Atuun 10

Peetroo nì Kɔɔrneeyi bɔti

1 Uninja ubɔ nìn bí Seesaaree, bi yíì-u Kɔɔrneeyi. U nìn sá usoojakpil disoojakitil din bi yíì Italii yalee kansikin. 2 Uninja gbanti nìn nóó Unimbɔti ki sá unimɔnti, u nì u-dicaŋku kɔkɔ nìn fàŋkí Unimbɔti. U nìn pūǹ Juuda yab wɔfib tiwan ní ki mèé Unimbɔti baabadal. 3 Dalbee, an cá kii tikúti titee, u ká Unimbɔti tuuŋŋu kpìrrr, ŋu kóoń u-cee ní ki bí-u yii: «Kɔɔrneeyi!» 4 Tifaandi nìn kɔ́-u, ní u kíǹ ki bíi kpèé Unimbɔti tuuŋŋu, ní ki bí yii: «Ba ŋá ní, m-Dindaan?» Ní ntuun bí-u yii: «A-wimmeem nì a nín pūǹ tiŋyee bàn̄ Unimbɔti, ní u téetì a-pu. 5 Tɔ̄ bininjab kɔŋkɔnnee Joopee bí yíiń un bi yíì Siimɔn ki páaǹ-u diyindi yii Peetrooyee. 6 U bí ugbanjɔb un bi yíì Siimɔŋyee cee, un diiku bí tiŋku caŋinee.» 7 Ŋyunti ŋun ntuun ŋun nìn dɔ́miń ki sòon̄ nì Kɔɔrneeyee búntèe, ní u yíiń u-tɔntɔnliibi bili nì sooja ubɔ un nìn bí u-cee ki fàŋkí Unimbɔtee. 8 U nìn máafì-bi tibɔtee ní ki dū-bi ki tú Joopee.

9 Kutaa wúntèe, bi bí nsanni ki tóob́ kitiŋ gbantee, Peetroo jɔ́m̀ kudii yilpu kuwiŋkuluu yuntiŋu kí mèè. 10 Ŋkùm nìn cúú-u, u bàà là kí jī. Ŋyunti ŋun bi bíi ŋáań-u tijinee, ní an ŋá-u kii ŋgeemee. 11 Ní kutagbɔŋu pīitì, ní u ká tiwan tiba bí kii satakpaanee bi bóob́ ajannaatil pu ki sīntìń kitiŋ u-nimbiin. 12 Tiwan tin còom̄ ataa anaayee nì tin fùee nì nnɔmbiyaamu kɔkɔ nìn kā satee poon, 13 ní nneen ŋubɔ bí-u yii: «Peetroo, yīkìm̄ kí kpɔ̀ kí ŋmɔ́!» 14 Ní Peetroo bí yii: «Aayee, m-Dindaan! Maa láá pée jíń tijin tin kòóyee àá tin kaa bí circiree^a.» 15 Ní an gíti sòon̄ nì u nliliitiim yii: «Tin tin Unimbɔti ŋáŋkèe, sii ń taa lī yii taa ŋān̄^b!» 16 An jítì míǹ diba dibee mita pu, ní tiwanee fātìi nín jɔ́ḿ yilpu.

17 Peetroo bākatì ki kíǹ ki bíi dàkafī tin tin u bàà wál̀ee taapuee, niinee, bininjab bin Kɔɔrneeyi túnnée bālifì ki béè Siimɔn dumpu ki dɔ́miń ki yú kipunyɔkɔpu 18 ki yíiń ki bālifì yii: «Doo ní Siimɔn un bi yíì Peetrooyee kóòoo?» 19 Peetroo gbíntìi bíi dàkafī tin u bàà wál̀ee taapuee, ní Unimbɔti Fam bí-u yii: «Bininjab bita biba di nyàab̀-see. 20 Yīkìí kpákatí, taa gùgufì, si nì bi kɔkɔ ń nīn cá, kun puee man di túnní-bi.» 21 Niinee ní Peetroo kpákatìń, ní ki bí bininjabee yii: «Man un ni nyàab̀ee sèé. Ba di ŋá ní ni dɔ́miń doo?» 22 Ní bi kíí-u yii: «Kɔɔrneeyi un sá usoojakpil ki bí deedee ki fàŋkí Unimbɔti, Juuda yab kɔkɔ sòoǹ u-pu yii u sá unimɔntee, Unimbɔti tuuŋŋu ŋubɔ tùkū-u yii ú yíiń-si, á dāan̄ u-dumpu ú pīlifì tin tin a cáá kí tùkù-uee.» 23 Ní Peetroo fōō-bi ki bíl̀.

Kutaa wúntèe, u nì bi yíkìi búntì. Nnabiyaamu mun nìn bí Joopeeyee biba mun nìn céeǹ-u. 24 Ku wúntèe ní u dūu bàn̄ Seesaaree. Kɔɔrneeyi nìn yíiń u-yab nì u-bɔɔtimɔntiibi ki kíǹ ki kā ki cí-bi. 25 Ŋyunti ŋun Peetroo kóònée, ní Kɔɔrneeyi túŋkì-u ki gbāaǹ ki póofì-u kunɔpoou. 26 Ama Peetroo yáatì-u, ní ki bí yii: «Yīkìm̄! Ma mun sá unil ní.» 27 Bi bíi sòoǹee ní ki nín kóò, ní Peetroo bàn̄ ki ká kunipaau kpáfì ki kā. 28 Ní u bí-bi yii: «Kéè, ni nyí yii an sá timbi Juuda yab dikoobil ti nì binicambi ń kpāfì àá tí kɔ́ bi-dumpuyaa! Ama Unimbɔti dàkā-mi yii ḿ taa kpèè yii ubɔ sá ukpiti àá waa ŋān̄. 29 Míǹ pu ní ni tú ki yíiń-mi, m dɔ́miń kaa kpákáǹ. Too, ba pu ní ni yíiń-mi?» 30 Ní Kɔɔrneeyi kíí-u yii: «Iwiin inaa sèé, tikúti tita, ŋyunti ŋun bí nee deedee, m bíi mèé m-dumpu. M kpēēyee, uninja ubɔ dee ki pēē dibɔkutil diba di jìl̀, ki yú m-nimbiin, 31 ní ki bí yii: <Kɔɔrneeyi, Unimbɔti fōō a-wimmeem ki téetì a nín ŋáań biwɔfib tiŋan puee. 32 Tɔ̄ Joopee bí yíiń Siimɔn un bi yíì Peetrooyee, u kóò Siimɔn ugbanjɔb un dumpu nákáǹ tiŋkuee.> 33 Dicilpu ní m tú binib a-cee, ní a ŋá tiniti ki dɔ́miń. Kɔŋkɔnnee, ti-kɔkɔ bí Unimbɔti nimbiin kí pīlifì tin ti-Dindaan tīī-si á tùkù-tee.»

Peetroo nyɔɔbundi

34 Niinee, Peetroo kíĺ ki bíi sòoǹ nì bi yii: «Ibaamɔn, m béè yii Unimbɔti kaa gàntī ubɔ^c. 35 Ntimu kɔkɔn, un yaa fàŋkí-u ki ŋáań min kítèe ŋān̄ u-nimbiin. 36 «Ni nyí yii Unimbɔti túnní Tibɔmɔntiil^d Isirayeel yab cee, kí tùkù-bi yii nì Yeesu Kriisitoo puee bi làá ká nsɔŋfi: Yeesuee di sá ti-kɔkɔ Dindaan. 37 Yoowaneesi nín sòon̄ Unimbɔti nyim difaldi bɔti ki dóò boonee, ni nyí tin jítì Juudee tiŋki kɔkɔn ki kíliń Galiileeyee. 38 Ni nyí yii Unimbɔti nìn tīiń Yeesu Naasaareeti yɔu u-Fam ki yāntì u cáá mpɔŋkpaan. U nìn cá ajan kɔkɔ ki ŋáań tiŋan ki cāantí bin kɔkɔ Sitaan pɔŋŋu nìn ŋúb́ee, kun puee Unimbɔti nìn bí u-cee. 39 Timbi kántì tin kɔkɔ u ŋáaǹ Juuda yab tiŋkin ki kpáaǹ Jeerusaleemee mun. Úǹ ní bi kpáá ndɔ pu, ki kūū-u. 40 Ama Unimbɔti fīkitì-u winta dal, ki yāntì bi ká-u. 41 An kaa sá samaa kɔkɔ di ká-u, asee Unimbɔti nín nìn pée lēē timbi bin bin ń ká-uee. Di sá u nín nìn fīkitì ditaŋkpiilinee, boonee, ti nì u di jíń ki nyùn̄^e. 42 Ní u bí-ti yii tí nīn sòoǹ u-pu samaa cee, kí dàkà-bi yii úǹ Yeesu baba ní Unimbɔti lēē u-bɔsoonliu, ú sòoǹ bin wāĺee nì bin kpíìyee bɔti. 43 Úǹ pu ní Unimbɔti bɔnaatiliibi kɔkɔ lēekì seera yii un sá kamaa yaa fōō-u ki kííyee kāntí u-kpitii pɔ̄tam u-yindi pu^f.»

Bin kaa sá Juuda yabee mun fōō Circir Fam

44 Peetroo bíi sòoǹ mimmee, ní Circir Fam kpákatìń bin kɔkɔ nìn bíi pílifí u-nyɔɔbundee pu. 45 Kriisitoo yab bin sá Juuda yab ki céeǹní Peetrooyee nìn bākatì. Di sá yii Unimbɔti nìn pú bin kaa sá Juuda yabee gba Circir Fam. 46 Bi nìn gbìl̄ binicambi bíi sòoǹ isooncaan ki nyɔ́ŋkí Unimbɔti. Niinee ní Peetroo bí yii: 47 «Binib nee fōō Circir Fam kii timbee dee. Mimmee, ti ŋūǹ kí yíí yii taa làá fàl̀-bi Unimbɔti nyimaaa?» 48 Ní u pú nsan yii bí fàl̀-bi Unimbɔti nyim Yeesu Kriisitoo yindi pu, ní bi gbāam̀-u yii ú kàl̄ bi-cee iwiŋkaaŋkaa.