Atuun 8

1 Sɔɔl úǹ nìn ká yii Eetiyeen lafun máaǹ ŋkúm gbanti.

Sɔɔl sāaǹ Kriisitoo nikitil

Ŋwiin gbantee, dinimbinaamaŋkpaandi nìn jéetì Kriisitoo nikitil din bí Jeerusaleemee pu. Bi-kɔkɔ yàl̄ ki búntì Juudee nì Samaarii tiŋgbammun, see Yeesu kpambaliŋ baba di nìn kíǹ. 2 Bininjab bin nìn nóó Unimbɔti deedeeyee di nìn síb́ Eetiyeen ní ki súń u-pu tikpil.

3 Sɔɔl úǹ là kí kúntí Kriisitoo nikitilee, ní ki kóò adiinni ki cútí bininjab nì binimpoobi kɔkɔ ki cáǹ ki tòó sarkan.

Fiiliipi sòon̄ Unimbɔti bɔti Samaarii tiŋkin

4 Bin nìn yàl̄ee nìn cá ajan sá kamaa ki sòoǹ Meesiya bɔmɔntiiti. 5 Fiiliipi nìn sīntì Samaarii tiŋkin ki bíi sòoǹ Kriisitoo bɔti. 6 Ŋyunti ŋun bi gbìl̄ Fiiliipi nyɔɔbundi, ki wāĺ maamaacib bin u nìn ŋáańee, samaa kɔkɔ nìn pílifí tin u sòoǹee tiŋan. 7 Kun puee arasiniibi nìn gbáà ibiil ki nyēē biwaatiibi tikpil pu, ní bifaliŋfaambi nì bideembi tikpil kántì dicáaǹdi. 8 Ní dipɔɔpiŋkpaandi nìn jéetì kitiŋ gbanti poon.

9 Uninja ubɔ nìn bí kitiŋ gbantin, bi yíì-u Siimɔn. Kijapaayee nìn sá ukpaŋkpanti ki yāntì an ŋáań Samaarii yab maamaaci u-kpaŋkpantiiku pu, ki yíì u-ba yii unikpaan. 10 Binikpaambi nì mbiyaamu kɔkɔ nìn pílifíǹ-u tiŋan, ní ki lì yii: «Unil nee di sá Unimbɔti pɔŋŋu ŋun bi yíì mpɔŋkpaanee.» 11 Bi nìn pílifíǹ-u tiŋan kun puee u nìn cáá u-kpaŋkpantiiku ki ŋáań maamaacib an yúntì. 12 Fiiliipi nìn sòon̄ tibɔmɔntiil tin sá Unimbɔti Beel nì Yeesu Kriisitoo bɔtee, ní bi fōō u-bɔti ki kíí, ní bininjab nì binimpoobi yāntì bi fùl̄-bi Unimbɔti nyim. 13 Siimɔn u-ba fōō ki kíí. Bi fùl̄-u ki dóòyee, waa ti là kí sútí kí wàatī Fiiliipi. U nín ká Fiiliipi ŋáań tidaandi nì maamaacikpaŋkpaambee, ní u bākatì tikpil.

14 Yeesu kpambaliŋ bí Jeerusaleem ki gbìl̄ yii Samaarii yab fōō Unimbɔti bɔti ki kííyee, ní bi lēē Peetroo nì Yoowaneesi ki túnní bi-cee. 15 Bi bāań Samaarii yab ceeyee, ní ki mēē ki tīī-bi bí ŋmā kí fōō Circir Fam, 16 kun puee Circir Fam kaa nìn dáá kpákatìń Samaarii yab báà ubɔ pu. Bi nìn pée fùl̄-bi nnyim ti-Dindaan Yeesu yindi ŋmaniŋma pu ní. 17 Ní Peetroo nì Yoowaneesi dū bi-ŋalii ki páaǹ Samaarii yab pu, ní bi fōō Circir Fam. 18 Siimɔn nín ká yii akpambal dū bi-ŋalii ki páaǹ bi-pu bi fōō Circir Famee, ní u tīī Peetroo nì Yoowaneesi animbil, 19 ní ki bí-bi yii: «Tīīmaan ma mun an pɔŋŋu, un pu ní m yaa dū m-ŋalii ki páaǹee, ú fōō Circir Fam.» 20 Ní Peetroo fātìi kíí-u yii: «A nín dākafì yii bi dù animbil kí dā Unimbɔti pɔl puee, si nì a-nimbiliŋee kɔkɔ ń ŋá fám! 21 Aa pée cáá tiba nì tiba tin bíi jītí nee poon. Kun puee a-pɔbil kaa bí deedee Unimbɔti nimbiin. 22 Fá a-landɔkɔkpitii kí mèè ti-Dindaan, an yaa yíì min min a dākafì a-pɔbilinee u làá dūú pɔ̄-si, 23 kun puee m wāĺ a-poon tū kii tiloolee ní ikpiti kusakai bá-si.» 24 Ní Siimɔn kíí-bi yii: «Gbàam̀maan ti-Dindaan ni-ba kí tīī-mi, án nín làá ŋá pu tin kɔkɔwoooo ni sòon̄ nee tiba ń taa bàń-mee!» 25 Peetroo nì Yoowaneesi lēekì seerab ki sòon̄ Unimbɔti bɔti ki dóò Samaariiyee, ní ki fātìi nín gítí Jeerusaleem ki sòoǹ Tibɔmɔntiil Samaarii timbilimmu tikpil poon.

Fiiliipi nì Ueetiiyoopiija ubɔ bɔti

26 Ní ti-Dindaan tuuŋŋu ŋubɔ tùkū Fiiliipi yii: «Yīkì kí túĺ ŋgan pú kí dī nsan ŋun sìntī Jeerusaleem ki cá Gaasaayee, nsan ŋun baa ti dèe.» 27 Ní u yíkìi búntì. Niinee, Ueetiiyoopiija ubɔ u sá ufaal ki bí Eetiiyoopii nimpubɔtiu Kandaasi cee ki sá ukàlinjakpaan. Úǹ di nìn kpèé unimpubɔtee pijawanti kɔkɔ. 28 U nìn dɔ́miń Jeerusaleem ki jáam̀ Unimbɔti ki dóòyee ki fàtīi kùǹ. U nìn kā u-tɔrɔkuu pu itaamu dátí-u ní ki kàaǹ Unimbɔti bɔnaatiliu Yeesaya gbɔŋku poon. 29 Ní Unimbɔti Fam tùkū Fiiliipi yii: «Còom̀ kí kíntí tɔrɔku nee!» 30 Ní Fiiliipi sáǹ ki bàn̄ee, ki gbìl̄ kijapaayee bíi kàaǹ Yeesaya Unimbɔti bɔnaatiliu gbɔŋku poon. Ní u bālifì-u yii: «A gbìl̀ a nín kàaǹ puee taapuɔɔɔ?» 31 Ní u kíí-u yii: «M yaa kaa ká ubɔ ń tùkù-mi taapu, m làá ŋá mana kí gbìl̄?» Ní u mēē Fiiliipi ń jɔ̄m̀ kí kàl̄ u-cee tɔrɔkun. 32 Unimbɔti gbɔŋku jandi din u nìn bíi kàaǹee nín tùkù-ti puee sèé:

«Bi cáá-u ki cūnnì kii bi nín cáǹ upii kí kpɔ̀ puee,

kii bi nín cēē dipibil kuti di ŋmí kaa sūǹ puee,

míǹ ní waa nìn wāaǹ ki lī tiba.

33 U sīntì u-ba taapu, baa pɔ̀n̄-u.

Ŋma di làá dāá ŋmā kí tùkù u-maaliŋu yab tin jítèe,

kun puee bi lēē u-maŋfal duulinyan^a.»

34 Ní ukàlinjee bí Fiiliipi yii: «M gbàam̄-si, ŋma pu ní Unimbɔti bɔnaatiliu sòon̄ míǹ ní? Úǹ u-ba pu ní u sòon̄ mimmaaa, ubɔ pu ní?» 35 Niinee ní Fiiliipi yōoǹ dinyɔɔbundi ki kíĺ ki bíi sòoǹ ki tɔ́kɔ́ǹ dijandi din u kàan̄ee pu ki bíi tùkù-u Yeesu Bɔmɔntiiti. 36 Bi còom̄ ki cée, ki bàn̄ laaba ki ká nnyim, ní ukàlinjee bí yii: «Kpèè, nnyim sèé nee. Ba di gíti lìkintí-mi bí taa fàl̀-mi Unimbɔti nyim?» [ 37 Ní Fiiliipi kíí-u yii: «An cáá nsan bí fàl̀-si Unimbɔti nyim a yaa fōō ki kíí nì a-pɔbil kɔkɔ». Ní ukàlinjee kíí-u yii: «M fōō ki kíí yii Yeesu Kriisitoo sá Unimbɔti Jipɔɔn^b.»] 38 Ní u bí yii bí yóoń tɔrɔku, ní u nì Fiiliipi liitil nín sìntī ŋkpinni, ní Fiiliipi tin fùl̄-u Unimbɔti nyim. 39 Bi nyánní nnyiminee, Unimbɔti Fam yōoǹ Fiiliipi. Ní ukàlinjee kaa ti ká-u, ama ní ki nìkī u-saŋŋu nì dipɔɔpindin. 40 Fiiliipi, úǹ tin nyáń Asooti^c. Niinee u sòon̄ tibɔmɔntiil ki kpáaǹ ntimbilimu mun poon u jītée ki tin bàn̄ Seesaaree.