Atuun 9

Sɔɔl fōō Yeesu ki kíí

1 Ŋyunti gbantee, Sɔɔl kaa cāntì ti-Dindaan boonnooliibi nnikpaakoon. U nìn cūtì usaraaŋakpil cee 2 ki mēē-u yii ú tīī-u tigbɔn ú cáá cùnnì Damaasi kpafidiiŋŋi kpilib cee, án nín làá ŋá pu u yaa ká biba niin bin nóó nsan gbantee, uninjeeee, unimpueeee^a, ú cúú-u kí bóob́ kí cáań Jeerusaleemee. 3 U yíkì u-saŋkindi pu ki tóob́ Damaasee, kpalaayee, ŋwalifi ŋubɔ nyánní yilpu ki māntìi tú-u ki jìliŋkī, 4 ní u lítì kitiŋ. Niinee ní u gbìl̄ nneen ŋubɔ bí-u yii: «Sɔɔl, Sɔɔl, ba ŋá ní a páb́-mi míǹ?» 5 Ní u bālifì yii: «An sá sii ŋma ní, m-Dindaan?» Ní ti-Dindaan kíí-u yii: «An sá man Yeesu un a páb̀ee. 6 Yīkìí kɔ́ kitiŋin. Niin ní bi làá tùkù-si min sá á ŋée.» 7 Tifaandi kɔ́ bininjab u nì bin nìn nóóyee. Bi yúl̀, kaa ti ŋūǹ kí wàan̄ kí lì tiba, kun puee bi gbìl̄ nneen pu ki mun kaa wāĺ báà ubɔ. 8 Ní Sɔɔl yáatìi yúl̀ ki ŋúbitì u-nimbiliŋee kaa ti wāĺ. Ní bi cúú u-ŋal ki dātì-u ki cáa cūnnì Damaasi. 9 Ní u kāl̀ iwiin ita, kaa wál̀, kaa jíń, kaa nyùn̄ mun.

10 Ama Yeesu boonnooliu ubɔ nìn bí Damaasi, bi yíì-u yii Ananiyasi. Ti-Dindaan nyántì u-ba ki dàkā-u, ní ki yíiń-u yii: «Ananiyasi!» Ní u kíí yii: «M sèé, m-Dindaan.» 11 Ní ti-Dindaan bí-u yii: «Yīkìí dī didandi din bi yíì didancancaalee kí nyàab̀ Juuda dumpu un bi yíì Sɔɔl u sá Taarsee. Sɔɔl gbanti bíi mèé ŋwimmeem 12 ní m yāntì u ká sii Ananiyasi kóoń ki dū a-ŋalii ki páaǹ u-pu ú ŋmā kí wāl̀.» 13 Ní Ananiyasi kíí-u yii: «M-Dindaan, m gbìl̄ binib tikpil cee tikpitil tin uninja nee ŋá a-yab bin bí Jeerusaleemee pu. 14 U dɔ́miń doo ki cáá mpɔn ŋun bisaraaŋakpilib tīiń-u ú nīn cáa bōob̀ bin kɔkɔwoooo nóó-see.» 15 Ní ti-Dindaan bí-u yii: «Nín̄ cá, kun puee uninja gbanti di sá un m lēē ú lēē seera m-pu bin kaa sá Juuda yabee nì bi-bɔtiibi, nì Isirayeel yab kɔkɔ nimbiinee. 16 Ní man m-ba ń dāá dàkà-u falaa un u làá jī m-yindi puee.» 17 Niinee, Ananiyasi búntì ki bàn̄ ki kɔ́ kudicaŋuee ni, ki dū u-ŋalii ki páaǹ Sɔɔl pu, ní ki bí yii: «M-nabiki Sɔɔl, ti-Dindaan di túnní-mi. Úǹ di sá Yeesu un a nìn ká nsanni a nín nìn dòoń puee. U là á wāl̀, kí gbí Circir Fam.» 18 Dicilpu niin ní tiba nyánní u-nimbiliŋin ki lítì kii ijɔmpɔkɔee, ní u wál̀. Ní u yíkì bi fùl̄-u Unimbɔti nyim. 19 Ní u jíń tijin ki fātìi ká mpɔn.

Sɔɔl sòon̄ Unimbɔti bɔti Damaasi

Ní Sɔɔl kāl̀ Damaasi iwiŋkaaŋkaa Yeesu boonnooliibi cee, 20 ní ki kpáàa kíĺ ki sòoǹ Yeesu pu akpafidiinni, yii u sá Unimbɔti Jipɔɔn. 21 An nìn ŋá bin kɔkɔwoooo nìn bíi pílifíǹ-uee bitii, ní bi lì yii: «Kaa sá un nìn bí Jeerusaleem ki páb̀ bin nóó Yeesuee deeee? Waa tí dɔ́miń doo kí cūtì-bi kí bóob́-bi kí cáá-bi bisaraaŋakpilib nimbiin deeee?» 22 Ŋyunti gbantee, Sɔɔl nìn mɔ̀tīi kāntí mpɔn, ki sòoǹ ki pɔ́ɔkíǹ Juuda yab bin bí Damaasee, ki dàkà-bi yii Yeesu lafun sá Meesiya.

23 Iyunti tikpil jítèe, ní Juuda yab kpáfì kinyɔkɔ ki là kí kpɔ̀-u. 24 Ama Sɔɔl béè tin bi là kí ŋée. Bi nìn dòoń ki nākantí ki cīití-u Damaasi tiŋki gundi punyɔmmu nyɔkɔpui ŋwiimpu nì kunyeeu kí ŋmā kí kpɔ̀-u. 25 Kunyeeuee, bin dī Sɔɔlee dū ŋŋmii ki kúĺ kukabiku ki dū Sɔɔl ki tākaǹ, ki dū-u ki nāatì digundi, ní u tin tīiǹ kitiŋ ki nyáń ki búntì^b.

Sɔɔl bí Jeerusaleem tiŋkin

26 Niinee, Sɔɔl cūtì Jeerusaleem ki bàà là kí dū u-ba kí kɔ́ǹ Yeesu boonnooliibin. Ama bi-kɔkɔ nìn fàŋkí-u, kaa nyí yii u kpántì Yeesu boonnooliu. 27 Ní Baarnaabaasi cáá-u ki cūnnì Yeesu kpambaliŋ cee ki máafì-bi Sɔɔl nín nìn ká ti-Dindaan nsanni, u sòon̄ nì u puee, nì min Sɔɔl nìn sòon̄ Damaasi ki cántì ki pɔ̀n̄ Yeesuee. 28 U nì bi nìn kíǹ ki yìiǹ Jeerusaleem, ní u sòoǹ ti-Dindaan pu, kaa fàŋkí. 29 Ní u nì Juuda yab bin gbìl̀ Greeki sooŋyee sòoǹ ki kpākantí tɔb, ní bíǹ nìn kíǹ ki nyàab̀ kí kpɔ̀-u. 30 Nnabiyaamu mun kíǹee gbìl̄ mimmee, ní ki yōoǹ-u ki cūnnì Seesaaree, ní ki yāntì u búntì Taarsi.

31 Kriisitoo nikitil din nìn bí Juudee nì Galiilee nì Samaariiyee nìn kíǹ ki bí nsɔŋfin ki báaǹ inyaan ki fàŋkí ti-Dindaan, kaa là kí yìntīǹ-u. Ní bi-wíiŋŋu nìn gbēentí mun, kun puee Circir Fam nìn bí bi-cee.

Eenee cáaǹtam

32 Peetroo nìn yìiǹ niin timmu kɔkɔn ki màntī Kriisitoo yab pu, ní ki kpáàa sīntì bin nìn kóò Liida tiŋkinee cee, 33 ní ki tin ká uninja ubɔ, bi yíì-u Eenee. U nìn sá ufaliŋfaan ki dɔ̄ u-lambaŋki pu abin anii. 34 Ní Peetroo bí-u yii: «Eenee, Yeesu Kriisitoo cáaǹ-si! Yīkìí kpáb́ a-lambaŋki.» Ní u yáatìi yúl̀ dicilpu niin. 35 Bin kɔkɔwoooo nìn kóò Liida nì Saarɔnee nìn ká-u, ní ki kpántì bi-ba ki kíǹ ki nóó ti-Dindaan.

Tabiita fìkititam

36 Unimpu ubɔ nìn bí Joopee ki nóó Yeesu, bi yíì-u Tabiita, - greeki sooŋyi poonee bi yíì-u Dɔɔrkaasi^c. - U nìn ŋáań binib tiŋan tikpil, ní ki pūǹ biwɔfib animbil mun. 37 Ŋyunti gbantee, u búŋkì ní ki kpíì. Bi fùl̄-u ki dóòyee, ki cáá-u ki jɔ́m̀ diditɔntɔkɔl pu ki bíl̀. 38 Joopee nì Liida kaa nìn dátiǹ tɔb. Yeesu boonnooliibi gbìl̄ yii Peetroo bí Liida, ní bi tú bininjab bili u-cee bí cùú gbàamìń-u yii ú dāan̄ bi-cee malaa malaa. 39 Ní Peetroo yíkì dicilpu, u nì bininjabee kɔkɔ búntì. Bi bàn̄ee, ní bi cáá-u ki jɔ́m̀ diditɔntɔkɔl pu. Bikpiipusoodambi kɔkɔ nìn dɔ́miń ki māntì ki gɔ́ń Peetroo ki sūǹ ki dàkà Peetroo Dɔɔrkaasi nín nìn dáá bí ki lù abɔkuti nì satab biŋyee. 40 Ní Peetroo nyántì binib kɔkɔ ní ki gbāaǹ ki bíi mèé, ní ki fātì utaŋkpiil pu ki bí yii: «Tabiita, yīkìm̄!» Ní u ŋúbitì u-nimbiliŋ ki kpēē Peetroo, ní ki yáatìi kāl̀. 41 Ní Peetroo tāntì u-ŋal ki cúú-u ki yáatì-u ki yóoǹ, ní ki yíiń Kriisitoo yab nì bikpiipusoodambee, ki dū un fīkitèe ki dūu dàkā-bi. 42 Joopee yab kɔkɔ gbìl̄ an bɔtee, ní binib tikpil fōō ti-Dindaan ki kíí. 43 Peetroo nìn kāl̀ Joopee ki yúntì ugbanjɔb un bi nìn yíì Siimɔŋyee cee.