Atuun 6

Bi lēē binib biluli bí nīn yàkatī tijin

1 Iwiin gbanti poonee Yeesu boonnooliibi wíiŋŋu nìn gbéeǹ, ní Juuda yab bin gbìl̀ Greeki sooŋyee bíi gbùkum̄ nì Juuda yab bin pée bí bi-dumpu dooooyee, yii baa tìì bíǹ kpiipoobi tiwan tin bi yàkatī kutaa sá kamaayee kii bi nín tìì bin béeyee puee. 2 Ní Yeesu kpambaliŋ saalaa nì alee yíiń biboonnooliibi kɔkɔ, ní ki bí-bi yii: «An kaa máaǹ tí yàntī Unimbɔti bɔti disoondi kí nīn kpèé tijin laŋki. 3 Míǹ puee, nnabiyaamu, lēēmaan ni-kansikin bininjab biluli bin pu báà ŋma nyí yii bi sá binimɔntiibee nì bin ni Circir Fam gbí tiŋanee, binib bin cáá iciinee, tí dū ditundi gbanti kí ŋúbiǹ-bi. 4 Mimmee, timbi kāntí mpaan kí dū ti-yuntiŋu kɔkɔ kí mèè ŋwimmeem kí sòoǹ Unimbɔti bɔti tin sá ti-tundee.» 5 Tibɔti gbanti mɔ́ɔkiǹ samaa kɔkɔ, ní bi lēē Eetiyeen, un nìn fōō ki kíí tikpil Circir Fam bí u-ni tiŋan puee, nì Fiiliipi nì Prookɔɔr nì Niikanɔɔr nì Tiimɔn nì Paameenasi nì Niikoolaa un sá Antiyɔɔsi ki fōō Juuda yab marabee. 6 Bi cáań-bi ki dàkā Yeesu kpambaliŋ, ní akpambalee mēē Unimbɔti ki tīī-bi, ní ki dū bi-ŋalii ki páaǹ bi-pu. 7 Unimbɔti nyɔɔbundi mɔ̀tīi gbìtī ajan kɔkɔ, ní Yeesu boonnooliibi mɔ̀tīi wīintí tikpil Jeerusaleem tiŋkin, ki kpáaǹ bisaraaŋaliibi tikpil nìn fòol̄ Yeesu bɔti ki kíikí.

Bi cúú Eetiyeen

8 Unimbɔti nìn pú Eetiyeen diyimɔɔl nì mpɔn tikpil, ní u nìn ŋáań maamaacikpaambi nì tidaandi samaa kansikin. 9 Dikitil din bi nìn yíì iyumbu in bi líìyee kitilee nib nìn yíkì ki bíi kpākantí Eetiyeen. Bi nìn sá Juuda yab bin nyánní Siireen nì Aleekisandirii nì Siilisii nì Asiiyee ní. 10 Ama baa nìn ŋūǹ kí sòoǹ kí líí-u, iciin in Circir Fam nìn yàntī u sòoǹee pu. 11 Míǹ puee bi tīī njapaamu mubɔ tiba dibalin bí lì yii: «Ti gbìl̄ u sòoǹ tibɔti ki bíiĺ Mooyiisi nì Unimbɔti yindi^a.» 12 Ní an cúú kunipaauee poon ki kūtì ki kpáaǹ bitindaŋkpilib nì bimaradakaliibi, ní bi cūtìi cúuń-u mpɔn ki cáań bibɔsoonliibi kitil nimbiin. 13 Ní bi yāntì binib biba mɔ́ntì nnyimɔn u-pu yii: «Uninja nee pée sòoǹ kaa gbèentí ki bíiĺ kunimbɔtidii nee nì Mooyiisi marab, 14 kun puee timbi gbìl̄ u bí yii Yeesu Naasaareeti yɔu nee làá kpìtī kunimbɔtidii nee kí kpántí akoobil ŋin Mooyiisi nìn tīī ti-naanjabee.» 15 Bibɔsoonliibi bin nìn kēe kɔkɔ dū bi-nimbikpeeŋu ki báaǹ Eetiyeen pu, ní ki ká yii u-nimbiin kpántì kii Unimbɔti tuuŋŋu nimbiinee.