Uciŋfiti Gbɔŋku 10

1 Isii yaa jéetì talaalu kpam poonee, i yàntī mí nūukì ní kí bīil̀. Míǹ ní digbaandi fiii bíiĺ iciin nì tinyool. 2 Uciŋfiti dàkafī tiŋan ní, ama ugbaan úǹ kaa gbìl̀ tibɔti taapu.

3 Ugbaan yaa bíi còom̄ didandi puee, kii nlandɔkɔmɔnti nín kaa bí u-yilin puee, un kamaa yaa ká-uee béetí yii u sá ugbaan ní.

4 A-kpiliu yaa gíí a-pu diŋuulee, taa dū a-tundi kí fá. A yaa cúú a-ba, an yàntī á taa kɔ́ diyintikpaandi poon.

5 Ubɔti mun ŋūǹ kí yìntī. Míǹ ní m dáań ki ká dimuuldi kitiŋ nee pu. 6 Ŋyunti ŋubɔee, bi dù ugbaan ní kí kàan̄ mpaaŋkpaan pu, ní kí dū ntuŋwaamu kí ŋúbíǹ biniŋmambi. 7 M ká iyumbu kā itaamu pu ama ní binikpaambi còom̄ ataa pu fám kii iyumbuee.

8 Unil yaa bíi gbì mbòóyee, u ŋūǹ kí dāá jēetí ŋu-poon, ukoobu ŋūǹ kí jú un bíi wìil̄ digundee^a. 9 Unil yaa bíi kpìkitī ataŋkpeeyee, ŋi ŋūǹ kí tīī-u tiweendi, míǹ ní un bíi látí idɔee, an ŋūǹ ki cáań-u in bí iwa.

10 Kicɔkɔ yaa gbītì ní baa lōoǹ-kì, ní a cáa bíi tūǹ ditundee, asee á mɔ̀tīí dàkà dikpabil ní kí ŋmā kí dūú gāā tiba. Di sá yii iciin di yàntī tin unil bíi ŋáańee ń nyā nnyim.

11 Un cáá nnyɔkɔ ki cútí ikoobuee yaa yāntì ukoobu péé-u dijulee, u páatì u-nyɔkɔŋuee pu ba?

Taa nín̄ sòoǹ tikpil

12 Uciŋfiti yaa sòoǹee, an mɔ̄ dipilifil ní. Ama ugbaan nyɔɔbuŋŋi yàntī u wáŋkí ní. 13 U kífí kí sòoǹ tigbaambɔti ní kí dāá kúntíǹ tinifambɔti tin kaa cáá taapuee. 14 Ugbaan di sòoǹ ki sòoǹ kaa ŋmīlifí. Ama unil úǹ kaa nyí tin bí ki dòońee. Ŋma ŋūǹ kí tùkù u-juti tin bí ki dòoń udaan kpátam boonee? 15 Ugbaan di gì digìńdi fám. Waa kpáàa nyí gba u nín làá túĺ pu kí cù kitiŋinee.

16 Mbusu dɔ̄ ki cí kitiŋ kin bɔtiu sá campɔnti ní ki-kàliŋkpilib nyēē ki jīǹ jiŋaalib baabadalee! 17 Án nīn mɔ̄ǹ kitiŋ kin bɔtiu nyánní dibeecindin àá akpambal dicaŋkunee, ki-kàliŋkpilib jīǹ bi-jinti ŋyunti ŋun ní an máaǹ bí jēe ní. Bi jīǹ kí ká mpɔn ní, kaa sá kí nyɔ̀ kí gbí.

18 Uwutijoodaan diiku bɔ̀b̀ ní. Unil un kpàl̄ iŋal kaa tūǹ dibee, utaa nì u-diikun ní.

19 Bigaajab jīǹ jiŋaal kí kɔ̀ntī bi-nimbiliŋ ní. Ndaam tìì-bi mmɔn, ní animbil yàntī bí ká tin kɔkɔ bí lèe. 20 Á taa tɔ̄ ubɔti mbusu, báà a-pɔbilin. Á taa kpákáǹ binikpaambi, báà a-didooŋkaakun. Unoon ŋūǹ kí yòon̄ tin a sòon̄ee, kí dū tin a lēe kí māafì.