8
1 Ubɔ kaa sá uciŋfiti, ubɔ kaa nyí kí lēē tin dòońee taapu kí lì. Ama unil ciiŋyi yàntī u-nimbiin ń bútí ní u-nimbiin nín bàà kūń puee ń cúú kpántí.Un tɔ́ ubɔtee sá uciŋfiti
2 Ubɔti yaa lī puee, á ŋá míǹ kii ti nín pūtì ki pōoǹ Unimbɔti nimbiin puee. 3 Á taa kàkatī a-ba kí wàatī-u malaa. Taa nín̄ nìkì ki ŋáań tin kaa fáatiǹ-uee, di sá yii u ŋáań u nín là puee ní. 4 Ubɔti nyɔɔbundi cáá mpɔn, ní ubɔ kaa ŋūǹ kí bàlifì-u yii: «Ba ní a ŋáań nee?». 5 Un yaa tɔ́ ubɔtee kpá kí kɔ́ tibɔtin. Ama uciŋfiti úǹ nyí tiŋan yii ibɔsoon yuntiŋu bí ki dòoń. 6 Tiŋman, ŋwindal bí, Unimbɔti làá dāá sòoǹ unil bɔti kí nóó nì atuun ŋin u túńee, ama nnaabukpaan dɔ̄ ki cí unil. 7 Unil kaa nyí tin bí ki dòońee, kaa nyí ŋyunti ŋun tì làá dāan̄ee. 8 Unil kaa yì u-maŋfal kí cúú-dì kí taa kpú. Ubɔ kaa tí cáá mpɔn kí sútí u-kúm wiiŋŋu. Kujaau yaa nyáńee, kuaa gàntī ubɔ, ní inikpiti kaa fìil̄ ukpitiŋal.
Nisaal falaau
9 M ká tíǹ gbanti kɔkɔ: m kpēē tin kɔkɔ pée bí ki jītí kitiŋ pu dooyee tiŋan. An sá laakin ní binib tɔ́kɔ́ bi-jutiibi pu ki ŋáań-bi tikpitilee. 10 M ká binikpitib kpíì bi bíi ŋáań bi-kpool. Binib gbanti nìn cáà kunimbɔtidiin múlmul. Bi nìn súntì Jeerusaleem tiŋkin atuŋkpiti ŋin kɔkɔ bi ŋée. Tíǹ mun pée tí sá kii bi nín jì kubuŋu puee ní. 11 Unil yaa ŋá ikpitee, waa fòol̄ ditafadaaldi dicilpu niin. An pu ní binib néeń ki tūǹ atuŋkpiti tikpil. 12 Unikpiti ŋūǹ kí ŋá ikpiti ŋfunyɔm dilaataal pu, ama ní kí kàl̄ kitiŋ pu kí yúntí. Ama m gíti nyí mun yii bin fàŋkí Unimbɔtee bí mmɔnni, kun puee bi cáá Unimbɔti faaŋku. 13 Unikpiti kaa làá nīn bí nnaamin. U làá jītí malaa kii mboonee, u-maŋfal wiiŋyi kaa làá nīn náaǹ, kun puee waa cáá Unimbɔti faaŋkua. 14 Tiba gíti bí kitiŋ pu doo kaa cáá taapu. Binib bí ki sá deedeedambi, ki fòol̄ binikpitib paati. Ní binikpitib bí ki fòol̄ deedeedambi nín máaǹ tipaal tiŋyee. M lī ki gíti bíi bùsī ki lì yii tíǹ sá kii bi nín jì kubuŋu puee ní.
15 An puee m tìì kunyannyaau kí jī mmɔn. Di sá yii kun pée ŋūǹ kí nīn sá nnaam ki tīī unil kitiŋ nee puee di sá ú jī, kí nyɔ̀ kí gbìl̄ mmɔn. Tíǹ di ŋūǹ kí céeǹ unil u-tundi poon iwiin in Unimbɔti tīī-u ú dūú kàl̄ kitiŋ pu dooyee. 16 M lēē m-pɔbil poon yii m làá nyàab̀ kí béé iciin, ní kí kpèè atuun ŋin kɔkɔ binib tūǹ kitiŋ pu doo kaa gèeǹ ŋwiimpu nì kunyeeuee soooo. 17 Niinee ní m ká Unimbɔti tuuŋŋi kɔkɔ. Unil kaa ŋūǹ kí nyàab̀ kí ká atuun ŋin bi tūǹ kitiŋ pu dooyee kɔkɔ. Min kamaa unil gì ki nyàab̀ee, u pée kpá kí ká. Baa gba uciŋfiti yaa bí yii u nyí, waa làá ŋmā kí ká.