Ilan 96

Gāāmaan nlampɔɔn kí pàkà ti-Dindaan

(Kpèè 1 Kroo 16.23-33)

1 Gāāmaan nlampɔɔn kí pàkà ti-Dindaan,

duulinya kɔkɔ nib, gāāmaan ilan kí pàkà ti-Dindaan.

2 Gāāmaan ilan kí pàkà ti-Dindaan,

ní nyɔ̄ŋkìmaan u-yindi.

Ní nīn sòoǹ u-fiil pu ŋwiin kamaa.

3 Ní māafìmaan u-nyooti atimbun poon,

kí māafì maamaacib bin u ŋáaǹee anibul kɔkɔ poon.

4 Di sá ti-Dindaan sá ukpaan ní ki máaǹ inyɔŋki,

úǹ di sá kuwambiiu ki jítiǹ inimbɔti kɔkɔ.

5 Anibul ŋin kíǹee nimbɔtii kɔkɔ sá fám ní,

ama ti-Dindaan di náań yilpu.

6 Tinyool nì jilma bí u-nimbiin,

mpɔn nì kunyaaŋŋu gbí u-kɔŋkooŋŋun.

7 Kitiŋ pu nibuliŋ, tīīmaan ti-Dindaan

u-nyooti kí sòoǹ u-pɔŋŋu pu.

8 Tīīmaan ti-Dindaan u-yindi nyooti,

ní cáaḿmaan ni-saraabi, ní kɔ́maan u-cindin.

9 Bòom̄maan taapu ti-Dindaan nimbiin,

ŋyunti ŋun ní u yaa lēē u nín bí circir puee ki dàkēe.

Nín̄ jìkìmaan nì tifaandi u-nimbiin, kitiŋ pu nib kɔkɔ.

10 Tùkùmaan atimbun nib kɔkɔ yii: «Ti-Dindaan jīǹ dibeel,

duulinya bá ki pɔ̄ɔ̄, kaa cìŋkī.

U sòoǹ anibul bɔti nì ibaamɔn ní.»

11 Yilpu ń nīn fàal̀, kitiŋ ń nīn bí dipɔɔpindin,

tiŋku ń nīn gà kuwoou, ki kpáaǹ tin kɔkɔ bí u-poonee!

12 Tisati ń nīn fàal̀ ki kpáaǹ tin kɔkɔ bí ti-poonee!

Isufi in yú kubambaŋŋunee ń nīn kūuntí nì dipɔɔpindi

13 ti-Dindaan nimbiin. Di sá yii u dòoń,

u dòoń kí dāá sòoǹ kitiŋ pu nib bɔti.

U làá dū deedee kí sòoǹ duulinya bɔti,

kí dū u-baamɔŋyi kí sòoǹ anibul bɔti.