Atuun 7

Eetiyeen nyɔɔbuŋŋi

1 Ní usaraaŋakpil bālifì-u yii: «An sá míǹ tiŋmanaaa?» 2 Ní Eetiyeen kíí-u yii: «Nimbi m-baabi nì m-nabiyaamu, m ŋá-ni gaafalaa. Pīlifìmaan! Unimbɔti tinyooldaan dɔ́miń ti-naanja Abraam cee ŋyunti ŋun u dáá bí Meesoopootamiiyee, ki wāatì ní u nín kɔ́ Kaaran, 3 ní ki bí-u yii: <Nyā a-tiŋkin nì a-dicaŋkun kí cù kitiŋ kin m làá dàkà-see ni.> 4 Ní u nyáń Kaldee tiŋkin ní ki cūtì ki kóò Kaaran tiŋkin. U-baa kúm boonee ní Unimbɔti cáań-u kitiŋ kin poon ni bí nee. 5 Waa nìn tīī-u kitiŋ nee poon dijandi báà diba, áli gba waa nìn cáá tikpaatan wāā ki bàn̄ u-tabɔbil. Unimbɔti pōoǹ-u yii u làá dū kitiŋ gbanti kí tīī-u, án kpántí úǹ nì u-naantiibi kɔkɔ wanti. Míǹ gbee, Abraam kaa nìn dáá cáá kibiki. 6 Unimbɔti bí-u yii: <A-naantiibi làá nīn sá binicambi kitiŋ kiban, kí kpántí iyumbu, bí sàaǹ-bi áli abin tilaafati tili.> 7 Unimbɔti gíti lī-u yii: <Ama kitiŋ kin yab làá dāá sàaǹ-bi mimmee, mama m-ba di làá dāá dáaĺ bi-tafal. Boonee, a-naantiibee làá dāá nyā kitiŋ gbantin kí dāan̄ doo kí nīn nyɔ́ŋkí-mi^a.> 8 Niinee Unimbɔti tīī-u digiil marau din sá u-poondi daaŋkuee. Míǹ puee Abraam màl̄ Isaakee, ní ki gíí-u dikpancandi iwiin inii dal, ní Isaaki mun gíí Jaakɔb, ní Jaakɔb gíí ti-naanjab bin sá tinaakɔti saalaa nì tilee^b.

9 «Ti-naanjabee nìn ná Jooseefi, ní ki dū-u ki nyáfì bí cáá-u kí cùnnì Eejipiti. Ama Unimbɔti nìn bí u-cee 10 ki nyántì-u u-falaau kɔkɔ poon, ní ki tīī-u iciin ki yāntì u-bɔti fáatì Faaroo Eejipiti bɔtiu, ní Faaroo dū-u ki kāaǹ ú nīn sá gɔmina Eejipiti tiŋki kɔkɔ pu, ki kpáaǹ úǹ ubɔti cindi. 11 Niinee ní ŋkùm miba nyáń Eejipiti nì Kanaan timmu kɔkɔn. An nìn sá falaakpaan ní. Ti-naanjab kaa nìn kāntí tiba kí jī. 12 Jaakɔb nín nìn gbìl̄ yii tijikaal bí Eejipitee, ní u tú ti-naanjab mpeepeekaam niin. 13 Nliliitiimee ní Jooseefi yāntì u-nabiyaamu béè-u, ní Faaroo béè kudicaŋu kun poon ní Jooseefi sée. 14 Niinee ní Jooseefi tú bí cáań u-baa Jaakɔb nì u-samaau kɔkɔ: bi nìn sá binib biŋmoo kpá imuŋku inaa. 15 Jaakɔb cūtì Eejipitee, ní ki tin kpíì niin. Míǹ ní ti-naanjab mun kpíì niin. 16 Ní bi yōoǹ bi-wunti ki cáa cūnnì Siikeem, ki tin síb́ dikaakul din Abraam nìn dá nì animbil Amɔɔr biyaamu cee Siikeemee^c.

17 «Ŋyunti ŋun an tóob́ Unimbɔti ń ŋá kii u nín nìn pōoǹ pu ki tīī Abraamee, ní Isirayeel yab būtì ki wíiǹ Eejipiti tiŋkin. 18 Ní ubɔtipɔɔn kāl̀, kaa nyí Jooseefi. 19 U dū iciin ki ŋúń ti-naanjab, ní ki cáá-bi ki sàantí, áli ki yāntì bi nyāntí bi-biyaamu ki féeń mu kúù^d. 20 An yuntiŋu ní bi nìn màl̄ Mooyiisi un nìn ŋān̄ Unimbɔti ceeyee, ní bi kpíiǹ-u iŋmal ita u-baa diiku poon^e. 21 Bi dāa nyántì-u ki ŋman dūu fée, ní Faaroo bisal píí-u ki ŋúb́-u kii úǹ u-ba bikee^f. 22 An di yì-tì ní Mooyiisi bífì Eejipiti yab ciiŋyi kɔkɔ, ki nìn pɔ̄ɔ̄ dibɔsoondin ki kpáaǹ atuunni. 23 «U bàn̄ abin imuŋku ilee, ní an dɔ́miń u-pɔbil poon yii ú cù kí màntì u-nabiyaamu Isirayeel yab pu. 24 Niin ní u ká Ueejipitija ubɔ bí ki sàantí u-nabiki kiba, ní u mɔ́tì ki kútì u-nabiki kin bi bíi sàantée pu, ní ki kūū Ueejipitijee ki tɔ̀n̄ ipɔntoon. 25 U bàà nyí yii u-nabiyaamu làá béé yii úǹ pu ní Unimbɔti làá dī kí fīī-bi, ama baa ŋúń ki béè. 26 Kutaa wúntèe, u ká bi-ŋmaniŋma kansikin bili bíi jáà, ní u bíi sɔ̀ŋkī bi-pɔbiliŋ, 27 ní ki sáŋkì-bi yii: <M-bɔɔbi, ni sá nnabiyaamu ní. Ba ŋá ní ni sàantí tɔb míǹ?> 28 Ní un bíi sàantí u-jutee téé Mooyiisi ní ki fātìi bālifì-u yii: <Ŋma di kāaǹ-si ti-kpiliu nì ti-bɔsoonliu? A là kí kpɔ̀-mi kii a nín fu kūū Ueejipitija puee níii?> 29 An bɔti puee, Mooyiisi sáǹ ki cūtìi kíǹ ki kóò Madiyan tiŋkin. Niin ní u màl̄ mbininjabiyaamu muli^g.

30 «Abin imuŋku ili boonee, ní Unimbɔti tuuŋŋu dɔ́miń u-cee kisugbooi kin wù bìlbilee poon kuteeun, dijool din bi yíì Siinaayee caŋin. 31 Mooyiisi ká mimmee, ní an ŋá-u maamaaci. U sútì ki pìl̄ kí mɔ̀tīí kpèèyee, ní u gbìl̄ Unimbɔti neen lī yii: 32 <Man di sá a-naanjab Nimbɔtiu, Abraam nì Isaaki nì Jaakɔb Nimbɔtiu!> Ní Mooyiisi wunti kíǹ ki bíi jìkì, ní waa ti là kí kpèè niin. 33 Ní ti-Dindaan bí-u yii: <Tákatí a-naatakaŋ, kun puee kitiŋ kin pu a yú nee sá circir tiŋki ní. 34 M ká ki gíti ká falaa un poon ní m-samaau bí Eejipitee, ki gbìl̄ bi-yaliŋkii mun pu, ní m kpákatìń kí fīī-bi. Kɔŋkɔnnee, nín̄ cá, m làá tɔ̄-si Eejipiti^h.>

35 «Mooyiisi un Isirayeel yab nìn yíì ki bí yii: <Ŋma kāaǹ-si á nīn sá ti-kpiliu nì ti-bɔsoonliuee?> úǹ ní Unimbɔti túnní bi-cee ú nīn sá bi-bɔtiu kí nīn sá bi-fiiliu, ní ntuun ŋun u nìn ká kisugbooyinee nìn bí ki tútúǹ-u. 36 Úǹ di ŋáaǹ maamaacib nì tidaandi Eejipiti tiŋkin ki nyántì-bi niin, ki gíti ŋáaǹ maamaacib nì tidaandi Tikati mɔɔl poon, ki kpáaǹ kuteeun, laakin bi ŋá abin imuŋku ileeⁱ. 37 Mooyiisi gbanti ubaanti tùkū Isirayeel yab yii: <Unimbɔti làá dāá lēē ni-nabiyaamu kansikin ubɔ, ú nīn sá Unimbɔti bɔnaatiliu kii mamee^j.> 38 Ŋyunti ŋun samaa nìn kpáfì kuteeunee, Mooyiisi di nìn sí ntuun ŋun nìn sòoǹ nì u Siinaayi jool pu nì ti-naanjab kansikinee. Mooyiisi di nìn fōō dimaŋfal nyɔɔbuŋŋi Unimbɔti cee ki cáań ki tīī-ti^k. 39 «Ama ti-naanjab nìn yíì, kaa là kí pīlifiǹ-u. Bi-landɔkɔi gítì Eejipiti watil. 40 Ní bi bí Aarɔn yii: <Mā-ti awaa ŋin làá nīn līī ti-nyɔkɔpuee, kun puee Mooyiisi un nyántìń-ti Eejipiti tiŋkinee, taa nyí kun di bāań-uee.> 41 Ŋyunti gbantee ní bi mɔ́ɔ́ dinabil, ní ki ŋá saraa ki tīī-dì ní ki bí ki jīǹ jiŋaal kun bíǹ bi-ba mɔ́ɔ́ nì bi-ŋaliiyee pu^l. 42 Niinee, Unimbɔti fātì u-boon ki tīī-bi, ki dū-bi ki líiǹ iŋmalbijaa, bí nīn tòotī-i, kii Unimbɔti bɔnaatiliibi nín nìn ŋmàn̄ bi-gbɔnti poon puee yii:

<Unimbɔti bí yii, Isirayeel yab,

man ní ni nìn ŋá saraabi ki tīī

abin imuŋku ili ŋin ni nìn ŋá kuteeuneeee?

43 Aayee, kun puee ni nìn tūntí diwaal Mooleeki waadiiku

kun ni gāā nì satee, nì diwaal din bi yíì Rafanee ŋmalbijau.

An waaŋi ŋin ni nìn máń ki jáaḿee puee,

m làá cáá-ni Babiloon tiŋkin kuyuŋu^m.>

44 Kuteeunee, ti-naanjab nìn cáá tanti un poon ataŋkpee ali ŋin pu marab nìn ŋmàn̄ ki kēe bée. Di sá yii Unimbɔti nìn tùkū Mooyiisi yii ú gāā tanti kii un u dàkā-uee nín bí puee ní Mooyiisi lafun ŋá míǹ. 45 Boonee, ti-naanjab fōō tantee bi-baabi cee ki kpáàa nóó Joosuwa ki kɔ́ ntimu mun nibuliŋ Unimbɔti nìn jìn̄ bi-nyɔkɔpuee poon. Niin ní tanti gbanti yúl̀ ki dāa sāā Daafiidi yuntiŋuⁿ. 46 Daafiidi gbanti bɔti nìn fáatì Unimbɔti pɔbil, ní u mēē Unimbɔti yii ú càntī ú mā ŋkɔŋkoon kí tīī úǹ, bi-naanja Jaakɔb Nimbɔtiu^o. 47 Asee Saloomɔn di dāa máń kunimbɔtidii gbanti^p. 48 «Ama yilpu Nimbɔtiu kaa kóò adiin ŋin binib cáá bi-ŋalii ki māāyee. A lì kii Unimbɔti bɔnaatiliibi nín nìn lī puee, yii:

49 <Ti-Dindaan bí yii: Yilpu sá m-beejal,

ní kitiŋ sá m-taaŋi siinlaŋki,

kudii kulɔkɔ ní ni làá gíti mā-mi,

àá mpaan ŋulɔŋu ní m làá dāá kàl̄ kí ŋùŋfì?

50 An kaa sá mama m-ba di náań tin bí nee kɔkɔɔɔ^q?>»

51 Eetiyeen nìkī ki lī yii: «Nimbi binib nee yiliŋ pɔ̄ɔ̄, ni-pɔbiliŋ dátiǹ Unimbɔti, naa là kí pīlifiǹ-u mun. Baabadal ni jáà nì Circir Fam, kii ni-naanjab nín nìn ŋáań puee. 52 Bíǹ di nìn sāaǹ Unimbɔti bɔnaatiliibi kɔkɔ, ki kūū bin nìn sòon̄ ki yóoǹ yii Deedeedaan làá dāá dāan̄ee. Kɔŋkɔnnee ni nyáfì Yeesu Deedeedaanee ki kūū-u^r. 53 Nimbi di fōō Unimbɔti tuuŋŋu^s cee marab ki mun di kaa là kí ŋúb́-bi.»

Eetiyeen kúm

54 Bibɔsooŋkpaambee gbìl̄ mimmee, an wùn̄-bi, ní bi fōō Eetiyeen pu diŋuul tikpil ní bi-nyiŋŋi gà tɔb kàkaka. 55 Ama Circir Fam gbí Eetiyeen, ní u dū u-nimbikpeeŋu ki báaǹ yilpu, ki ká Unimbɔti nyooti ní Yeesu yú Unimbɔti ŋaŋgiil pú. 56 Ní u bí yii: «Kpèèmaan, m ká yilpu cúu pīitì, ní Yeesu Kinibiki yú Unimbɔti ŋaŋgiil pú!» 57 Ní bi yíkìi tátí mpɔn ki kpáà bi-tafaliŋ, ní bi-kɔkɔ yíkìń u-pu kílkil, 58 ki cúú-u ki dáaĺ-u ki nyántì kitiŋ kpaanceetiŋu, ní ki yáŋkì-u ataŋkpee ki kūū. Bin nìn lēē u-pu seerakpitee nìn cáań bi-bɔkutiŋ ki bíl̀ unaacimpɔɔn un bi nìn yíì Sɔɔlee cee. 59 Ŋyunti ŋun bi bíi yāŋkí Eetiyeen ataŋkpeeyee, ní u bíi mèé yii: «Ti-Dindaan Yeesu, fōō m-naŋki!» 60 Niinee ní Eetiyeen gbāaǹ ki téeń mpɔn yii: «Ti-Dindaan, taa dū bi-kpitii nee kí dáaĺ bi-tafal^t!» U lī míǹ ki dóòyee, ní ki sīntì.