Uciŋfiti Gbɔŋku 11

Tí màkan̄ kí kpèè

1 Dū a-kpɔnɔu kí tɔ̄ nnyimin, di sá yii a làá dāá fàtīí ká-u iwiin iba boon. 2 Dū a-gaajati kí yóoń binib biluli kii binii cee, di sá yii aa nyí mbusu un di ŋūǹ kí dāá bàń kitiŋ puee.

3 Atagban yaa nyùn̄ nnyim ki díkée ní utaa ń kíĺ kí nīn bíi nì. Busubu ŋūǹ kí lítí ŋgiil pú àá ŋgan pú. Báà laakin ní bu yaa lítèe, niin ní bu làá nīn dɔ̄.

4 Ukpaal un fàŋkí kubuŋuee kaa kù kí bɔ̄l̀. Un fàŋkí utaayee kaa dāa kāntí kí cā.

5 Aa ŋūǹ kí béé an nín ŋáań pu ní kibiki ń náań ki-na poonee, kaa tí nyí laakin kufoou nyēeńee. Míǹ mbaantiim ní aa làá ŋmā kí gbìl̄ Unimbɔti nín tūǹ u-tundi puee taapu, úǹ un náań tikɔkɔee. 6 An puee á kíĺ kutaafaau kí kpɔ̀ kí bɔ̄l̀ a-wamboolii kí tɔ̄ ditundi kí jóotí-ku. Di sá yii aa nyí a-tuuŋŋi kansikin din làá bútí-see. An yaa yíì a ŋūǹ kí páatí a-tuuŋŋi kɔkɔ pu.

7 Ŋwalifi mɔ̄ dikpeel, ní an ŋān̄ unil ń nīn bí dimaŋfalin. 8 Unil yaa kāl̀ kitiŋ pu ki yúntèe, u máaǹ kí jī abin gbanti kɔkɔ pu. Tí téetí tin bí nee pu: dinimbinaamandi wiiŋyi di làá nīn wīikí, ní tin kɔkɔ dòońee sá kii kubuŋuee.

Tí jīmaan nnaam án taa nà-ti

9 Unaacimpɔɔn, jī a-naacimpɔnti kí nīn bí mmɔnni ŋyunti gbanti poon. Pée ŋá tin a lèe nì tin fáatiǹ-see. Ama á nīn nyí ŋwindal Unimbɔti làá dāá sòoǹ a-bɔti ki nóó nì tin kɔkɔ a ŋée. 10 Gɔ́ntí tin kamaa ŋūǹ kí yàntī á kɔ́ kunimbaaunee, kí kàkatī tin kɔkɔ pée ŋūǹ kí cáań-si igbaŋweenee. Di sá yii tinaacimpɔn nì tiyikpibɔn yuntiŋu jītí malaa ní^a.