Atuun 5

Ananiyasi nì Safiira bɔti

1 Ama, uninja ubɔ nìn bí, bi yíì-u Ananiyasi. U nì u-nimpuu Safiira nìn kpáfì ki nyáfì bi-kpaatanti, 2 ní ki bātì animbil, ki kíǹ ŋin kíǹee ki cáa bíl̀ Yeesu kpambaliŋ nimbiin. U-nimpuu mun nìn nyí min u-cal ŋée. 3 Ní Peetroo bí yii: «Ananiyasi, ba ŋá ní a yāntì Sitaan jíń a-pɔbil poon mpaan míǹ^a? A mɔ́ntì Unimbɔti Fam ki bātì tikpaatan nimbiliŋ pu. 4 Sii di yì a-kpaatanti, a ŋūǹ kí dū-tì kí yóoń. A nín tí nyáfì-tèe, sii di yì an nimbiliŋ. Kin an ŋá mana ní a yāntì nlandɔkɔkpiti fōō mpaan a-pɔbil poon míǹ? An kaa sá binib ní a mɔ́ntì, an sá Unimbɔti.» 5 Ŋyunti ŋun Ananiyaasi gbìl̄ mimmee, ní u lítì ki kpíì. Ní tifaandi nìn kɔ́ bin kɔkɔwoooo gbìl̄ an bɔtee. 6 Ní binaacimpɔmbi yíkì ki dū sata ki bīiǹ-u, ní ki yōoǹ-u ki cáa síb́.

7 An yúntì ki bàn̄ kii tikúti titee, ní u-nimpuu kóoń, kaa kpáàa béè tin jítèe. 8 Ní Peetroo bālifì-u dinyɔɔbundi yii: «Tùkù-mi, ni nín nyáfì tikpaatan puee nimbiliŋ sɔ̀ɔɔ?» Ní u kíí yii: «Iiin, ti nín nyáfì puee dee.» 9 Niinee Peetroo bí-u yii: «Ba ŋá ní sii nì a-cal kpáfì ki cɔ́ŋkì ti-Dindaan Fam míǹ? Kpèè, bin síb́ a-calee di dòoń kupunyɔkɔpuee! Bi làá dāá yòon̄ si mun.» 10 Kpalaa niinee, ní u mun lítì Peetroo taaŋi taapu ki kpíì. Binaacimpɔmbi kóońee, ki ká u kpíì, ní bi yōoǹ u mun ki cáa síb́ ki kɔ́ĺ u-cal. 11 Tifaandi nìn kɔ́ Kriisitoo nikitil kɔkɔ nì bin kɔkɔ nìn pée gbìl̄ an bɔtee.

Bi nín nìn ŋáań maamaacib puee

12 Yeesu kpambaliŋ nìn ŋáań tidaandi nì maamaacib tikpil samaa kansikin. Bin fōō ki kííyee nìn kpáfí dicilpu dibɔɔbaantiil Saloomɔn kadantikuu taapu. 13 Tifaandi nìn kɔ́ bin kaa fōō ki kííyee, ní bi-kansikin báà ubɔ kaa ti là kí sútíí pìl̄-bi, ama nì míǹ kɔkɔee bi nìn pàkà-bi. 14 Bininjab nì binimpoobi bin nìn fòol̄ ti-Dindaan ki kíikée nìn wīikí tikpil, ki gbēentí ŋyunti kamaa, ní ki dūu ŋá dinikitikpaandi. 15 An yāntì áli gba binib cāabìń bibunliibi ki bīil̀ nlambamu nì tikampati pu adan pu, án nín làá ŋá pu Peetroo yaa jītée, u-jiliŋku kpaŋkpam ń lítí biba puee. 16 Binib tikpil mun nìn nyēeń ntimu mun kaa dátiǹ Jeerusaleemee, ki cāabìń bibunliibi nì bin pu arasiniibi nìn kā bi wáatèe, ní bi-kɔkɔ kāntí dicáaǹdi.

Bi sāaǹ Yeesu kpambaliŋ

17 Niinee usaraaŋakpil nì u-yab kɔkɔ, an dàkà yii Sadusab jandi, kíǹ ki ná Yeesu kpambaliŋ. 18 Bi nìn yíkìi cúú Yeesu kpambaliŋ ki pīiǹ-bi kudii. 19 Ama ní kunyeeuee ti-Dindaan tuuŋŋu ŋubɔ dɔ́miń ki pīitì kusarkadii punyɔmmu ki nyántì-bi, ní ki bí-bi yii: 20 «Cù kí yūĺmaan kunimbɔtidii poon kí dū dimaŋfal bɔti kɔkɔ kí sòoǹ, samaa ń gbìl̄.» 21 Bi gbìl̄ mimmee, ní ki péé kutaafaau ki kɔ́ kunimbɔtidiin ní ki kíĺ ki bíi dàkà Unimbɔti bɔti.

Niinee, usaraaŋakpil nì u-yab bāań ki yíiń bibɔsoonliibi kitil. Bi kpáfì ki tú bí yíiń Yeesu kpambaliŋee kusarkadiin. 22 Pilisib bàn̄ee, kaa ká-bi kusarkadiin, ní ki fātìi gítìń ki tùkū-bi yii: 23 «Ti bàn̄ee, kusarkadii pīī kpálkpal, ní soojab yú mpunyɔmu nyɔkɔpui, ní ti cúu pīitèe, báà ubɔ nì ubɔ kpá poon!» 24 Bi gbìl̄ mimmee, ní bin kpèé kunimbɔtidiiyee kpiliu nì bisaraaŋakpilib bākatì nì Yeesu kpambaliŋ nín wáŋkì puee, kun puee tiba yaa làá gíti bàń-bi tibɔti nee poon sɔ̀, baa nyí. 25 Ní ubɔ bāań ki bí-bi yii: «Binib bin ni cúú ki tɔ́ sarkanee di yú kunimbɔtidiin ki dàkà samaayee.»

26 Ní bin kpèé kunimbɔtidiiyee kpiliu nì u-pilisib cūtì ki cáań-bi soooo, kaa ŋá-bi mpɔn, kun puee bi fàŋkí samaa ń taa tɔ̄-bi ataŋkpee.

27 Bi cáań-bee, ní ki cáá-bi ki cūnnì bibɔsoonliibi kitil nimbiin. Ní usaraaŋakpil bālifì-bi tibɔti yii: 28 «Taa bí-ni yii ní taa ti sòoǹ diyindi din pu ni sòoǹ nee pu kpataaa? Kpèèmaan, díǹ pu nee ni yāntì ni-bɔti gbanti gbītì Jeerusaleem kɔkɔ! Mimmee, ni là timbi ń jī kijapaai nee kpuulool deeyaa^b!» 29 Ní Peetroo nì Yeesu kpambaliŋ ŋin kíǹee, kíí-u yii: «An máaǹ tí gbìl̄ Unimbɔti nyɔkɔ kí yàntī binib. 30 Nimbi di kpáá Yeesu ndɔpuntikaa pu ki kūū-u, ní ti-naanjab Nimbɔtiu fīkitì-u. 31 Unimbɔti dū-u ki kāaǹ u-ŋaŋgiil pú, ú nīn sá Ubɔti nì Ufiil ki tīī Isirayeel yab bí ŋmā kí fá bi-kpitii, Unimbɔti ń dūú pɔ̄-bi. 32 Timbi nìn ká ki sá biseeradambi an bɔti pu, ki kpáaǹ Circir Fam min Unimbɔti tìì bin tɔ́-uee.»

33 Bi gbìl̄ an bɔtee, ní ki fōō diŋuul ki là kí kpɔ̀ akpambal. 34 Ama Fariisab kansikin ubɔ nìn bí niin, bi yíì-u yii Gamaliyeel^c, u sá umaradakal un samaa kɔkɔwoooo nìn tɔ́ee. Kijapaayee nìn yáatìi yúl̀ bibɔsoonliibi kitil kansikin ki pú kinyɔkɔ yii bí dá láá nyāntí akpambalee. 35 Ní u bí-bi yii: «Isirayeel yab, ní kpèèmaan tiŋan nì tin ní ni là kí ŋá nì njapaamu nee! 36 An kaa yúntì ní un bi nìn yíì Teedasee yíkì ki yíì u-ba yii u sá unikpaan, ní binib bàn̄ kii tilaafati tili ki nóó-u. Ní bi kūū-u ní bin kɔkɔwoooo nìn nóó-uee yàl̄, báà ubɔ kaa ti kíǹ. 37 Úǹ boonee, ní Juudasi ugaaliileeja mun yíkì ŋyunti ŋun bi kàan̄ binibee, ní ki dáaliń kunipaau ki gíiǹ u-jandi pú. Ní bi kūū u mun ní bin kɔkɔwoooo nìn nóó-uee yàl̄. 38 Míǹ puee, tin m cáá ki làá tùkù-nee di sá yii, ní càntīmaan binib nee kí taa ŋá-bi tiba, kun puee atuun ŋin bi ŋáań nee yaa nyánní binib cee, ŋi bí kí dāá kúntí. 39 Ama an yaa nyánní Unimbɔti cee, naa ŋūǹ kí pìin̄-bi nsan. Ní kpèèmaan tiŋan kí taa jáǹ Unimbɔti kujaau!» 40 Niinee, bi-kɔkɔ kpáfì ki gbìlīǹ-u ní ki yíiń Yeesu kpambaliŋ, ní ki gbáń-bi anaalab, ní ki bí-bi yii bí taa ti sòoǹ Yeesu yindi pu, ní ki gíiǹ-bi ki líì. 41 Nì dipɔɔpindi ní Yeesu kpambaliŋ nìn nyáń bibɔsoonliibi kitil nimbiin, kun puee Unimbɔti ŋá-bi tinyool ki yāntì bi jíń falaa Yeesu yindi pu. 42 Ní baabadal bi bí kunimbɔtidiin, nì binib dumpui ki sòoǹ ki dàkà tibɔmɔntiil tin sòoǹ Yeesu, Meesiya puee, kaa gbèentí.