Atuun 12

Bi kūū Yakubu ki pīiǹ Peetroo sarka

1 Ŋyunti gbantee, ubɔti Eeroodi kíĺ ki bíi sàantí Kriisitoo yab biba, 2 ní ki yāntì bi dū kitàataajiki ki kūū Yakubu un sá Yoowaneesi maanee. 3 U ká yii an ŋān̄ Juuda yab ceeyee, ní u yāntì bi cúú Peetroo mun. An nìn sá iwiin in poon bi ŋmóò kpɔnɔb bin baa ŋá ŋkpɔnɔnyɔkɔee ní^a. 4 Bi cúú-u ki tɔ́ sarkanee, ní ubɔti lēē asoojakiti anaa, dikitil kamaa cáá soojab binaa, bí nīn cīití-u ki kpántí. U là yii, bi yaa jíń Dilákatil jiŋaaliu ki dóòyee, ú cáań-u samaa nimbiin kí sòoǹ u-bɔti. 5 Ŋyunti ŋun Peetroo nìn bí kusarkadiinee, Kriisitoo nikitil nìn bí ki mèé Unimbɔti u-pu, kaa gbèentí.

Ntuun nyántì Peetroo kusarkadiin

6 Kutaa ń wúntí Eeroodi ń cáá-u ibɔsoon samaa nimbiinee, kunyeeuee, Peetroo nìn sáká soojab bili kansikin ki dɔ̄ ki gèeǹ. Bi nìn bóob́-u ikusaka ili, ní soojab bili yú kipunyɔkɔpu ki cí kusarkadii. 7 Kpalaayee, Unimbɔti tuuŋŋu ŋubɔ dɔ́miń, ní kusarkadiin wál̀ nyáka nyaka. Ní ntuun fáá Peetroo takakal ki fīntì-u, ní ki bí yii: «Yīkì malaa!» Ní ikusakee cúu fɔ́fì u-ŋaliiyin ki lítì. 8 Ní ntuun bí yii: «Gbìn̄ a-dambalau kí táká a-naatakaŋ.» Ní u ŋá míǹ. Ní ŋu gíti bí yii: «Dū a-satau kí pèen̄, kí nīn nóó-mi.» 9 Ní Peetroo nóó-u ki nyánní kusarkadiin, kaa nyí min ntuun bíi ŋáańee sá tibɔŋman. Úǹ nìn dākafì yii an sá kudamintiiu ní. 10 Bi jítì soojapeekaabi pu ki tin jítì bililiitiibi mun pu, ní ki dūu bàn̄ tikúti punyɔkɔki kin túĺ kitiŋinee. Kipunyɔkɔee cúu pīitì ki-ba bi-nimbiin, ní bi nyáń ki tākaǹ didandi diba pu. Kpalaayee, ntuunee yíkì Peetroo cee.

11 Niinee ní Peetroo béè tin bāań-uee ní ki bí yii: «Kɔŋkɔnnee, tiŋman, m nyí yii ti-Dindaan di túnní u-tuuŋŋu ŋú dāá nyāntí-mi Eeroodi ŋaan nì tin kɔkɔwoooo Juuda yab bàà cí kí ŋá-mee.»

12 U yúl̀ ki dākafèe, ní ki nín dòoń Maarii, Yoowaneesi un bi páaǹ diyindi yii Maarkee na dumpu. Niin ní binib tikpil nìn kpáfì ki bíi mèé. 13 U bàn̄ ki fáá kunaakoou punyɔkɔ, ní utɔntɔnli ubɔ, u sá unimpu bi yíì Roodee sútìń kí pīlifì. 14 U béè Peetroo neenee, ní an mɔ́ɔkiǹ-u. Ú bàà pìitī-uee, ní u sáǹ ki cūtìi lī yii Peetroo yú kipunyɔkɔpu. 15 Ní bi bí-u yii: «A wáatì níii?» Ní u bí yii: «An baasii sá ibaamɔn ní!» Niinee ní bi bí yii: «An làá nīn sá Unimbɔti tuuŋŋu ŋun cí-uee ní!» 16 Ŋyunti gbantee, Peetroo pée gbíntìi fátí. Bi cúu pīitì ki ká-uee, ní ki bākatì sèeee. 17 Ní Peetroo dū u-ŋal ki téefì-bi yii bí ŋmīĺee, ní u máafì-bi Unimbɔti nín nyántì-u kusarkadiin puee. Ní u bí-bi yii: «Cùú tùkùmaan Yakubu nì nnabiyaamu mun kíǹee.» Ní u nyáń ki búntì laaba mun. 18 Kutaa wúntèe, soojab pɔbiliŋ bíil̀ tikpil, ní bi bíi bàlifī tɔb yii: «Ba di nín ŋá Peetroo dee?» 19 Eeroodi tú bí nyàab̀-u, ama ní baa ká-u. Ní u bí yii bí bàlifì soojab tibɔti, ní ki pú nsan bí kpɔ̀-bi. Míǹ boonee ní Eeroodi yíkì Juudee ki cūtìi kāl̀ Seesaaree ŋyunti ŋubɔ poon.

Eeroodi kúm

20 Eeroodi nìn fōō Tiir nì Siidɔn yab pu diŋuul, ní bíǹ kpáfì dicilpu kí cùú ká-u. U-tiŋkin ní bi nìn tūntí tijin ki cāabìń bíǹ cee. Míǹ puee, bi píí ubɔti Eeroodi cindin kpiliu Blaastuusi kubɔɔtiiu ki wāatì, ní ki cūtìi gbāam̀ ubɔti Eeroodi. 21 Ŋwiin ŋun bi nìn síiǹee bāańee, Eeroodi pēeǹ u-beebɔkutil ki kā u-beejal pu ki bíi sòoǹ nì bi tibɔti. 22 Ní samaa bíi kūuntí yii: «An sá unimbɔti ubɔ di sòoǹ, an kaa sá unil^b!» 23 Dicilpu niin ní Unimbɔti tuuŋŋu ŋubɔ cáań iween ki tɔ́ u-pu, kun puee waa tīī Unimbɔti tinyool. Ní akoosibil aba kɔ́ u-ni ki ŋmɔ́ ki kūū-u^c.

24 Ŋyunti gbantee, Unimbɔti nyɔɔbundi mɔ̀tīi gbìtī, ní bin fòol̄ ki kíikée wíiŋŋu gbēentí. 25 Baarnaabaasi nì Sɔɔl dóò bi-tuuŋŋi Jeerusaleemee, ní ki fātìi gítìń, ki kpáaǹní Yoowaneesi un bi páaǹ diyindi yii Maarkee.