Dinimbinaamandi nì dimákal
102
1 Ufalaadaan un kaa ti cáá mpɔn ní ki tíminsí ti-Dindaan nimbiinee wimmeem.2 Ti-Dindaan, pīlifì m-wimmeem,
yàntī m-biilii ń bàń-si.
3 Á taa fàtī a-boon kí tīī-mi
dinimbinaamandi wiiŋŋu dal.
Kpòon̄ a-tafal kí pīlifiǹ-mi.
Daliŋkin m yaa yíiń-see,
á kíí-mi malaa.
4 M-maŋfal wiiŋyi bíi jītí kii nnyiimee,
m-kpabiŋ bíi wù kii amɔsiŋkoonee.
5 M-pɔbil bíi kōō kii kumoou kun bi gāāyee,
m súntí kí jī m-jinti gba.
6 Aniim ŋin m fátée puee,
m dúntìi kíǹ akpab ŋma ní.
7 Man nì kuteeun tulinjool di kíǹ ki náań,
m bí kii kitulinjakpatibooi kin bí adigbuŋkatinee ní.
8 Ŋgeem kaa ti bí-mi,
m kpántì kii unoon un tɔ́kɔ́ kudii yilpu u-babee ní.
9 M-nannanliibi sìí-mi ní baabadal,
bi bèel̄-mi ní ki cáá m-yindi ki tòó binib mbusu.
10 Ŋfantam di kpántì m-jinti,
nyinnyim ní m cáa ŋmàlintí m-nyɔkaatin.
11 A-ŋuul nì a-bum poonee,
a dúkutì-mi ki tɔ́ ki fá ndandati.
12 M-maŋfal wiiŋyi bíi jītí ki cá kii mboonee,
ní m bíi kōō kii kumoouee.
13 Ama sii ti-Dindaanee, a làá nīn kā dibeel ní kí nīn cá jaanjaan,
ní bi làá nīn téetí a-pu abin abin.
14 A làá yīkì kí dàkà Siiyɔn a-ŋanti,
di sá yii ŋyunti bàn̄ á sɔ̄ ki-saai,
tiŋman, ŋyunti lafun bàn̄.
15 Timbi a-tɔntɔnliibi néeń ki-taŋkpeeŋi,
ki-tam gba cútí-ti isaa.
16 Atimbun làá fàŋkì sii ti-Dindaan yindi,
ní kitiŋ pu bɔtiibi kɔkɔ ń fàŋkì a-nyooti.
17 Di sá yii ti-Dindaan làá fàtīí mā Siiyɔn tiŋki,
u làá dāá lēē u-ba kí dàkà u-nyooti poon.
18 U làá dāá pīlifiǹ bin bi fúkúl̀ee,
ní kaa làá dāá gbāfì bi-wimmeem.
19 Bí ŋmà tin bí nee kí síiń bin làá dāá páanní boonee,
ní dinibul din bi fātìi náańee ń dāá nyɔ̄ŋkì ti-Dindaan.
20 U gbóonní doooo yilpu u-circir kɔŋkooŋŋun ki kpēē,
ti-Dindaan gbóonní doooo yilpu ki kpēē kitiŋ
21 kí pīlifì bisarkadambi timinsii,
ní kí gbìntī bin an sá yii bi lēē kí kpɔ̀ee kí líí.
22 Niinee bi làá dāá sòoǹ ti-Dindaan yindi pu Siiyɔn tiŋkin,
ní kí dāá sòoǹ u-nyɔŋkii pu Jeerusaleem tiŋkin,
23 ŋyunti ŋun anibul nì abee yaa láa kpáfì
kí jāam̀ ti-Dindaanee.
24 M dáá bí nsanni ki cá
ní u bātì m-pɔŋŋu pu.
U bātì m-maŋfal wiiŋyi pu.
25 An pu ní m téeń mpɔn yii:
«M-Nimbɔtiu,
sii un bí kí nīn cá jaanjaanee,
taa yòon̄-mi m-maŋfal wiiŋyi kansikin.»
26 Dooooyee ní a náań kitiŋ,
a dū a-ŋalii ní ki náań yilpu.
27 Tíǹ gbanti kɔkɔ làá wāŋkì, ama sii làá nīn pée bí ní.
Kitiŋ nì yilpu làá sátí kii tiwampeeŋkaalee,
a làá kpántí-bi kii bi nín kpántí dibɔkutil puee ní,
ní bí pɔ̄ mpaan.
28 Ama siiyee, aa kpántí,
ní a-maŋfal wiiŋyi kaa kúntí muna.
29 Timbi a-tɔntɔnliibi biyaamu làá nīn cáá ŋkɔŋkoon,
ní mu-naantiibi ń nīn bí a-nimbiin.