Ilan 101

Ubɔti pōoǹ Unimbɔti nimbiin kí nīn tɔ́ u-marab

101

1 Daafiidi di ŋmàn̄ nlan nee.

M làá gāā ilan a-neeŋkpaandi nì a-deedeeu pu.

Sii ti-Dindaan ní m làá gāā ilan kí nyɔ̄ŋkì.

2 M làá nóó deedeedambi saŋŋu.

Ŋyunti ŋulɔŋu ní a làá dāan̄ m-cee ní?

- M làá nīn bí nì dipɔbil diba m-dicaŋkun.

3 Maa là tiwan tin kaa bí tibanee.

M ná bin fātì bi-boon ki tīī Unimbɔtee tuuŋŋi,

atuun gbanti kpá kí dáb́-mi.

4 Biibiidambi làá nīn dátiǹ-mi,

maa là kí béé ukpitiŋal gba.

5 Bin cāab̀ bi-jutiibi disambiil dibalinee,

m làá nàan̄-bi.

Bilambidambi nì bin yòontí bi-ba yilpuee,

maa gèetíǹ-bi.

6 M-nimbikpeeŋu làá nīn cɔ́ kitiŋ nee baamɔndambi pu,

ní bí nīn kàal̀ ki kɔ́l̀-mi.

Un còom̄ deedeedambi saŋkindee

di làá nīn bí m-tundin.

7 Un mùul̄ u-jutee kaa làá nīn cáá mpaan m-dicaŋkun.

M-nimbil kaa là kí wāl̀ un sòoǹ tinyimɔmbɔtee.

8 Kutaafaau kamaayee, m làá nīn nàantí

binikpitib bin kɔkɔ bí kitiŋ nee puee,

kí kúntí bikpitiŋaliibi kɔkɔ ti-Dindaan tiŋkin.