Saloomɔn laŋŋu gbɔŋku
1
1 Ilan kɔkɔ poonee, ŋunee di mɔ̄. Saloomɔn di ŋmàn̄-ŋu.Bibɔntiibi bili
Usapɔɔn
2 Kpàl̄-mi kí nákań a-ba,
móotí-mi!
A-neendi yàntī m gbéè
kii m nyùn̄ ndaamee,
3 ki mɔ̄ ki jítiǹ
a-talaalub sɔnsɔfiŋu.
A bí kii talaalumɔntee ní.
An pu ní bisapɔmbi
kɔkɔ là-si!
4 Kpáaǹ-mi kí cùnnì,
tí sāǹ dicilpu!
M-bɔtiu, cáá-mi
ki kɔ́ǹ a-diikun.
Niinee, sii puee,
ti làá nīn bí mmɔŋkpaanni.
Ti làá nyɔ̄ŋkì a-neendi din
nyàatī kii ndaamee.
Bisapɔmbi lafun cáá mbaamɔn
kí nīn néeń-si!
5 M sá unibɔn,
ama m cáá kunyaaŋŋu.
M-wunti bɔ̀ǹ jíbjib
kii Keedaar yab tantibee,
ki ŋān̄ kii iŋaamɔnti in sàkā
kubɔtinaakoou punyɔkɔpuee.
Jeerusaleem sapɔmbi,
6 ní taa kpèè m-wunti
nín bɔ̄ntì puee,
an sá ŋwìiń di gbáń-mi.
M-niijab di fōō m-pu diŋuul,
ní ki ŋá-mi mpɔn ḿ cīití bi-fiinyib.
Ama man m-ba fiinyibee,
maa cíitì!
7 Sii un m néeńee, tùkù-mi
la ní a kpàá a-picaŋkpuŋku ní?
Tùkù-mi ŋwìiń yaa píĺee laakin a cáǹ-i
i dɔ̀ ki ŋùŋfēe?
Mimmee maa làá nīn gíti tú ki yìiǹ
a-bɔɔbi picaŋkpunti cee.
Bipikpaaliibi
8 Unimpunyannyaan, a yaa kaa nyée,
nín̄ nóó ipii taaŋi,
kí kpàà a-ŋɔbiliŋ
bipikpaaliibi bimmu caŋin.
Unaacimpɔɔn
9 M-bɔɔn, m dū-si ki ŋmāntiǹ
utannyaan un dátí Faaroo tɔrɔkuee ní.
10 Falfatib bin a túuńee
tìì a-taŋkpunti kunyaaŋŋu.
A-leeŋkaati máaǹ a-neen.
Bipikpaaliibi
11 Ti làá dū sindaariya ní kí mɔ́ɔ́-si falfatib,
ní kí dū animbil kúti kí nyùntī.
Usapɔɔn
12 Ŋyunti ŋun m-bɔtiu kā ki jīǹee,
ní m-talaaluu sɔnsɔfiŋu ń gbìtī.
13 M-bɔɔn un m gbàl̄ee sá-mi
kii talaalu un bi yíì miiri
m dūu yāaǹ m-biiŋi kansikinee ní.
14 Un m néeńee bí kii
nsupumpukum min sɔ́fì
ki bí Eeni-Geedii fiinyi sufii kansikinee ní.
Unaacimpɔɔn
15 M-bɔɔn, a ŋān̄,
a baasii ŋān̄ ní!
A-nimbiliŋ bí kùlkul
kii dibeenanjilee!
Usapɔɔn
16 Sii un m néeńee,
a ŋān̄ kunyaaŋŋu.
Man nì sii dooŋu sɔ̀m̀
kii kumɔsɔŋuee ní.
17 Seedir dɔi ní bi dūu kpáá ki píń ti-diiku
ní ki cátì siipreesi dɔi apampan
ki kpáá ki bīiǹ agun pu.