binandambi pu. 6 Dūmaan ndaam min pɔ̄ɔ̄yee kí tīī bin làá kpúee, kí dū ndamam kí tīī binib bin di bí kunimbaaunee. 7 Udaan yaa nyùn̄ee u làá súntí u-falaau pu, ní kaa ti làá téetí u-nimbaaku pu. 8 Siiyee, sii máaǹ kí sòoǹ kí tīī binib bin yaa sòoǹ baa pílifíǹ-bee, binib bin bi dūu fée. 9 Á nīn sòoǹ tibɔti nì ibaamɔn, kí mɔ̄tì biwɔfib nì binandambi pua."
Unimpu tiŋman pu yɔu
10 Ŋma ŋūǹ kí ká unimpu tiŋman pu yɔu? U pɔ̄ɔ̄ kudaau ki jítiǹ abeedimbil.
11 U-cal cáá u-pu dimákal. Waa ŋáań u-cal gaajati fám fám.
12 U-maŋfal wiiŋyi kɔkɔ poonee, u ŋáań u-cal tiŋan ŋma ní, waa ŋáań-u tikpitil.
13 U nyàab̀ ipii kuti nì gulfa un bí fálfalee, ní ki tūǹ ditundi nì difaŋgiil.
14 U sá kii meela un tūntí tinyampuwanee ní, u cāabìń u-jikaati ndandati ní.
15 U fìntī ntaafaabɔmbɔm ní. U ŋáań tijin kí tīī u-dicaŋku, ní ki tìì u-tɔntɔnliibi bi-tundi.
16 U kàal̀ ní kí dàkafì ní kí dā u-ba nì u-nimbiliŋ kusaau ní kí cóoń fiinyi sufii ku-pu.
17 U tūǹ ditundi nì difaŋgiil, waa ŋūǹ kí nīn kā iŋal jòon̄ fám.
18 U ká yii u-tundi còom̄-u tiŋan. U-fitilau pée wāĺ ní kunyeeu kɔkɔ ní u tūǹ ditundi.
19 U pée ŋúb́ kigulfajantilii u-ŋaan, ní ki ŋál̀ tiwan.
20 U pūǹ bisoodambi tiwan, ní ki tútúǹ binandambi.
21 Tiwool yuntiŋuee, waa fàŋkí u-dicaŋku pu, kun puee u-dicaŋkun yab kɔkɔ cáá tiwool bɔkutiŋ.
22 U lù u-ba ndoo pu satab, ní ki pèentí iŋaamɔnti in bí fálfal ki máǹ cínciŋee wanti.
23 Akpambal yaa kpáfèe, bi tìì u-cal tinyool. U-cal kútí bitindaŋkpilib pu bi kpáfí ki kpèé kitiŋ pu bɔti.
24 Unimpuee ŋál̀ tiwampeeŋkaal ki nyáfí, ki lù dambalab ki nyáfíǹ binyampoobi.
25 U cáá mpɔn ní binib tìì-u jilma, u cáá dimákal foolboon pu.
26 U sòoǹ nì iciin ní ki tìì isaŋkimɔnti nì tiniti.
27 U-nimbil cɔ́ tin kɔkɔ pée jītí u-dicaŋkunee pu, ní waa jīǹ tijin tin pu waa nyántì kutuntuŋuee.
28 U-biyaamu pàkà-u binib nimbiin, ní u-cal mun tìì-u tinyool.
29 U lì yii: «Binimpoobi tikpil bí ki sá tiŋman pu nimpoobi, ama sii jítiǹ bíǹ kɔkɔ!»
30 Unimpu un bí gbàlgbalgbalee ŋūǹ kí ŋmàtiǹ unil, ní kunyaaŋŋu mun kaa yúntí, ama unimpu un fàŋkí ti-Dindaanee di máaǹ tinyool.
31 Bi máaǹ kí tīī-u u-faŋgiil paati. Binib kɔkɔ máaǹ kí pàkà-u u-tundi pu.