Dāam̄maan tí cùú nyɔ̄ŋkì ti-Dindaan
95
1 Dāam̄maan tí cùú nyɔ̄ŋkì ti-Dindaan,tí fáámaan iwiliili kí dàntì
kutaŋkpanaakoou kun fìil̄-tee.
2 Tí cùmaan u-nimbiin kí jāam̀-u,
tí gāāmaan ilan nì dipɔɔpindi kí nyɔ̄ŋkì-u.
3 Di sá yii ti-Dindaan di sá Unimbɔtikpaan,
úǹ di sá ubɔtikpaan un tɔ́kɔ́ inimbɔti kɔkɔ puee.
4 Kitiŋ taapu taapu kā u-ŋaan ní,
úǹ di tí yì ajoon yilpu kúnti kunti.
5 Úǹ di tí yì tiŋku, di sá yii úǹ di náań-u,
ní ki yì kitiŋ kin ní u dū u-ŋal ki máńee.
6 Dāam̄maan, tí bòom̄maan kí gbàan̄ kí jāam̀-u,
tí gbàam̄maan ti-tabiŋyiliŋ pu
ti-Dindaan un náań-tee nimbiin.
7 Di sá yii úǹ di sá ti-Nimbɔtiu,
ní timbi sá dinibul din u kpàáyee,
kupicaŋkpuŋu kun u kpòotēe.
Díǹ nee, ni yaa gbìl̄ tin u sòon̄ee,
8 ní taa ŋá mpɔɔgbifin kii ni nín nìn ŋá pu Meeriibayee,
a lì kii tin nìn jítì Maasa, kuteeuneea.
9 Ni-naanjab nìn kpákáǹ-mi ki nìn cɔ́ŋkì-mi niin,
min kamaa bin nìn ká tin m ŋée.
10 Abin imuŋku ilee, binib gbanti nìn yāntì m-naŋki nyáń nì bi,
ní m nìn bí yii: «An sá dinibul din yiliŋ gáatèe ní,
baa nyí kun m lèe.»
11 Niinee, m-ŋuul poonee ní m pūtì ki lī yii:
«Bi kpá kí kɔ́ m-ŋuŋfil laŋkib!»