Uciŋfiti Gbɔŋku 9

1 M dākafì tin bí nee kɔkɔ pu ní tin m kée sèé: deedeedambi nì biciŋfitiibi nì bi-tuuŋŋi kɔkɔ kā Unimbɔti ŋaan ní. Binib kaa kpáàa nyí bi yaa làá ká dineendi àá kináŋ. Baa nyí kun dɔ̄ ki cí-bee. 2 Tibɔbaantiilee di dɔ̄ ki cí báà ŋma. Tin làá bàń deedeedaanee, tíǹ di làá bàń ukpitiŋal. Tin làá bàń unimɔntee, tíǹ di làá bàń unikpiti. Tin làá bàń circirdaanee, tíǹ di làá bàń un kaa bí circiree. Tin làá bàń un ŋáań saraabee, tíǹ di làá bàń un kaa ŋáańee. Digàntil diba kaa bí unimɔnti nì unikpiti kansikin, un pòontí Unimbɔti ipoonee nì un fàŋkí kí pòon̄ee. 3 Tibɔbaantiil di bàń báà ŋma, ní tin an cāabìńee kaa ŋān̄ kitiŋ pu doo. An di yì-tì ní ikpiti gbí binib pɔbiliŋin ní bi tūǹ agbaantuun, ní boonee bí kpú. 4 Ama unil un bí dimaŋfalinee ŋūǹ kí nīn cáá dimákal, kun puee kibɔkɔ kin bí dimaŋfalinee sɔ́ǹ gbikinti un kpíìyee. 5 Binifoobi di nyí yii bi bí ki làá kpú ŋwindal, ama bitaŋkpiibi bíǹ kaa ti nyí báà tiba pu. Baa ti cí kí fōō tipaal tiba, kun puee bi súntì bi-pu. 6 Tin bi nìn néeńee nì tin bi nìn née nì bi-poompooŋyi kɔkɔ wáŋkì. Baa ti pée bí kí kūtì tin bí ki jītí kitiŋ pu dooyee poon.

7 An puee jī a-jinti nì mmɔn, kí nyɔ̀ a-daam nì dipɔɔpindi, di sá yii a-tuuŋŋi fáatiǹ Unimbɔti dooooyee. 8 Á nīn pée pèentí ajiŋaabɔkuti, kí taa súntí kí yàaǹ a-yil pu talaalu. 9 Sii nì unimpu un a néeńee ń jī mmɔn a-maŋfal wiiŋyi in kaa náaǹ Unimbɔti tīī-si á dūú kàl̄ kitiŋ nee puee. Tiŋman, a-maŋfal wiiŋyi kaa náaǹ ní ditundi din a túń kitiŋ nee puee paati dee^a. 10 Ditundi din kamaa a pée ŋūǹ kí tɔ̄ee, tɔ̄-dì nì a-pɔŋŋu kɔkɔ. Di sá yii ditaŋkpiilin laakin a cée, aa ŋūǹ kí tɔ̄ dibaaa, kaa ŋūǹ kí dàkafàaa, dinyil kpáaa, iciin mun kpá.

Kaa sá tikɔkɔ poon ní iciin tūǹ ditundi

11 M gíti dáań ki ká kitiŋ pu doo nee tiba. An kaa sá ŋyunti kamaa ní bin yáb̀ee sáń kí jī ditaatandi kpaŋkpakantikuu. Bibaatandambi kaa tí jáà ki jīǹ ŋyunti kamaa. Biciŋfitiibi kaa tí kāntí ki jīǹ sɔkɔmii. Binyiliibi kaa tí sá bin cáá tigaajati ki jítiǹ bin kíǹee. Bin yiliŋ poon tūǹ ditundi tikpilee kaa tí sá bin ní bi tìì jilmee. Di sá yii bi-kɔkɔ kāntí nnaam nì nnaabu. 12 Tiŋman, unil kaa nyí tin làá bàń-uee. Kii kulaaŋŋu nín sàtī ijɔm pu, àá kii bi nín pīil̀ kí sàl̄ unoon puee, míǹ ní unil kā ní nnaabu ń dāá túuǹ-u.

13 M gíti dáań ki ká tiba kitiŋ nee pu ní an yāntì m gíti dākafì iciin pu. 14 Kitimbilii kiba di bí ní ki-nib kaa náaǹ báà fiii. Ní ubɔtikpaan ubɔ dɔ́miń kí já nì kì. U nìn píĺ píĺ kujaau talinti ki māntìi tú-kì. 15 Unandaan ubɔ nìn kóò kitimbiliiyee poon ki sá uciŋfiti. U bàà nìn ŋūǹ kí dū u-ciiŋyi kí fīī kitimbiliiyee, ama ní báà ubɔ kaa nìn téetì u-pu. 16 An pu ní man lī yii iciin sɔ́ǹ mpɔn, ama uciŋfiti yaa sá unandaanee, binib ŋèeǹ nì u ní, kaa pílifí tin u sòoǹee. 17 Bi pílifí uciŋfiti un sòoǹ sooooyee nyɔɔbuŋŋi ki jítiǹ ubɔti un tìì bigbaambi marab ki tátée. 18 Iciin sɔ́ǹ tijanjawan, ama ní ukpitiŋal ubaanti bíiĺ tiwammɔntiil tikpil.