2
1 Man sá Sarɔn timpiliŋki supumpukum ní,nsupumpukum min yú atantakanee.
Unaacimpɔɔn
2 Kii nsupumpukum min ŋān̄
ki yú ikuŋkum kansikinee,
míǹ ní m-bɔɔn bí
bisapɔmbi kansikin.
Usapɔɔn
3 Kii pɔɔmi subu nín yú
kubambaŋŋu sufii kansikin puee,
míǹ ní m-bɔɔn bí
binaacimpɔmbi kansikin.
M yaa kā u-booŋŋu taapuee
an mɔ̄ǹ-mi,
u-biliŋ mɔ̄ m-nyɔkɔn.
4 U cáá-mi ki kɔ́ǹ jiŋaal diikun.
Bi ŋmàn̄ m nín kā puee yilpu yii <Dineendi>.
5 «Cáaḿmaan-mi fiinyi subiliŋ kalaau malaa
ḿ ŋmɔ́ kí ká mpɔn,
kí tīī-mi pɔɔmi subiliŋ ḿ ŋmɔ́
m-pɔbil ń sɔ̀ŋkì.
Di sá yii m būǹ dineendi weeŋŋu ní.»
6 U-ŋaŋgan tíkí m-yil,
ní u-ŋaŋgiil pá m-caŋ pu.
Unaacimpɔɔn
7 Jeerusaleem sapɔmbi,
m dū ipeeman nì ikɔnii ki gbāam̀-ni,
ní taa fìntī m-neendi kí taa páb́-dì
kí nīn cí ŋyunti ŋun dì yaa lèe.
Úǹ di dòońee
Usapɔɔn
8 M gbìl̄ un m néeńee pu.
Kpèè úǹ di dòońee.
Úǹ di yùkufī ajoon
nì ŋgbantamu yilpuee.
9 Un m néeńee bí kii upeeman
àá dikɔniipɔmbilee ní.
Kpèè u bāań ki yúl̀ ti-diiku boon.
U lɔ́kɔtí ki kpèé tɔkɔla watil pú,
u gbōontí tɔkɔla laaŋkin ki kpèé.
10 U bí-mi yii:
«Yīkìm̄, m-bɔɔn
unyaan kí dāan̄.
11 Kuseeu jítì, utaa yúl̀
kutaa kɔ́ ndan.
12 Ti ká ti-satin mpumpukum bíi màtī.
Ilan yuntiŋu bāań.
Ti gbìl̄ nnanjimamu siim pu ti-satin.
13 Fiigi subipeepeekaaŋi bíi mántí.
Fiinyi pumpukum gbītì mi-sɔnsɔfiŋu.
Yīkìń, m-bɔɔn unyaan kí dāan̄.
14 Man beenanjil din páaǹ
di-diiku ntaŋkpalɔkɔnee,
ki bál̀ ntaŋkpafaŋfakaminee,
yàntī ḿ wāl̀ a-nimbiin,
yàntī ḿ gbìl̄ a-neen pu
di sá yii a-neen sɔ̀m̀ ki mɔ̄,
ní a-nimbiin ŋān̄.»
Ubinaati
15 Ní cúúmaan-ti iŋɔkɔ nee,
ŋŋɔkɔbiyaamu mun bí
ki ŋmóò ki bíiĺ fiinyibee.
Di sá yii ti-fiinyib bàà púkuḿ dee!
Usapɔɔn
16 Un m néeńee bí ki tīī-mi,
ní ma mun bí ki tīī-u.
U kpàá u-picaŋkpuŋku
mpumpukum kansikin ní.
17 Kí wàatī kutaa ń ŋàatī,
ní ibóon ń wāŋkèe,
fàtīí gítiń, sii un man néeńee.
Sāǹní kii upeemanee,
kii ukɔnii biki di sánní
ajoon ŋin yākatèe pu puee.