Aguur nyɔɔbuŋŋi
30
1 Yaakee jipɔɔn Aguur nyɔɔbuŋŋi sèé. Uninja gbanti nín sòon̄ pu ki tùkū Itiyeel nì Itiyeel nì Ukaalee sèé:2 «Binib kansikinee, man di pée sá ugbaan,
maa cáá dinyil din unil máaǹ kí nīn cááyee.
3 Maa bífì iciin
in bàà làá yàntī ḿ béé Circirdaanee.
4 Ŋma di jɔ́m̀ yilpu ki fātìi sīntìń?
Ŋma di cúú kubuŋu ki ŋá u-ŋaan ki ká?
Ŋma di dū u-bɔkutil ki póob́ nnyim?
Ŋma di yóoǹ kitiŋ kpaanyɔmmu kɔkɔ?
Bi yíì udaan yii ba? Bi yíì u-jipɔɔn yii ba?
A yaa nyí á tùkù-maa!
5 «Unil ŋūǹ kí nīn máká Unimbɔti nyɔɔbuŋŋi kɔkɔ pu. U sá digbampɔɔl ní ki tīī bin di sáń ki kóò-uee. 6 Á taa kūtì tiba u-nyɔɔbuŋŋi pu. An yaa sá fám, u làá wòoǹ-si ní kí yíiń-si unyimɔndaan.
7 «M-Nimbɔtiu, tiwan tili ja pu ní m mèé-si, taa ŋmìntī-mi an wanti kí wàatī ḿ nín kpú. 8 Kàkatī mili mili bimbim nì inyimɔn kí wàatī-mi. Taa tīī-mi disool, kí taa tīī-mi tigaajati mun. Tīī-mi tin làá pée ŋmàntī ḿ jī kí nīn bée. 9 Di sá yii m yaa sá ugaajee, m fàtī m-boon kí tīī-si ní kí lì yii: «Ŋma di sá ti-Dindaan ní?» M yaa tí sá usoodaanee, m ŋūǹ kí cùú yɔ̀ ní kí bīil̀ sii m-Nimbɔtiu yindi.
10 «Taa sòoǹ kí bīil̀ uyumbu u-dindaan cee. An yaa kaa sá míǹ, u làá tɔ̄-si mbusu ní ikpiti in a ŋée ń gítí a-pu.
11 «Binib biba tòó bi-baabi mbusu, ní kaa mèé ki bìintí bi-nab pu.
12 «Binib biba yíì bi-ba circirdambi, ama ní kaa fíntì tijɔkɔndi tin bí bi-puee.
13 «Binib biba cáá dilambil bi-yiliŋ gáań, ní bi kpèé bin kíǹee fám.
14 «Binib biba nyiŋŋi sá kii ntàataajimu, ní bi nyɔɔkpaweeŋyi sá kii njimu. Bi tɔ̀ntī binandambi kitiŋ pu, ní ki kúntí biwɔfib binib kansikin.»
Alaŋkpan ŋin nóó ikaanee
15 Dikoosibil din nyù fatikuee cáá bisapɔmbi bili. Bi lì yii: «Tīī-mi! Tīī-mi!» Tiwan tita di bí kaa pée díkì, ní kunanaatiiu kun kaa lì yii: «An ŋmāntèe!»
16 Tíǹ di sá ditaŋkpiilin,
nì unimpuŋmaŋŋmanti,
nì kitiŋ kin pu utaa nì an kaa dɔ̄ee,
nì ŋŋmi ŋun wù an kaa cáá ŋu bál̀ee.
17 Unil un yaa bèel̄ u-baa, ní kaa fātìi tɔ́ u-nee, tilaagaal tin bí mbunnee làá lúkutí udaan nimbiliŋ, ní kaajiikub ń dāá jī-u.
18 Tiwan tita di bí ní ki jítì m-nyil pu, ní kunanaatiiu bí maa gbìl̀ ku-taapu.
19 Tíǹ di sá ukaabu un ŋàaǹ kutaa puee saŋŋu,
nì ukoobu un còom̄ ataŋkpee puee saŋŋu,
nì meela un dēē tiŋku nyim puee saŋŋu,
nì nsan ŋun uninja dì ki cá unimpu ceeyee.
20 Unimpu un nyáń u-cal boonee nín ŋáań puee sèé: U jīǹ ní kí pítí u-nyɔkɔ ní kí lì yii: «Maa ŋá ikpiti iba!»
21 Tiwan tita di bí ki cìŋkī kitiŋ, ní kunanaatiiu bí kàa là ki-nimbil ń ká.
22 Tíǹ di sá uyumbu ń kpántí ubɔti,
nì unil un kaa bí tibanee ń ká tijin kí jī kí díkí,
23 nì unimpu un kaa cáá mbimbimɔntiimee ń ká uninja kí mɔ̄ǹ,
nì unimpuyumbu ń fōō u-kpiliu paaŋŋu.
24 Tiwan tinaa di bí kitiŋ pu ki sá ŋwaŋwaamu, ama ní ki cáá iciin tikpil.
25 Icati kaa cáá mpɔn, ama i kōontí tijin dipeel pu ki kpáafí.
26 Kumooun jaŋgbeenapulii kaa cáá mpɔn, ama i ŋáań i-kɔŋkooŋyi ataŋkpee kansikin.
27 Inaakitoon kaa cáá ubɔti, ama ní ki nóó tɔb dikitil.
28 Dijikpal din unil ŋūǹ kí cúú nì u-ŋalee, ama di kóò dibeecindin.
29 Tiwan tita di bí ti-saŋkiŋŋi cáá kunyaaŋŋu, kunanaatiiu mun bí ki ŋān̄ an kaa cáá bí lì.
30 Tíǹ di sá gbikinti un sá ipeel kɔkɔ kansikin upɔɔl,
kaa fàŋkí tibee,
31 nì ukooja un di còom̄ u-taŋambiyaamu puee, nì uŋɔja
nì ubɔti un di līī u-janjaliibi nyɔkɔpuee.