Ilan 103

M làá jāam̀ ti-Dindaan

103

1 Daafiidi di ŋmàn̄ nlan nee.

M làá jāam̀ ti-Dindaan nì m-naŋki kɔkɔ,

m làá jāam̀ u-circir yindi nì m-pɔbil kɔkɔ.

2 M làá jāam̀ ti-Dindaan nì m-naŋki kɔkɔ,

kaa làá súntí u-ŋanti báà tiba pu.

3 Úǹ di cáá m-yìntitam kɔkɔ ki pūǹ-mi,

ní ki cāantí m-weeŋyi kɔkɔ.

4 U nyāntí-mi ŋkúm bookun,

ní ki cáá dineeŋkpaandi nì disaasɔl

ki cīkintí-mi kii kibeefuuliiyee.

5 U tìì-mi tiwammɔntiil m-puti poon,

u yàntī m fàtīi kpántí unipɔɔn kii ukaalunee.

6 Ti-Dindaan tūǹ deedee tuuŋŋi,

u sòoǹ bin kɔkɔ bi sàantée bɔti nì ibaamɔn.

7 U nìn yāntì Mooyiisi béè u-sàmbiyaamu,

ní Isirayeel yab béè u-tuŋkpaaŋŋi.

8 Ti-Dindaan poon mɔ̄ ní ki cáá kulaŋŋaŋfitiiu,

waa gífí diŋuul malaa ní u-neendi wīikí tikpilku^a.

9 Waa sòoǹ unil bɔti kaa gbèentí,

kaa tí díkì ubɔ pu an kaa kúntí.

10 Waa dátí ti-tafal kii ti-kpitii nín bàà máaǹ puee,

waa tí pà ti-yìntitam paati nín bàà máaǹ puee.

11 Kii kitiŋ nì kutagbɔŋu nín dátì nì tɔb puee,

míǹ ní dineeŋkpaandi din u cáá bin fàŋkí-uee puee wīikí.

12 Kii ŋwìiń nyalaŋki nín dátì nì ŋu-jeetilaŋki puee,

míǹ ní u kàkatī ti-kpitii ki wàatī-ti.

13 Kii ubaati poon nín mɔ̄ u-biyaamu pu puee,

míǹ ní ti-Dindaan mun poon mɔ̄ bin fàŋkí-uee pu.

14 Di sá yii úǹ nyí kun u dūu máń-tee,

waa súntí yii ntam ní ti sá.

15 Unilee, u-maŋfal wiiŋyi bí kii kumoouee ní,

kii tisatin supumpukumee, míǹ ní u púkuḿ.

16 Di sá yii kubuŋu yaa fáá nsupumpukumee, mì wáŋkí ní,

aa ti béetí laakin mì nìn bée.

17 Ama ti-Dindaan neeŋkpaandi

bí bin fàŋkí-uee pu ní ki cá talku.

U-deedeeu làá nīn bí bi-naantiibi pu,

18 ŋyunti ŋun bi yaa ŋúb́ u-poondi

ní ki dàkafī kí ŋá u-bɔkpaaŋi nín bí yii bí ŋá puee.

19 Ti-Dindaan dū u-beejal ki yóoǹ yilpu,

ní ki jīǹ dibeel tin kɔkɔ pée bée pu.

20 Jāam̀maan ti-Dindaan, nimbi u-tuuŋyi

in di cáá mpɔn ki ŋáań u-nyɔɔbundi nín lī puee,

ki tɔ́-u ŋyunti ŋun ni yaa gbìl̄ u-nyɔkɔpuee.

21 Jāam̀maan ti-Dindaan, nimbi u-janjakitiŋ kɔkɔ,

nimbi u-tɔntɔnliibi bin ŋáań u nín là puee.

22 Ní jāam̀maan ti-Dindaan nimbi u-wannaaŋkaati,

laakin kamaa ní ni yaa bí u-beelinee.

M làá jāam̀ ti-Dindaan nì m-naŋki kɔkɔ.