Saloomɔn Laŋŋu 3

M nyàab̀ un m néeńee ní

Usapɔɔn

3

1 Kunyeeu m-dooŋu puee

m nyàab̀ un m néeńee,

m nyàab̄-u, ama kaa ká-u.

2 M làá yīkì kí yìiǹ kitiŋin

nì adan pu nì sampaambi pu.

M nyàab̀ un m néeńee.

M nyàab̄-u, ama kaa ká-u.

3 M tūŋkí bijanjaliibi bin màntī

ki kpèé kitiŋee ki bàlifī-bi yii:

«Ni ká un m néeńeeee?»

4 M pūtì pée jítì bi-pu kpalaayee

ní ki dūu tú un m néeńee.

M cúú u-ŋal kaa ti líì-ŋu,

see m nín cáá-u ki kɔ́ǹ m-na diikun

laakin u cáá m-poolee.

5 «Jeerusaleem sapɔmbi,

m dū ipeeman nì ikɔnii ki gbāam̀-ni.

Ní taa fìntī m-neendi

kí taa páb́-dì kí nīn cí

ŋyunti ŋun dì yaa láa lèe.»

Usapɔɔn

6 Ŋma di nyánní kuteeun ki dòoń

kii ŋŋmi tagbanlooŋŋuee?

U sɔ́fìń miiri talaaluu nì bitalaalutuukaabi

nì talaalub bin kɔkɔ nyánní

laaba nì bi-bulifee.

7 An sá ubɔti Saloomɔn di pá

u-lambaŋki pu.

Bijanjaliibi bin cáá dipɔbilee

imuŋku ita māntìi tú-u.

Isirayeel baatandambi dee.

8 Bi-kɔkɔ ŋúb́ kitàataajiki

ki bɔ́ntì dikɔ̀ndi.

Báà ŋma gbìn̄ u-gbajau,

kí mɔ̄tì u-ba pu kunyeeu jaaku pu.

9 Saloomɔn yāntì bi dū Leebanɔn dɔi

ki kpáá-u dijakpatikaal.

10 Idɔ in tɔ́kɔ́ di-puee sá animbil kúti

ní laakin u dìntēe sá sindaariya,

ní ki dū bisatamambi binyannyaambi

ki ŋáĺ ki tākaǹ dijalee poon.

Jeerusaleem sapɔmbi

dū nì dineendi ní ki lùn̄ iŋaabu

ki nyáantì di-poon.

11 «Jeerusaleem sapɔmbi,

nyānnímaan kí dāá kpèè ubɔti Saloomɔn.

U cíkí kibeefuulii kin u-na nìn tīī-u

u-nimpucaal dalee!

Ŋwiin gbantee, u nìn bí dipɔɔpindin ní.»