Uciŋfiti Gbɔŋku 7

1 Diyimmɔntiil sɔ́ǹ talaalumɔnti^a, ní unil kúm dal sɔ́ǹ ŋwiin ŋun bi màl̄-uee.

2 Á kɔ́ dikpɔcindin sɔ́ǹ á kɔ́ dicindi din poon binib bí ki jīǹ jiŋaalee. Di sá yii unil sá kamaa kúntilaŋki di sá ŋkúm, ní an ŋān̄ yii unifoo kamaa ń nīn téetí an pu.

3 Kunimbaau sɔ́ǹ tilaal, di sá yii binib ŋūǹ kí nīn wāĺ yii a bí kunimbaaun, ama ní a-pɔbil bí mmɔnni.

4 Dikpɔcindin ní a kāntí uciŋfiti,

ama ugbaan úǹ néeń dijiŋaacindin ní.

5 Á kíí uciŋfiti ń wòoǹ-si sɔ́ǹ á nīn bí ki pílifí ugbaan gà ilan ki nyɔ́ŋkí-si. 6 Di sá yii ugbaan laati sá kii idɔ in bí dikumbool taapu ki pòol̄ee ní. An mun sá kii bi nín jì kubuŋu puee ní.

7 Uciŋfiti un cáá mpɔn ki wɔ́b̀ binibee ŋūǹ kí kpántí ugbaan, ní dinyɔɔŋeebil jim ŋūǹ kí yàntī u-pɔbil ń gáatí.

8 Tiwan kúntitam sɔ́ǹ ti-kíltam. An sɔ́ á nīn cáá kimɔtii ki jítiǹ á nīn cáá dibayoondi.

9 Taa nín̄ gífí diŋuul malaa malaa, di sá yii ugbaan di kaa pɔ̄ɔ̄ diŋuul digiil.

10 Taa lì yii: «Ba ŋá ní dooooyee nìn ŋān̄ ki jítiǹ kɔŋkɔnnee?» Un bàlifī mimmee kaa sá uciŋfiti. 11 Iciin cáá kudapɔɔu kii difakalee ní, i kèetī báà ŋma ní^b. 12 Iciin wúǹ unil pu kii animbilee ní. Bin cáá-iee kàal̀ kitiŋ pu kí yúntí ní. An pu ní an páb́ yii unil ń béé-i^c.

13 Kpèè ditundi din Unimbɔti túńee kɔkɔ. Ŋma di ŋūǹ kí tàntī tiwan tin u nyīī ki pɔ́ĺee?

14 Tikɔkɔ yaa còom̄ nì si tiŋanee, nín̄ bí dipɔɔpindin. An yaa kaa ti ŋān̄ee, á dàkafì. Unimbɔti di yàntī nnaam nì nnaabu dòoń, mimmee taa làá béé tin làá dāan̄ee.

15 M-maŋfal din kaa bí tiban nee poonee, m ká tikɔkɔ. M dáań ki ká yii deedeedaan kúù u-deedeeu pu, ní ukpitiŋal bí dimaŋfalin u-kpitii pu. 16 Taa nín̄ dàkafī yii a sá deedeedaan tikpil, kí taa nín̄ yíì a-ba uciŋfiti. Ba pu ní a là kí bīil̀ a-ba? 17 Taa dū a-ba kí líiǹ ikpiti diŋál, kí taa nín̄ sá ugbaan. Ba pu ní a là kí kpú kaa bàn̄ a-wiiŋŋu? 18 An ŋān̄ á nīn ŋúb́ isaŋki gbanti liitil, di sá yii unil un fàŋkí Unimbɔtee di ŋūǹ kí ŋá tibɔti gbanti liitil.

19 Iciin yàntī uciŋfiti cáá mpɔn ki jítiǹ gɔminab saalaa bin kpáfì ki kpòotī kitimbaantiiyee.

20 Deedeedaan ubɔ pée kpá kitiŋ pu doo kí lì yii úǹ ŋūǹ kí ŋá tiŋan kí taa yìntī^d.

21 Taa nín̄ pílifí tin kɔkɔ binib sòoǹee. Mimmee aa dāa gbìl̀ a-tɔntɔnliu sòoǹ ki bíiĺ-si. 22 Sii a-ba mun pée nyí yii iyunti iba poonee, a sòon̄ ki bíil̀ biba.

23 Tin bí nee kɔkɔee, m dū iciin ki mākaǹ ki kpēē. M lī yii: «M làá nīn cáá iciin», ama ní i dáá gbíntìi dátiǹ-mi. 24 Ŋma di ŋūǹ kí gbìl̄ tin nyáń ki bée taapu? An dátiǹ-ti ní ki nyóò lúkú luku. 25 Niinee m dū m-ba ki tīī kí nyàab̀ kí béé kun di sá iciinee. M nyàab̄ kí gbìl̄ kun pu ní tiwan dòoń ki jītée. M bífì ki béè mun yii ntoom nì digbaandi kɔkɔ sá kuwaatiiu ní. 26 M dáań ki ká tin bí nee: unimpu un sàtī bininjabee cāabìń ntuntun kii ŋkúmee ní. U-neendi sá kii kutaliŋŋuee ní, ní u-ŋalii sá kii ikusakee. Unil un bɔti fáatiǹ Unimbɔtee ŋmátí kí nyā u-ŋaan, ama un yaa sá unikpitee, asee ú ŋmā udaan^e. 27 Uciŋfiti lī yii: M cɔ́ŋkì ki kpēē tiwan kɔkɔ kubɔ kubɔ kí béé ti-taapu. 28 M nyàab̄ ki tin gīī kaa ŋúń ki béè. Bininjab kutuku poonee, m ká yii ubɔbɔ di pée sá uŋman. Ama binimpoobi kɔkɔ poonee, maa ká báà ubɔ. 29 Tin man dáań ki kée di sá yii Unimbɔti náań unil u bí deedee, ama ní unil nyàab̄ agìń tikpil ki tɔ́ u-ba pu.