Uciŋfiti Gbɔŋku 1

Uciŋfiti gbɔŋku

Tikɔkɔ sá fám ní

1 Daafiidi jipɔɔn Uciŋfiti un sá ubɔti Jeerusaleem tiŋkinee nyɔɔbuŋŋi sèé.

2 Uciŋfiti di lī yii:

Kubuŋu fám, kubuŋu fám,

tikɔkɔ pée sá kii kubuŋuee ní.

3 Nisaal bìǹ kitiŋ pu doo,

ama ipaati ilai ní u cáá?

4 Biba kúù

ní bi màal̀ biba,

ama ní kitiŋ kíǹ pée bí ki-laŋki.

5 Ŋwìiń nyēē, ŋwìiń jēetí,

ní kí ŋá malaa kí fàtīí gítí ŋu-nyalaŋki.

6 Kubuŋu jītí kí cù ŋgan pú,

ní kí màntī ki gítí ŋgiil pú.

Ku màntī ní kí màntī ní kí fàtīí màntī,

ní kí fàtīí gítí laakin ku kílińee.

7 Ibun kɔkɔ pùub̀ ki kóò tiŋku poon,

ama tiŋku kaa pée gbéè dalba dalba.

Laakin ní ibun pùub̀ ki kóòyee,

niin ní i gbíntìi pùub̀ ki kóò kaa gbèentí.

8 Anyɔɔbun kɔkɔ sátì an kaa cáá bí lì.

An kaa cáá yii ditafal pílifì tibɔti ki bál̀,

ní dinimbil mun kaa kpèé kí núutí.

9 Tin nìn pée bée di làá nīn pée bí.

Tin bi nìn pée ŋée ní bi làá fàtīí ŋá.

Tiba kaa bí ki sá tipɔn kitiŋ pu doo.

10 Ti kāntí tiwan tibee ní kí lì yii:

«Kpèè, tiwan nee sá tiwampɔn ní!»

Ama an wantee nìn pée bí dooooyee

ki wāatì ní timbi nín nyáń.

11 Timbee, ti súntí tin nìn jítì doooodooooyee pu.

Bin mun làá dāá páannée

làá dāá súntí tin làá dāá jītí timbi boonee pu.

Uciŋfiti bífì ki béè duulinya poon bɔti

12 Man Uciŋfiti jíń Isirayeel nibul pu dibeel Jeerusaleem tiŋkin. 13 M dū m-ciiŋyi kɔkɔ kí béé tin kɔkɔ bíi jītí kitiŋ puee kí gbìl̄ ti-taapu. An sá digìŋ́kpaandi ní Unimbɔti dūu túǹ nisaalib. 14 M ká tin kɔkɔ ní binib ŋáań kitiŋ pu dooyee. Ama tíǹ kɔkɔ sá fám ní, an bí kii unil nín jì kubuŋu puee ní.

15 Tiwan tin pɔ́ĺee, baa ŋūǹ kí tàntī-tì.

Tin kaa bée, baa ŋūǹ kí kàaǹ-tì.

16 M lī m-ban yii: «M béè iciin ki yāntì i cūtì nyɔkɔpu ki jítiǹ bibɔtiibi bin kɔkɔ péeǹ-mi ki kāl̀ dibeel Jeerusaleem tiŋkinee.» M béè iciin tikpilku, ki ká dinyil tiŋan pu. 17 M bífì ki béè tin di sá iciinee nì tin kaa sée, tin sá dinyil nì tin sá digbaandee. M dáań ki ká yii tíǹ kɔkɔ sá kii unil nín jì kubuŋu puee ní.

18 Iciin tikpil cāabìń agìń tikpil mun ní,

míǹ ní dinyil tikpil mun cāabìń diwumpildi.