Saloomɔn Laŋŋu i

Saloomɔn laŋŋu gbɔŋku

Tibɔkilkaal

Dineendi din bí uninja nì unimpu kansikinee sá Unimbɔti pɔl ní. Dineendi laŋŋu gbambiki kin poon ní bi tīisì binib bili nín néeń tɔb ki sòon̄ tin bi gbìl̀ bi-nee dàkà-ti Unimbɔti nín náań tiwan kɔkɔ puee maam ní. Bi nín sòon̄-tì puee, icoo kpá poon.

Kigbambiki nee nín kútì Unimbɔti nyɔɔbundi gbɔnti poonee ŋá binib tikpil bitii, ní ki gbíntìi gbèetī bin kàaǹ-kì díǹ pu nee. An pu ní doooo njaminee bi mākafì kí gbìl̄ Saloomɔn laŋŋu gbɔŋku kii mpèé ŋun bí Unimbɔti nì u-nibul kansikinee daaŋku.

Ti ŋūǹ kí cúú Saloomɔn laŋŋu gbɔŋku nee kí yàkatī ajancuku aluli pu, dineendi bɔti tin sòoǹ kaa bìitī tininjati nì tinimpool pu kí dūú dī nì kusaau daanti puee. Uninja nì unimpu nín sòoǹ ki kíikí tɔb pu, ki nyàab̀ tɔb pu, ki kāntí tɔb pu, ki wáŋkí tɔb pu kí fàtīí kíĺ ki bíi nyàab̀ tɔb puee. Ti gíti gbìl̀ biba mun pu. An nibee kaa dàkà-bi kulaŋŋaŋfitiiu. Bíǹ di sá bipikpaaliibi (unaacimpɔɔn bɔɔbi), usapɔɔn na àá u-niijab, nì u-bɔɔbi. Binib gbanti àá anikiti gbanti nyàab̄ kí kɔ́ binib bilee kansikin. Ama dineendi gbantee, baa yì-dì, an sá Unimbɔti pɔl ní ki tīī bin néeń tɔbee.