Unimbɔti unáanli, m jáaḿ-si
104
1 M làá jāam̀ ti-Dindaan nì m-naŋki kɔkɔ!Ti-Dindaan m-Nimbɔtiu, a sá ukpaan tikpilku!
Tinyool nì jilma ní a pēē,
2 ní ki dū ŋwalifi ki bīiǹ a-ba pu kii dibɔkutikpaandee.
A kpátì kutagbɔŋu kii tantee.
3 A máń a-kɔŋkooŋŋu inyiŋfi in bí yilpuee pu.
Atagban di sá-si janjatɔrɔku,
a còom̄ kubuŋu feeŋyi pu ní.
4 Kubuŋu di sá a-tuuŋyi,
ní aŋmilimbil sá a-tɔntɔnliibia.
5 A dū kitiŋ ki tɔ́kɔǹ ki-nyeel pu,
kì kpá kí cìŋkì ŋwindal.
6 A dū tiŋku ki bīiǹ ki-pu kii dibɔkutilee,
inyiŋfi nìn bīī ajoon pu.
7 Ama ní a kpātì i-pu ní i sáǹ ki kátì.
A téeń i-pu kii ditaadundee ní i sáǹ
8 ki dàb̄ ajoon, ki sīntì atantakan
ki nín cá laakin a bɔ́ntì ki síiǹ-iee.
9 A síiǹ-i kikpaanyɔkɔ kin iaa máaǹ kí pùub̀ kí jītée,
án nín làá ŋá pu i taa ti dāan̄ kí bìin̄ kitiŋ puee.
10 A cáǹ nnyim min nyēē anyimbulnimbilinee ibunni,
mì pùub̀ ajoon kansikin,
11 ní ipeel kɔkɔ dòoń ki nyù.
Niin ní kumooun mammu nyù.
12 Inoon kóò ki kɔ́ĺ-mì,
ní ki gà ilan tifaalin.
13 A yàntī utaa nyēeń yilpu ki nì ajoon pu,
a yàntī nnyim bà kitiŋ.
14 Sii di yàntī timool nyēē ní tiwaŋkuti kāntí ki jīǹ,
ní ki yàntī tin unil kùee nyēē.
Kitiŋ di tìì unil u-jikaati.
15 Kíǹ di tìì unil ndaam min u nyù an mɔ̄ǹ-uee,
ki tìì-u ŋkpam min u ŋmìtī u-nimbiin ŋān̄ee,
ní ki tìì-u tijin tin u jīǹ ki kāntí mpɔnee.
16 Ti-Dindaan sufii kāntí ntaanyim min máaǹee,
Leebanɔn sufii in u cóoǹ bi yíì seediree.
17 Inoon pāantí i-diti i-pu,
ní naakpaapiimbi kóò siipreesi sufii pu.
18 Njooŋɔjamu kóò ajoon ŋin fɔ̀kɔ̀ee pu,
ní itaŋkpalɔkɔ sá ŋkɔŋkoon ki tīī ijangbeenapul.
19 A náań uŋmal tí nīn cáa béetí iyunti,
nì ŋwìiń ŋu nyí kukúluu kun ŋu máaǹ kí jēetée.
20 A yaa cáań dibɔmbɔndee ní kunyeeu ń mɔ́,
ní kubambaŋŋun peelii kɔkɔ ń kíĺ ki bíi còom̄.
21 Agbikintipɔmbil mùuǹ ki nyàab̀ upeel kí ŋmɔ́,
ní ki bàlifī sii Unimbɔti á tīī-ŋi ŋi-jinti.
22 Ŋwìiń yaa nyáńee ní ŋí jītíi kɔ́
kí dòon̄ ŋi-diiŋŋin,
23 ní unil ń nyā kí búntí u-tundi,
kí gbàfì kí cáá sāā kujoou.
24 Ti-Dindaan, a-tuuŋŋi wīikéeee!
A dū iciin ní ki ŋá atuun gbanti kɔkɔ,
a-wannaaŋkaati di gbí kitiŋ kɔkɔ.
25 Kpèè tiŋku di dɔ̄ pàaa kí cée,
tiwaŋkuti tikpaandi nì ŋwaamu
gbí poon an kaa cáá ŋkaan.
26 Meelab tɔ́kɔ́ u-pu ki cá ki gítiń,
ní kupeebiliŋŋu Leefiyatan kun a náańee
bí u-poon ki gbíiĺ.
27 Tiwaŋkuti gbanti kɔkɔ máká a-pu
á tīī-tì tijin ŋyunti ŋun a máaǹee tí jī.
28 A yaa tīī-tèe ní tí yòon̄ kí jī,
a yaa tāntì a-ŋalee ní tí ká kí jī kí díkí.
29 Ama a yaa fātì a-boon ki tīī-tèe, ní tifaandi ń cúú-tì.
A yaa cúú ti-fooku ki lēēyee ní tí kpú
kí fàtīí gítí ntamin.
30 A yaa tīī-tì a-fookuee, a náań-tì dee,
ní kí fàtīí pɔ̀ntī tikɔkɔ kitiŋ pu.
31 Ti-Dindaan nyooti ń nīn bí ki cá jaanjaan!
An nīn mɔ̄ǹ ti-Dindaan u-tuuŋŋi pu!
32 U yaa kpēē kitiŋee, kì cìŋkī ní,
u yaa gbēē ajoonee, ŋi dùkù ní.
33 M-maŋfal wiiŋyi kɔkɔ poonee,
m làá gāā ilan kí pàkà ti-Dindaan,
iwiin in kíǹ-mi nee, m làá dūú gāā ilan kí nyɔ̄ŋkì m-Nimbɔtiu ní.
34 M-yaliŋkii ń nīn fáatiǹ-u.
Mamee, ti-Dindaan pu ní m làá nīn fàal̀.
35 Bikpitiŋaliibi ń kúntí kitiŋ pu,
binikpitib ń taa ti nín̄ bí!
Tiŋman, m làá jāam̀ sii ti-Dindaan!
Aleeluya, nyɔ̄ŋkìmaan ti-Dindaan!