Uciŋfiti Gbɔŋku 12

1 Taa súntí a-náanliu pu ŋyunti ŋun ní a dáá pɔ̀ɔǹee. Téetí u-pu kí wàatī ní iwiŋkpiti ń bàń, ŋyunti ŋun ní a làá dāá lì yii: «An kaa ti mɔ̄ǹ-mi ḿ nín bí dimaŋfalin.»

2 Ŋyunti gbantee,

ŋwìiń nì ŋwalifi làá dāá dūú kpántí dibɔmbɔndi,

ní uŋmal nì iŋmalbijaa kaa dāa gíti wāĺ,

ní utaa tin lì yii u nì ki báatée atagban fātìi lúntì.

3 Niinee udiciitil kíǹ ki jìkì tɔ́sí tɔsi,

ní bibaatandambi ń dūú pɔ́ĺ ki kíǹ ki bōō,

ní binimpoobi ń gbèen̄ dinanal bi nín kaa ti náaǹee pu,

ní bin gbōontí tɔkɔlabinee kaa ti cáá kunyaaŋŋu.

4 Niinee kudii kun punyɔkɔki túĺ didandi púee dūu pīiǹ,

ní baa ti gbìl̀ tinàti pu.

Kinɔmbiki gbēeǹ kaa ti bíi sūǹ,

ní baa ti gbìl̀ ilan pu.

5 Binib kíǹ ki fàŋkí kí dàb̄ kigbantaŋ pu,

ní dinyoondi bí nsan pu.

Tiyikpiti píil̀ kii nsupumpukumee,

ní tiwun dūu nyīŋfì kii unaakitoon di nyáń ki lítèe,

ní unil maŋfal ń lítí kii disubil di kītì ki lítèe.

Tiŋman ŋwiin bí ki dòoń báà ŋma làá kɔ́ dikaakulin

laakin sá u-kɔŋkooŋŋu njoolkaayee.

Ŋyunti gbantee, binib lālim̀ ki gbí didandi pu

kí sɔ̄ u-kpool.

6 Niinee ní animbil kúti ŋmibiki ń cúú tìl̄,

ní sindaariya sambil ń cúú yàaǹ,

ní dibool din poon nnyim gbée ń lítí kí wīī,

ní guuka ŋmiiŋu ń kútí ní ú jēetí lɔkɔn.

7 Niinee ní ntam ń fàtīí gítí kitiŋin laakin mì nyánnée,

ní kufoou ń fàtīí gítí Unimbɔti un tīī-kuee cee.

8 Uciŋfiti di lī yii: <Kubuŋu fám, kubuŋu fám, tikɔkɔ pée sá kii kubuŋuee ní.

Tibɔkuntikaal

9 Tin ti làá dūú kūtì tin bí nee puee di sá yii Uciŋfiti kaa dàkā yii u sá uciŋfiti ŋmaniŋma, ama u dàkā binib kun u nyée. U bɔ́ntì alaŋkpan tikpil, ki dākafì tiŋan ki nyàab̄ ŋi-taapu ki dɔ́ntì-ŋi. 10 Uciŋfiti pɔ́ɔǹ u-ba ki nyàab̄ anyɔɔbummɔɔn ní ki dūu ŋmàn̄ tibɔŋman. 11 Biciŋfitiibi nyɔɔbuŋŋi sá kii inyanyee ní, a lì kii akpakpaa ŋin bin ŋmàn̄ tigbɔnee dūu cóoǹee. Unimbɔti un sá upikpaabaantee di tìì tikɔkɔ. 12 M-jipɔɔn, á taa pée kūtì tiba. Á ŋmà tigbɔnee sá ditundi din kaa kúntée ní, ní kí bīfì tikpil muee gì tiwun.

13 Kí kúntí tin kɔkɔ bi sòon̄ neeyee, tin ti làá lèe sèé: Nín̄ fàŋkí Unimbɔti kí nīn tɔ́ u-marab. Tin unifoo kamaa máaǹ kí ŋée dee. 14 Di sá yii Unimbɔti làá dāá sòoǹ tin kɔkɔ ti ŋée bɔti, ki kpáaǹ atummɔnti nì atuŋkpiti ŋin ti ŋá dibalinee.