Atuun 4

Bi cáá Peetroo nì Yoowaneesi ibɔsoon

1 Ŋyunti ŋun Peetroo nì Yoowaneesi nìn dáá bíi sòoǹ nì kunipaauee, ní bisaraaŋaliibi nì Sadusab nì bin cí kunimbɔtidiiyee kpiliu bāań. 2 An kaa nìn mɔ́ɔkiǹ-bi, kun puee bi bíi sòoǹ nì samaa Yeesu bɔti ki dàkà yii bitaŋkpiibi làá dāá fìkitī. 3 Ní bi cúú Peetroo nì Yoowaneesi ki cáa tɔ́ sarkan áli kutaa nì ku-wuntil, kun puee an nìn sá kujoou ní. 4 Nì míǹ kɔkɔee, bin nìn gbìl̄ bi-nyɔɔbuŋŋi gbantee tikpil nìn fōō ki kíí. Bi-wíiŋŋu nìn bàn̄ kii kutukub biŋmoo nyɔkɔm.

5 Kutaa wúntèe, Juuda yab yidambi nì bitindaŋkpilib nì bimaradakaliibi kpáfì Jeerusaleem. 6 Bin nìn bée di sá usaraaŋakpil Aani, nì Kaayiifi nì Yoowaneesi nì Aleekisandir nì bin kɔkɔwoooo nìn sá usaraaŋakpil dicaŋkunee. 7 Ní bi nyántì Peetroo nì Yoowaneesi ki yóoǹ bi-kansikin ní ki bālifì-bi yii: «Ŋma pɔŋŋu pu nì ŋma yindi pu ní ni ŋá míǹ ní?» 8 Niinee Unimbɔti Fam kpákatìń Peetroo pu, ní u kíí-bi yii: «Biyidambi nì bikpilib, m ŋá-ni gaafalaa. 9 Ni bàlifī kí béé díǹ tiŋan tin ní ti ŋá uninja neeyee taapu, nì an nín ŋá pu ní u ká dicáaǹdeeee? 10 Míǹ puee, ni-kɔkɔ ń béé tiŋan, ki kpáaǹ Isirayeel yab kɔkɔ, yii an sá Yeesu Kriisitoo Naasaareeti yɔu yindi pu ní u pɔ́ɔkì. An sá u-pɔŋŋu pu ní uninja nee yú ni-nimbiin nì u-gbampɔŋŋu nee. Nimbi di kpáá Yeesu ndɔpuntikaa pu, ama Unimbɔti fīkitì-u ditaŋkpiilin. 11 Úǹ pu ní an ŋmàn̄ Unimbɔti gbɔŋkun yii:

<Ditaŋkpal din nimbi bidimaliibi dūu fée

di kpántì ditaŋkpal din ŋúb́ kudii pɔŋŋuee^a.>

12 Baa ŋūǹ kí dī ubɔ pu kí ká difiil see Yeesu baba pu. Di sá yii taapu doo Unimbɔti kaa ti tīī ufiil ubɔ un pu timbi binib máaǹ kí dī kí ká difiilee.»

13 Biyidambee nín ká Peetroo nì Yoowaneesi sòoǹ nì tininjatee, an ŋá-bi maamaaci, kun puee bi ká yii bi sá binifantantiibi, kaa nyí kugbɔŋu. Ama bi béè yii bi nì Yeesu di nìn tāatí. 14 Bi nín ká uninja un pɔ́ɔkèe yú bi-ceeyee, baa ti ŋūǹ kí lì tiba. 15 Ní bi bí Peetroo nì Yoowaneesi ń nyā kubɔsoondiin kí wàatī-bi, ní ki kíǹ ki bàlifī tɔb yii: 16 «Ti làá nín ŋá binib nee mana dee? Kun puee Jeerusaleem yab kɔkɔ ká yii bi ŋá maamaacikpaan ubɔ, timbi ti-ba kaa ti ŋūǹ kí néé. 17 Ama, tibɔti gbanti ń taa gbìtī kí cù ndan samaa kɔkɔ ceeyee, tí dū mpɔmpiin kí pìim̄maan-bi nsan bí taa ti pée sòon̄ Yeesu yindi gbanti pu báà ubɔ cee.»

18 Niinee ní bi yíiń-bi ki pīiǹ-bi nsan bí taa ti sòoǹ kí dàkà binib Yeesu gbanti yindi pu báà fiii. 19 Ní Peetroo nì Yoowaneesi fātìi kíí-bi yii: «An ŋān̄ Unimbɔti nimbiin yii tí pīlifiǹ nimbi kí yàntī Unimbɔtaaa? Kíímaan-ti! 20 Ama timbee, taa ŋūǹ kí nīn ŋmí kí taa sòoǹ tin tin ti kée nì tin ti gbìl̄ee.» 21 Niinee ní bi fātìi tí kpīiǹ-bi ki gíiǹ-bi ki líì, kaa nyí bi nín làá ŋá pu kí dáaĺ bi-tafalee, kun puee samaa kɔkɔ nìn pàkà Unimbɔti tin bi nìn ŋée pu. 22 Uninja un nìn ká maamaaci cáaǹtam gbantee nìn jítì abin imuŋku ili pu.

Yeesu boonnooliibi mèé ki nyàab̀ mpɔn

23 Bi gíiǹ Peetroo nì Yoowaneesi ki líìyee, ní bi búntì bi-yab cee ní ki bàn̄ ki máafì-bi tin kɔkɔ bisaraaŋakpilib nì bikpilib līń-bee. 24 Bi gbìl̄ mimmee, bi-kɔkɔ kpáfì dicilpu kinyɔɔbaantii ki mēē Unimbɔti yii: «Ti-Dindaan, sii di náań yilpu nì taapu, kitiŋ nì tiŋku nì tin kɔkɔwoooo pée bée^b. 25 Sii di yāntì a-Circir Fam dī ti-naanja a-tɔntɔnliu Daafiidi pu ki sòon̄ yii:

<Ba ŋá ní atimbun yòontí ŋi-ba yilpu

ki sòoǹ tibɔfan míǹ?

Ba ŋá ní samaa cáá ilandɔkɔkpiti

in kaa làá tɔ̄ ditundee míǹ?

26 Duulinya bɔtiibi nì biyidambi kpáfì ki bóob́ dikɔ̀ndi

kí jáǹ ti-Dindaan Unimbɔti nì ubɔti un u lēēyee^c.>

27 An lafun ŋá míǹ, yii kitiŋ nee poon Eeroodi nì Pɔnsi Piilati nì binicambi nì Isirayeel yab kpáfì kí jáǹ a-circir tɔntɔnliu Yeesu, un a lēē u sá Meesiyayee^d. 28 Kujaau kun bi jáń nì Yeesuee yāntì bi ŋáaǹ tin kɔkɔwoooo a nìn lī ki yóoǹ a-pɔŋŋu nì a-ciiŋyi pu dooooyee. 29 Kɔŋkɔnnee, ti-Dindaan, kpèè bi nín lī yii bi làá ŋá-ti ntoomee puee, kí tūtuǹ timbi a-tɔntɔnliibi tí nīn sòoǹ a-bɔti nì tininjati. 30 Á tàntī a-ŋal kí dàkà a-pɔŋŋu, bibunliibi ń ká dicáaǹdi, maamaacib nì tidaandi ń ŋá a-circir tɔntɔnliu Yeesu yindi pu.» 31 Bi mēē ki dóòyee, dibɔbilin niinee kitiŋ cīŋkì, ní Circir Fam gbí bi-kɔkɔ mmɔntiim, ní bi kíĺ ki bíi sòoǹ Unimbɔti bɔti, kaa fàŋkí.

Bin fōō ki kííyee nyɔɔpeeŋu

32 Bin kɔkɔwoooo nìn fōō Yeesu ki kííyee nìn pēē kinyɔkɔ ní bi-pɔbiliŋ nìn sá diba. Ubɔ kaa nìn lì yii tin u cááyee sá u-baba yati, ama báà ŋma wanti nìn sá ki tīī bi-kɔkɔ ní. 33 Nì mpɔŋkpaan ní Yeesu kpambaliŋ nìn sòoǹ ki lèekī ti-Dindaan Yeesu fìkititam seerau, ní Unimbɔti biindi nìn bí bi-pu tikpil. 34 Bi-kansikinee, ubɔ kaa nìn bí ki sá usoodaan, kun puee bin nìn cáá akpaan àá adiinee nìn nyáfí ní ki cāabìń tin bi nyáfèe nimbiliŋ ki bīil̀ Yeesu kpambaliŋ nimbiin, 35 ní bi yàkatī bi-kansikin báà ŋma nín máaǹ miŋyee.

36 Míǹ ní Jooseefi ubɔ nìn bí ki sá Leefii naakookun ní bi màl̄-u Siipiri tiŋkin. Yeesu kpambaliŋ nìn páaǹ-u diyindi yii Baarnaabaasi, an taapu sá yii, un ŋmēentí binib ki tìì kunyannyaauee. 37 U nìn cáá bukpaa bubɔ ki dūu nyáfì, ní ki cáań animbil ki bíl̀ Yeesu kpambaliŋ nimbiin.