Atuun 11

Peetroo máafì tin jítèe Jeerusaleem

1 Akpambal nì nnabiyaamu mun nìn bí Juudeeyee gbìl̄ yii bin kaa sá Juuda yabee mun fōō Unimbɔti nyɔɔbundi. 2 Peetroo nìn fātìi bāań Jeerusaleemee, bin nìn fōō ki kíí ki sá Juuda yabee nìn bíi wòoǹ-u, 3 yii u kɔ́ bin kaa gíí dikpancandee dumpu, u nì bi jíń tijin. 4 Ní Peetroo bíi máafí-bi tin jítèe, an nín kíliń pu ki tin kúntì puee, yii: 5 «M nìn bí Joopee tiŋki poon ki bíi mèé ní Unimbɔti ŋúbitì m-nimbiliŋ m wál̀ tiwan tiba, tì bí kii satakpaanee ki bóob́ ajannaatil pu ki nyánní yilpu ki sīntìń m-cee. 6 Ní m bíi kpèé sata poon dímmmee, ní ki ká tiwaŋkuti tin còom̄ ataa anaayee nì ipeel, nì tin fùee nì nnɔmbiyaamu, 7 ní m gbìl̄ nneen ŋubɔ bí-mi yii: <Peetroo, yīkìí kpɔ̀ kí ŋmɔ́!> 8 Ní m bí yii: <Aayee, m-Dindaan! Doooo nee tiwan tin ti kòó àá tin kaa bí circiree kaa láá pée kɔ́ m-nyɔkɔn.> 9 Nliliitiimin ní nneenee gíti lī yii: <Tin Unimbɔti ŋáŋkèe, sii taa lì yii taa ŋān̄!> 10 Áli míǹ diba dibee mita, ní an wanti kɔkɔ fātìi nín jɔ́ḿ yilpu. 11 Dicilpu niinee, bininjab bita bin bi nìn túnní Seesaaree m-ceeyee bāań kudii kun ni m nìn kóòyee nyɔkɔpu. 12 Ní Circir Fam bí yii man nì bi ń nīn cá, ḿ taa gùgufì. Man nì nnabiyaamu muluu nee di nìn nóó ki cūtì Kɔɔrneeyi dumpu. 13 Ní u mun máafì-ti u nín nìn kā u-dumpu Unimbɔti tuuŋŋu ŋubɔ bāań ki tùkū-u yii: <Tɔ̄ Joopee, bí yíiń-si Siimɔn un bi páaǹ diyindi yii Peetrooyee. 14 U làá tùkù-si tibɔti tin pu sii nì a-samaau kɔkɔ làá dī kí ká difiilee.> 15 M kíĺ ki bíi sòoǹ nì bee, ní Circir Fam kpákatìń bi-pu kii mì nín nìn kpákatìń ti mun pu mpeepeekaam puee. 16 Niinee, m téetì ti-Dindaan nyɔɔbundi nee pu yii: <Yoowaneesi nìn fùul̀ binib Unimbɔti nyim, ama Unimbɔti làá dāá fàl̀ nimbi nì Circir Fam ní.> 17 Unimbɔti pú bi mun u-Fam mbaantiim kii u nín nìn pú ti mun puee ní, kun puee ti-kɔkɔ fōō ti-Dindaan Yeesu Kriisitoo ki kíí. Kin ma mun ŋma ní ḿ kpákáǹ Unimbɔti?» 18 Bi gbìl̄ mimmee, kaa ti bíi kpākantí-u, ki kíǹ ki bíi nyɔ́ŋkí Unimbɔti ki bí yii: «Mimmee, Unimbɔti yāntì bin kaa sá Juuda yabee mun fá bi-kpitii kí ŋmā kí ká dimaŋfal dee.»

Kriisitoo nikitil din bí Antiyɔɔsee

19 Bin bin bi nìn páb́ bi yàl̄ Eetiyeen kúm boonee bàn̄ áli Feenisii nì Siipiri nì Antiyɔɔsi, ki sòoǹ Unimbɔti bɔti Juuda yab ŋmaniŋma cee. 20 Ama bi-kansikin biba bin nyánní Siipiri nì Siireenee bāań Antiyɔɔsi ki mun bíi tùkù bin kaa sá Juuda yabee Tibɔmɔntiil tin sòoǹ ti-Dindaan Yeesu puee. 21 Ti-Dindaan pɔŋŋu nìn bí bi-cee, ní kunipaau nìn fōō ki kíí ki nóó ti-Dindaan. 22 Kriisitoo nikitil din bí Jeerusaleemee nín gbìl̄ an bɔtee ní bi dū Baarnaabaasi ki tú Antiyɔɔsi. 23 U bàn̄ee ní ki ká Unimbɔti nín bīiǹ bi-pu miŋyee ní an mɔ́ɔkiǹ-u, ní u bíi tìì-bi kunyannyaau, yii bi-kɔkɔ ń nīn yú nì dipɔbil diba kí nīn nákáǹ ti-Dindaan. 24 Di sá yii u nìn sá unimɔnti, ki gbí Circir Fam ki cáá fookii. An puee binib tikpil nìn dɔ́miń ki nóó ti-Dindaan.

25 Míǹ boonee ní Baarnaabaasi búntì Taarsi kí nyàab̀ Sɔɔl. 26 U bàn̄ ki ká-uee, ní ki cáań-u Antiyɔɔsi. Dibimmɔndi kɔkɔee, bi nìn dūu kāl̀ Kriisitoo nikitil kansikin ki dàkà binib tikpil Unimbɔti bɔti. Antiyɔɔsi tiŋkin ní bi péé péé ki yíiń Yeesu boonnooliibi yii Kriisitoo yab. 27 Ŋyunti gbantee, Unimbɔti bɔnaatiliibi biba nyánní Jeerusaleem ki sīntì Antiyɔɔsi. 28 Bi-kansikin ubɔ ní bi nìn yíì Agabusi. Unimbɔti Fam yāntì kijapaayee yíkìi lī yii, ŋkùm miba làá nyā kitiŋ kɔkɔ pu kí nīn pɔ̄ɔ̄. - Ní mì lafun bāań Kloodi beel yuntiŋu. 29 Ní Yeesu boonnooliibi bíi màkà báà ŋma ń tīī u nín ŋūǹ puee bí dūú tūtuǹ bi-nabiyaamu mun kóò Juudeeyee. 30 Bi tīīyee, ní ki yāntì Baarnaabaasi nì Sɔɔl yōoǹ ki cáa cūnnì Jeerusaleem Kriisitoo nikitil kpilib cee.